یانه‌ هه‌والې ویار و وه‌رچه‌مێ سه‌روو کۆنگره‌و ئه‌حمه‌د به‌گی کۆماسی

ویار و وه‌رچه‌مێ سه‌روو کۆنگره‌و ئه‌حمه‌د به‌گی کۆماسی

سوبحان ئه‌مینی

ئاخرش شۆنه‌و مانیای و هه‌وڵ و ته‌قه‌لێوه‌ فره‌یره‌ که‌ جه‌ لاو خه‌مه‌وه‌را و فه‌رهه‌نگ دۆساو شاروو مه‌ریوانیوه‌ دریا؛ جه‌ به‌ڕواروو 4 و 5 / 10 / 1393ی کۆچی ڕۆجیاری 

ئامیانوو به‌سته‌ی کۆنگره‌و ئه‌حمه‌د به‌گی کۆماسی گرسا و لوا ڕاوه‌. ئی کۆنگره‌ ده‌لاقه‌ و وه‌رچه‌مێوه‌ش که‌ردۆ په‌ی فره‌ته‌ر ئه‌شناسای ئه‌حمه‌د به‌گی و به‌رویره‌کاش. به‌ یاگێن ده‌س­ وه‌شی و بێ قه‌زاییه‌وه‌ فره‌ گه‌رم وچیۆ پا گرد دڵسۆزا که‌ دڵسۆزانه‌ و به‌ بێ جیاوازی کۆشیا په‌ی په‌ره‌ ئه‌سای و په‌ره‌ په‌نه‌ دای هه‌رمانه‌ فه‌رهه‌نگیه‌کا.

          

ئی یاده‌ هه‌م خاڵێ ئه‌رێنێ، هه‌م خاڵێ نه‌رێنێش بێنێ. به‌ یاگێن په‌ی نه‌ختته‌ر که‌رده‌ی و پوخته‌ته‌ر که‌رده‌ی هه‌رمانه‌ فه‌رهه‌نگیه‌کا، ئی چێوێ سووک و قورس و ته‌تڵه‌ و وێچن کریا تا په‌ی دماته‌ری هه‌رمانه‌کێ پوخته‌ته‌ر و بێ­عه‌یبته‌ر بلا ڕاوه‌. ئێمه‌ مه‌بۆ ته‌نیا هه‌رمانه‌ما تاریف دای یه‌کترینی بۆ و فارس واته‌نی به‌ به‌ و چه‌ چه‌ بۆ! پی جۆره‌ هیچ وه‌خت هیچما مه‌بۆ به‌ هیچ. هه‌ورامی ماچۆ: نیشاره‌ ئاشتی ئاشتی، مدا به‌ یۆترینی چاشتی!! من ئه‌جۆم ئی به‌زمه‌ ئێتر وه‌سێشا.

ئی یاده‌ هه‌رپاسه‌ که‌ سه‌رۆ ئه‌ناره‌م سه‌ر دا، باره‌وا و ده‌سکه‌وتی عالش ئانه‌ بێ، ده‌ڵاقه‌ و ته‌شابیه‌وه‌ش که‌ردۆ په‌ی فه‌رهه‌نگ­ دۆسا و ماشاڵاو ئه‌ده‌بی تا ئه‌حمه‌د به‌گ و به‌رویره‌کێش خاسته‌ر بشناسیا. هه‌رپاسه‌ ده‌ره‌تان و مه‌جالێش وه‌ش که‌رد تا دۆسه‌ ئه‌ده‌ب­­دۆس و فه‌رهه‌نگ­وازه‌کێ به‌ دیداروو یۆترینی شادێ باوه‌. یۆ جه‌ خاسی و تایبه‌تیه‌کاو هه‌ر هه‌مگێتانه‌ و پێوامه‌ و هه‌مامێوه‌ ئانه‌ن دۆسێ دیدار تازه‌ که‌راوه‌ و ویرا و ڕای تازه‌ فاڕ و گۆڕ که‌را.

