بانیؤ و دؤی هه‌ؤێ!

 

ماؤیؤ چێؤه‌ڵ هه‌ؤاڵیؤ جه‌ سایتوو په‌یامنیریه‌نه‌ به‌ زؤانوو وه‌زیروو په‌روه‌رده‌یۆ ؤه‌ڵا بیۆ که‌ ؤاته‌ بیش" داؤاکاری خه‌ڵکی ده‌ڤه‌ری بادینان بۆ خوێندن به‌ زاراوه‌ی بادینی له‌ قۆناغه‌کانی بنه‌ره‌تی و ئاماده‌یی زۆر ره‌وایه‌ و ئه‌م بابه‌ته‌ له‌ ئه‌نجومه‌نی وه‌زیرانی حکومه‌تی هه‌رێم تاوتوێده‌که‌ین و بریارێک ده‌ر ده‌که‌ین".

هه‌ر چینه‌ یاگی ویشه‌نه‌ که‌ یو پیروز بایی که‌رو ئۆ بادینیه‌کا و ؤاچو پیروزشا بو! مافوو ویشانه‌ و خێره‌و که‌سی نیه‌نه‌. جه‌ پاڵیچشه‌نه‌ په‌نجه‌ کیشو په‌ی بڕیؤ چا کومه‌ڵه‌ په‌رسا که‌ دلی ته‌مو مژوو نیگه‌رانیه‌نه‌ وه‌شی با و ته‌لاش که‌رو تا جوابوو بازیؤیشا بیزوؤه‌. ‌

چیش بی و چی په‌ی ئیمه‌ نه‌کریا ؟ خو ئیمه‌یچ ده‌نگما هور بی و به‌ شیؤیؤی سه‌دی سه‌د دیموکراتیانه‌ داؤاما که‌رد. ئی بان و دؤه‌ هه‌ؤا ماناش چیشه‌نه‌؟

تو ؤاچی ئینی پاسه‌ یاؤێبانه‌ که‌ ئینه‌ ماف نیا  و خه‌ڵاتا و ئادی به‌ ئاره‌زوو متاؤا بداش و بساناش؟ ده‌ی ئه‌گه‌ر چیمنه‌نه‌ ئا گرده‌ هاؤاره‌ گوش که‌ڕ که‌ری سه‌روو مافه‌کا مروؤی چیشینی که‌ یو رؤانه‌  ده‌مشاؤه‌ مژنه‌ؤو؟

ئه‌ی تو ؤاچی مه‌ردموو هۆرامانیشا  به‌ ژماره‌ جه‌ مه‌ردموو بادینانی لاؤه‌  که‌مته‌ر بو؟ چانیشانه‌، به‌ڵام یاگی په‌رسینه‌ که‌  چکو و چه‌نیشا زانا؟ مه‌گه‌ر ئانه‌ نیا ڕؤانه‌ی په‌ی پوژنای فیڵا چیروو ده‌س به‌رده‌ی په‌ی  لیسته‌ ئه‌ره‌ؤزیاؤ هورچنیه‌که‌یشا عه‌زری  نه‌بیه‌ی سه‌رژماری کوردستانی ماراؤه‌. تازه‌ گیره‌م چامنه‌یچه‌ بو و هۆرامان به‌ ژماره‌ که‌مته‌ر بو جه‌ بادینانی، ده‌ی بازهه‌م مافوو ویمانه‌ په‌رسمی که‌ جه‌ کام گوشه‌و به‌یاننامه‌و مافه‌کا مروؤیه‌نه‌ وانانشاؤه‌ که‌ مافی مروؤی  به‌ کۆچ و  و پیمانه‌ مدریا؟ خو مافه‌کی مروؤی جه‌ بنه‌ڕه‌ته‌نه‌ مافی تاکه‌ که‌سیه‌نی. ئی فه‌لسه‌فه‌ نایابه‌شا چکوؤه‌ ئاؤرد؟

وه‌شبه‌ختانه‌ ئی به‌ ماف یاؤای بادینیا  ئاؤیچ که‌رونه‌ چیروو گردوو ئا ؤیر و په‌ی لؤایه‌ سه‌قه‌تا که‌ جه‌ سه‌رده‌موو داؤاکی ئیمه‌ ئۆ پارلمانی، په‌ی به‌ ره‌سمی ئه‌ژناسای زؤانی هۆرامی،  روو به‌رویما  کریینیؤه‌ و دریینی گوشماؤری که‌ ئی داؤاکاری ئیمه‌ یانه‌و کوردی که‌روبه‌ سه‌ربه‌شوو یانا و....

