یانه‌ شېعرې پەی نێلسۆن ماندێلای

پەی نێلسۆن ماندێلای

**

تۆ

ئێننەو باڵاو ئەفریقای

ئازادیت ئارد و

سەرو گردوو دیلەکاو''جەحەنەمی''

بەش بەشت کەرد.  بەشوو وێت نەدریا .

تۆ، رەنگە غەریبەکەو ئەفریقایت

کەرد بە کارت پۆستاڵێوە پاپانوئێل،

پەی یەکەم جاری ،چەنی رەنگەکاوتەری

تێکەڵت کەرد و سڵشا نەکەرد!.

رەقەموو''27''ی بی بە نیشانێوە

پەی باڵگرتەی.

بی بە نیشانە عەترێوە ،وەش بۆی

وێش جە گردیانێوەنە هورسپارا و

 بی بە پەیکەروو ئاشتی.

تۆ تافوو''ئیگواسور''یت بڕی  1

وێت یاونا ، سەروخێشکوو ئازادی.

**

ئیسە من جە ئەفریقانە

پەی رەنگوو سیاوی گێڵوو

تاسەم کەردەن ،نیا ....نیا

گومیچم نەکردەن ،

زانوو وێچش نەشارانۆ.

زاوەڕوەکاو 'ئەفریقای'

کەردەن بە خەڵات ، پەی زاوەڕوەکاو 'هەڵەبجەی'

ئاشتی ، قەڵەمەکەش دادەسوو تۆوە

تا ، بە گردوو رەنگەکا بنویسی و

رەنگوو وێت ،خەڵاتوو ئازادی کەری .

تۆ لوای و

چەنی وێت پاییزو ''دێهلی''

و

هامنوو ''ژوهانسبۆرگی''ت

بەرد و

وێت یاونا لاپەڕە زەردەکاو ''تاریخی''.

*** 

بورهان ئەختەر – مەریوان 15/9/1392 کۆچی رۆجیاری

1-      تافێوەن جە وەڵاتوو برێزیلی.

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