ئی کۆنگره‌ که‌ جه‌ ماوه‌و یه‌ک ڕۆ و تاقێنه‌ جه‌ تاڵاره‌و ئیرشادوو شاروو مه‌ریوانینه‌ لوا ڕاوه‌‌، سات به‌ سات و چرکه‌ به‌ چرکه‌ سه‌ره‌نجم دا و ورد بیانێوه‌ سه‌رش. فره‌و چێواش یاگێ سه‌ره‌نجی بێنێ و مشۆم باسشا سه‌ر کریۆ. – گێره‌ واچا ده‌ی کاکه‌ به‌ تۆ چێش؟ – به‌ڵام من به‌ ئه‌رکش مزانوو ئی چێوا وزوو وه‌روو ده‌سوو ئا که‌سا که‌ دایم دڵشا په‌ی ڕه‌وتی فه‌رنگی مدۆ وه‌نه‌. ئا چێوێ ئینێ بێنێ:

  • به‌ بڕواو من و فره‌و ئا که‌سا که‌ چاگه‌ بێنێ، نامێ کۆنگره‌ی په‌ی ئا هه‌رمانێ که‌ به‌ چه‌م دیه‌ما و به‌ گۆش ئه‌ژنیه‌ما، فره‌ فره‌ قورسه‌ بێ؛ چوون کۆنگره‌ به‌ گرد بارێره‌ – یاگێ، مێمان، باری عێلمی، ده‌سه‌ی باڵا و ... - قه‌واره‌ش سه‌رته‌ر و به‌رزته‌را. ته‌نیا تاوی واچی چێوێ پێسه‌ کۆڕێ یا یادێوه‌ بێ، نه‌ک زیاته‌ر!!
  • باری عێلمی و ئاکادێمیش فره‌ وارۆ بێ و زانایی و زانشتێوه‌ تازه‌ش‌ پێشکه‌ش نه‌که‌رد.
  • ڕۆشنگه‌ری و په‌شت ڕاس که‌رده‌ی ئا چێوا که‌ به‌ هه‌ڵه‌ و دوور جه‌ ڕاسی جه‌ لاو بڕێ که‌ساوه‌ ئاراسته‌ کریه‌، جه‌ لاو ده‌سه‌ی باڵایۆ (هیئت علمی) پێشکه‌ش نه‌کریا. ته‌نیا کاک حه‌مه‌ ڕه‌شید ئه‌مینی جه‌ ئاخرۆ ئادیچ نه‌ک پێسه‌ ده‌سه‌ی باڵای، به‌ڵکوو پێسه‌ که‌سێ که‌ بابه‌تش پێشکه‌ش که‌رد، فره‌ که‌م ئیشارێوه‌ش که‌رد. ئی چێوه‌ دماته‌ر ورد شی کریۆوه‌.