ده‌ی ئیسه‌ با ئانی، که‌ په‌رچه‌مه‌و ئی ؤاته‌ قه‌ڵباشا هور که‌ردی بی، بلا و یه‌خی به‌رزانیا گیرا و چه‌نه‌شا په‌رسا که‌ چی گه‌ره‌کشانه‌ یانه‌و کوردی کاؤل که‌را؟

جه‌ چند حاڵه‌تا زیاته‌ر نیا، یا به‌رزانیی پانه‌یه‌ یاؤێنی که‌ کوردی  نیه‌نی و ئی گرده‌ ساڵه‌ بی مانا جه‌ ڕاو کوردایه‌تیه‌نه‌ ویشا نیان ئاؤ و ئاورۆ، یا سه‌رشا ؤه‌نه‌ شیؤیان و یا ئانه‌ که‌ ئی هه‌رمانی یانه‌و کوردیش په‌نه‌ کاؤل مه‌بو. ئه‌ندا چه‌نی کریو یو ویش به‌ کورد بنیوره‌ و جه‌ راو کوردایه‌تیه‌نه‌ ئه‌نفال کریا بو و سه‌ریچش ؤه‌نه‌ نه‌شیؤیا بو،  هه‌ر پا سووک وئاسانیه‌ تیشه‌ دو ئۆ ڕیشه‌و ویش و مه‌دره‌سه‌کاشه‌نه‌ به‌ زؤانی ئه‌داییش بوانو و پا جوره‌ یانه‌و ویش بنیو ئێرۆ.

ئه‌ؤیس مه‌که‌روو یو فره‌ قووڵ بوؤه‌ تا په‌ی پانه‌یه‌  به‌روو که‌ بیه‌و پارتی جه‌ بادینانه‌نه‌ هوی سه‌ره‌کی ڕاس ئامای  ئی هه‌رمانی و ده‌یان هه‌رمانیته‌ری  بادینیانه‌. ئینه‌یچه‌ ئانه‌یه‌ مرمانو که‌ ئه‌گه‌ر هۆرامانیچ پارتییؤی  ده‌سه‌ڵاتداری خودیش بیێ ڕو هه‌رماناش نه‌یاؤی ڕو ئاروی.

سازمانی سیاسی ده‌سه‌ڵاتدار جه‌ مه‌نته‌قه‌و ئیمه‌نه‌ یه‌کیه‌تیا که‌ به‌ داخۆ سه‌روو مه‌سه‌لی تاریفا نه‌ته‌ؤه‌ی هه‌ڵای ئینا سه‌ره‌تاو سه‌ده‌ی ؤیه‌رده‌یه‌نه‌ و هه‌ر قه‌ؤانه‌و شوعاره‌ پویا و بی ئابروه‌کی یه‌ک نه‌ته‌ؤه‌ و یه‌ک زؤانوو موسولینی و ئاتا تورکی مدوؤه‌ ؤه‌نه‌. یه‌کیه‌تی ئی ئه‌نداموو سووسیال دیموکراسی ئورووپایه‌! به‌ مدرایش ؤه‌راؤه‌روو ئی مافه‌ ڕه‌ؤاو  مه‌ردموو هۆرامانیۆ گه‌ره‌کشا برمانو که‌ جه‌ هۆرامانی جیان و بیگانه‌ن به‌ هۆرامانی.

گردوو ئینیشایچه‌ جاریؤته‌ر ئا ڕاسیه‌ گوشزه‌د که‌راؤه‌ که‌ که‌س هه‌رمانه‌و که‌سی مه‌که‌رو و ئه‌ؤیسا که‌ گرد که‌س ؤیروو ویشه‌نه‌ بو و ویش هه‌رمانی  ویش که‌رو. ئانا پیسه‌ ڕوی روشنیچ به‌ر کۆت که‌ هه‌رێ سه‌روو تیکدای یه‌کیه‌تی کوردی و ؤیرانی یانه‌و کوردی و ... گرد هاؤاری بی بنه‌مێ بینی. ئارو ئا  ڕؤه‌نه‌  تا ئیمه‌یچ به‌ ڕا مه‌ریاییۆی فره‌ته‌رۆ و بی  خوف جه‌ چیؤه‌ گوتره‌یا گنمی شونه‌و به‌ ده‌س ئارده‌ی مافه‌کاما و پی جوره‌ ویما جه‌  تانه‌و ته‌شه‌روو مه‌ردموو ئاروی و نه‌ؤه‌کا سه‌ؤای پاریزنمی.

ئانا  هورچنیه‌ی کوردستانی ئینا ڕاؤه‌ با تا ئا رؤه‌  که‌ بیمی به‌ خاؤه‌نوو سازمانی سیاسی  ویما  به‌ که‌سانیؤی ده‌نگ ده‌یمی که‌ باؤه‌ڕشا به‌  مافه‌کا مروؤی هه‌ن و جه‌ چوارچیؤیؤی ئینسانی و دیموکراسیانه‌نه‌ چه‌نی مه‌ردموو هۆرامانی هۆرس و کۆت که‌را. مشیو ده‌نگ به‌ که‌سانیؤی ده‌یمی که‌ ڕوشن و ئاشکرا ددان منیا مافه‌کاماره‌ و جه‌ پاریزنای زؤان، فه‌رهه‌نگ و ژینگه‌که‌یمانه‌ یاردیما  مدا.

 

سیامه‌ند هۆرامی

2009-05-31