  • به‌ داخه‌وه‌ هه‌رکه‌س جه‌ هه‌ر یاگێوه‌ ده‌قێ شێعره‌ش ده‌س که‌وتێ­بێ ته‌نیا وه‌روو ئانه‌ی ڕه‌نگ و بووێ‌ بدۆ به‌ باسه‌که‌یش، تاپۆش که‌رێ سه‌روو ئه‌حمه‌د به‌گی و که‌سیچ که‌کێ مێمانه‌ش نه‌بێ!! چوون ئانێ که‌ په‌ی به‌رده‌ ڕاو پانێله‌کا پێسه‌ ده‌سه‌ی باڵای هۆرچنیه‌ بێنێ شاره‌زاییه‌وه‌ چامنه‌شا سه‌روو ژیوای ئه‌حمه‌د به‌گی و شێوازوو ئه‌حمه‌د به‌گی و شاعێره‌ هام­چه‌رخه‌کاش نه‌بێ؛ په‌وچی ده‌مشا بێ ته‌ڵه‌ی ته‌قیا و ته‌نیا وه‌روو ئانه‌ی چێوێشا واته‌ بۆ، شنیێنێ وه‌نه‌و باسێوه‌ که‌ ته‌وه‌ن ترازیچ مه‌رام و وه‌رپێکوو باسه‌که‌ی نه‌پێکێنێ! ئه‌ڵبه‌ت ئادێ خه‌تاشا نه‌بێ؛ چوون وه‌ڵێنه‌ په‌نه‌شا نه‌وچیابێ و بابه‌ت و ده‌قه‌کێشا نه‌دریه‌ بێنێ ده‌سۆ تا تاوا سووک و قورسشا که‌را! تاخایت پانێلێوه‌شا که‌س نه‌لا سه‌ر و بڕێ جه‌ دۆسا ته‌نیا ڕوه‌نه‌ مه‌نێره‌ و وه‌روو ئاوه‌ڕوو نه‌شیه‌ی لوێ سه‌ر! یۆ چا نموونه‌ شێعرا که‌ فره‌ زاق و ناشیانه‌ تاپۆ کریا سه‌روو ئه‌حمه‌د به‌گی، شێعرێوه‌ بێ که‌ کاک ئه‌مین عه‌زیزی پێسه‌ پێشکه‌ش­کاروو ئه‌نجمه‌نی ئه‌ده‌بی مه‌ریوانی واناوه‌! ئی شێعرێ ئاسمان تا زه‌مین مافش نیا ئه‌حمه‌د به‌گیۆ‌ و هینه‌و مامۆسا بێسارانینه‌. - من دوێ جار نویسته‌م دا ده‌سوو وه‌رپه‌رساوه‌، به‌ڵام به‌ داخه‌وه‌ وستشا په‌شته‌و گۆشیشاره‌.- ئی شێعرێ دلێ هیچکام چا دیوانانه‌ که‌ تا ئیسه‌ چاپ کریه‌نێ، نیه‌نه‌. ئی شێعرێ به‌ ته‌مامی ئینا لا منۆ. به‌ چراغم به‌یان ....... ده‌س په‌نه‌ که‌رۆ و جه‌ ئاخریچۆ به‌ "فانی‎"‎ که‌ ئه‌شناسه‌ نامێ شێعریه‌و مامۆسا بێسارانینه‌ کۆتایش مێ. ده‌قوو شێعره‌کێ به‌ ته‌مامی ئینه‌ن:

چراغم به‌یان، چراغم به‌یان

واچه‌ به‌ به‌یان شه‌وێ با به‌یان

وه‌ نه‌هان به‌یان نه‌زانان حه‌یان

نه‌وا بێدار بان حه‌یان جه‌ به‌یان

حه‌یان حه‌ڵقه‌ دان جه‌ ده‌ورانی به‌ی

چوون عه‌سای که‌له‌م زه‌نه‌نده‌ی پڕ وه‌ی

هه‌ر شه‌و تا به‌یان مه‌ناڵوون چوون نه‌ی

یاران کێ دیه‌ن به‌ی نه‌ په‌نای حه‌ی؟

حه‌ی و به‌ی و نه‌ی ته‌سنیفه‌ن وه‌ هه‌م

حه‌یان خونچه‌ی به‌ی مه‌گرته‌ن نه‌ ده‌م

په‌نهان نه‌ سای حه‌ی، ده‌س کێشام په‌ی به‌ی

یا حه‌ی! ئه‌مین بام جه‌ وه‌زه‌ندی حه‌ی

حه‌ی مه‌پێچیان، شی نه‌ گه‌رده‌نم

ئه‌وسا من زانام واده‌ی مه‌رده‌نم

له‌رزام، ستێزام، نه‌ خۆفی ماران

حه‌ڵقه‌شان نه‌ ده‌ور حه‌ڵقی من ئاران

هه‌ی یاران جه‌ لای ئیجازه‌داران

ده‌وایه‌ په‌ی زام ماران پێم باران

نیم بۆیه‌ جه‌ عه‌تر زه‌ردی ئه‌و به‌یان

په‌ی گه‌سته‌ی حه‌یان په‌رێم باوه‌ران

بماڵان نه‌ جای زامی گه‌سته‌ی حه‌ی

خه‌لاس بام نه‌ ده‌ست ئاخ و داخ و وه‌ی

هه‌رکه‌س ئاره‌زووی باخچه‌ی به‌ی دارۆ

بێ­شک ئه‌رواحش وه‌ حه‌ی مه‌سپارۆ

چند که‌س وه‌ حه‌سره‌ت ئه‌و به‌یانه‌وه‌

داخ به‌رده‌ن وه‌ گڵ، سه‌ر نیانه‌وه‌

«فانی» تا زه‌ردی ڕه‌نگش چوون به‌ی بۆ

باڵای نه‌ی ئاساش ئه‌سپه‌رده‌ی حه‌ی بۆ                                 

  • فره‌و بابه‌ته‌ ده‌س­چن و ئه‌رێنه‌کریایه‌کا باری عێلمی ئارۆیانه‌شا نه‌بێ. به‌ واته‌و کاک مدریک که‌ریمی ته‌نیا چێوێ پێسه‌ ئینشای بێنێ! چێوی سه‌مه‌ره‌ ئانه‌ بێ فره‌و ساحیب بابه‌ته‌کا نه‌ ته‌نیا شاره‌زاییشا نه‌بێ سه‌روو شێعره‌و ئه‌حمه‌د به‌گی و شاعێره‌ هام چه‌رخه‌کاش، به‌ڵکوو ساکاریچ نه‌زانێنێ شێعره‌کاش واناوه‌ و پاسه‌ تێک و تارانێشا دێنێ، یۆ شێعره‌ش بێزیێ. خاڵانه‌و ئا کابرایه‌ ئاماوه‌ ویرم که‌ قورئانش وانابێوه‌! ماچۆ یۆ قورئانش وانابێوه‌ و مامۆسێوه‌ گۆشش چۆوه‌ بیه‌بێ. وه‌ختێ کابرا قورئانه‌که‌ی ته‌مامنۆ، مامۆسا په‌نه‌ش ماچۆ: «پا قورئانه‌ وانانم، هه‌رچی خودای فه‌رماوا بێ، تۆ نه‌فه‌رماوا!!»
  • هیچ سووچ و کونج و که‌له‌به‌رێوه‌ تاریک جه‌ ژیوای ئه‌حمه‌د به‌گی و به‌رویره‌کاش به‌ پته‌وی ڕۆشن نه‌کریاوه‌. فارس واته‌نی: «گرد حه‌دس و گومان بی
  • به‌ داخه‌وه‌ ئا زوانه‌ که‌ ئه‌حمه‌د به‌گ و مه‌وله‌وی و خانا و سه‌دها گه‌وره‌ پیه‌ چامنێش یاونێ په‌نه‌ و گه‌ورێش که‌ردێ- جه‌ باڕۆڵی (به‌هلوولی ماهی)، بابا سه‌رهه‌نگی دۆدانی، بابا شاخۆشینی، باواناوسی سه‌رگه‌تی، شێخ شه‌هابی و کێ و کێ، گرته‌ تا یاوۆ ئه‌حمه‌د به‌گ - پێسه‌ هه‌میشه‌ی هه‌تیم و بێ­که‌س بێ و بێ­که‌س کوش کریا. چی کونگره‌نه‌ ئی زوانه‌ ته‌نیا بی به‌ ئامیان و ده‌ره‌تانێوه‌ په‌ی دووباره‌ و چند باره‌ ئه‌ژنیه‌ی بڕێ واته‌ و واتیله‌ ئه‌جنه‌بیا - ئیسم ... ئیسم - که‌ چند ساڵێوه‌ن بێنێ قسێ سه‌روو زوانوو جه‌ماعه‌تێ و پۆزێ ڕۆشنفکریشا پۆوه‌ مدا! ئی زوانه‌ لا ئا برا به‌ نامێ ڕۆشن­ویراوه‌، به‌ تایبه‌ برا مه‌ریوانیه‌کێ که‌ گرد ئه‌جێ یه‌ک سه‌رچه‌مه‌نه‌ ئاویشا واردێنه‌ و به‌ یه‌ک گوان گۆچێ کریه‌نێ و به‌ یه‌ک هه‌سان ددانێشا تێژێ کریه‌نێوه‌ و به‌ یه‌ک ده‌سماڵ چه‌مێ هه‌قێقه‌تیشا بینیه‌نێ، پاچیاره‌! ئی زوانه‌ که‌ عه‌لی ئه‌کبه‌ری دێهخودا جه‌ عه‌ره‌بی و فه‌رانسه‌ی به‌ که‌مته‌رش مه‌زانۆ و که‌سانێ پێسه‌ مه‌کێنزی سه‌رش منویسا، که‌ردشا تۆپه‌و تۆپقاڕنێ و نه‌ به‌ لازوان ئاستشا نه‌ به‌ وه‌چه‌زوان؛ پانه‌یچ تێرشا نه‌وارد و که‌ردشا مڵکوو ئێد و ئه‌وی!! ویرم مه‌شۆوه‌، ئینه‌ فه‌رمایشوو کاک ئه‌نوه‌ر ڕۆشنی بێ: زاراوه‌ی هه‌ورامی! ببوورن زاراوه‌ی گۆرانی!! کاک ئه‌نوه‌ر جه‌ ڕاسینه‌ غه‌ڵه‌تێوه‌ش به‌ غه‌ڵه‌ت، غه‌ڵته‌ته‌ر که‌رد و ئینه‌ ده‌رده‌نه‌ و تا جه‌ حه‌نداو یۆترینینه‌ پێسنێ بیمێ هیچما مه‌بۆ به‌ هیچ؛ هه‌رپاسه‌ که‌ تا ئیسه‌ نه‌بیه‌ن!! کاک ئه‌نوه‌ر! من مه‌زانوو جه‌نابت و ڕه‌فێقه‌کێت جه‌ کام دانشگای متمانه‌ په‌نه‌ کریاو ئورووپای یا ئه‌مریکاینه‌ زوانشناسیتا وانان که‌ پاسه‌ مه‌یدێ به‌ مه‌یلوو وێتا بڕدێ و ورازدێ؟ ئایا ئێتر ئی بڕیاره‌ سیاسیێ وه‌سێ نیه‌نێ؟ حه‌کایه‌ته‌که‌و گالیله‌یا که‌ واچێ زه‌مین خولیای خولیۆه‌ و ئاردشا پۆ برجه‌کێوه‌ وزاشه‌ره‌. جه‌ جوابشانه‌ واتش: «با هه‌ر وزدێمره‌، به‌ کوشته‌ی من زه‌مین جه‌ گه‌رد و خولوو وێش مه‌گنۆ!!» ئیسه‌یچ با سه‌د ئانده‌ چه‌مێ ئینکاری په‌ی ئی زوانیه‌ تێژێ باوه‌ و با گردیچما ڕاشه‌نه‌ فه‌وتندێ، به‌ڵام به‌ گرد پیمانێوه‌ عێلمی زوانشناسی، نه‌ک هه‌ڕه‌مه‌کی و ئێحساسی، هه‌ورامی زوانا و زوانا و زوانا و ....»

مه‌زانوو به‌ چێش چڕووت وه‌نه‌؟ کاکه‌، برا، ڕه‌فێق که‌ تۆ خه‌ریکا وێت چینیشا ڕنای ڕنیره‌؛ به‌ڵام برای ئازیزم! که‌ی خودا هۆرگێرۆ زوانێ که‌ هه‌زار و چوارسه‌د ساڵێن به‌ڵگه‌ شێعرش هه‌ن (هورمزگان) و هه‌رپاسه‌ که‌ سه‌رۆ واتم جه‌ بارۆڵی گرته‌ تا یاوۆ ئه‌حمه‌د به‌گ و مه‌وله‌وی ئینێشه‌ گرد یاونێ با په‌نه‌، که‌ی ڕه‌وان تۆ پاسه‌ پاچیشه‌ره‌! هه‌ورامی واته‌نی: تۆ کام گێجه‌ڵووکه‌و ڕۆزگاری ئارده‌نی لکنانیش پاڵوو گۆشیمه‌ره‌ و پێسه‌ که‌ری؟

کاکه‌ گیان! پی­جۆره‌ مامه‌ڵه‌ که‌رده‌ی چه‌نی زوان درۆس نیا. به‌ش قسه‌کاو مامۆسا ئاسۆی بۆکانی چڵاکنێ بیدێره‌!! به‌ خودا ئانه‌ی مه‌شۆ! مه‌سه‌لێ فره‌ زوانی جه‌ بڕێ وه‌ڵاتانه‌ پێسه‌نه‌ تێخی دوه‌ ده‌مه‌ی. ئه‌گه‌ر تێخێوه‌ دوه‌ ده‌مه‌ی فره‌ تێژ - تێژته‌ر جه‌ کافرمانی - ده‌ی ده‌سوو ئینسانی ژیری و ئاوه‌زداریوه‌، نه‌ ته‌نیا کۆڵ و کولش مه‌که‌رۆ، به‌ڵکوو هه‌رمانه‌و وێش په‌نه‌ش به‌رۆ ڕاوه‌‌ و زه‌ره‌ریچ مه‌یاونۆ لا که‌سی. به‌ڵام ئه‌گه‌ر کاردێوه‌ کوله‌ی ده‌مه‌ کۆڵه‌ی نوێریه‌وه‌ ده‌ی ده‌سوو ئینسانی‌ بێ­ئاوه‌زیوه‌، لانی­که‌م ئه‌گه‌ر نه‌که‌رۆش له‌مه‌و وێشه‌ره‌، له‌مه‌و یۆته‌ریش په‌نه‌ دڕۆ!! غه‌ڵه‌ت مامه‌ڵه‌ که‌رده‌ی چه‌نی زوانی، ئێتر کارده‌ کولێ نیه‌نه‌؛ به‌ڵکوو تێخی دوه‌ ده‌مه‌ی تێژته‌ر جه‌ کافرمانیا که‌ به‌ هه‌ر بارێره‌ شانیش ڕه‌گ و ڕیشه‌ بڕۆ و زه‌ره‌ر مدۆ!! ئه‌گه‌ر ئارۆ گردوو هێزیت په‌ی فه‌وتنای و تاونایۆ من به‌ کار ماری، سه‌وای نۆبه‌و که‌لهۆڕی یاوۆ، پێرێ نۆبه‌و شه‌کاکی، په‌روه‌نێ به‌رزانی، په‌روه‌نسه‌رێ فڵان و فیساری، به‌ڵام هه‌ورامی واته‌نی پا هه‌سیه‌ مه‌وه‌ریش و ئاخرش نه‌چیروو وێت په‌یت پێدا بۆ! ئه‌ڵبه‌ت گێره‌ خه‌تاو تۆ نه‌بۆ، به‌ڵکوو ویرچه‌مێوه‌ شوینیستی که‌ تۆش پاسه‌ په‌روه‌رده‌ که‌رده‌نی ئینه‌ زات و فه‌لسه‌فه‌شا! به‌ داخه‌وه‌ ئی مه‌رام و ویرچه‌مێ کاژ وسته‌ی و فه‌ڕیایشا فره‌ سته‌ما!!

چه‌مه‌ گیان! ئیسه‌ که‌ تۆ پێسه‌ ئه‌سپت زینی که‌رده‌ن په‌ی تاونایۆ ئێد و ئه‌وی، ئاخر کۆگه‌و به‌شه‌ریه‌تی قه‌رزارتا؟ زانشت (عێلم)، فه‌لسه‌فه‌، تکنۆلۆژی، تارێخ، ئه‌ده‌بیات؟ کامشا؟ ئاخر به‌رزوازی و وێ به‌ زل زانای و فارس واته‌نی عه‌زه‌مه‌ت ته‌ڵه‌بیت وه‌روو چێشیا؟ کام شاکاری ئه‌ده‌بی و عێلمی دنیه‌ به‌ زوانوو تۆ نویسیان تا ئیسه‌ مل­که‌چوو تۆ بوو؟ به‌ گیانوو تۆ ئه‌گه‌ر ئیسه‌یچ زوانه‌ بێ که‌سه‌که‌و من نه‌بۆ په‌ڕۆت که‌رۆ، هیچت نیا په‌ی واته‌ی! تاخایت مه‌تاوی زیاته‌ر جه‌ دوه‌سه‌د ساڵا بیه‌ی وێت سه‌له‌منی! سه‌رێ ده‌ مێژووی وێژه‌ی کورد نویسته‌ی سدێق بۆره‌که‌یی تا نه‌ختێ چه‌مێت کریاوه‌!

یۆته‌ر جه‌ چێوه‌ زاق و ناشیرنه‌کاو ئی خاڵێ ئانه‌ بێ، براده‌رێوه‌ دلێ بابه‌ته‌که‌یشه‌نه‌ سووکه‌ ئیشارێوه‌ش که‌رد سه‌روو ڕه‌سه‌ن بیه‌ی زوانی هه‌ورامی و پارێزنایش جه‌ لاو شاعێره‌ هه‌ورامیه‌کاوه‌. - شه‌للا ڕه‌سه‌نێ نه‌بیه‌نمێ؛ چوون هه‌رچی نه‌گبه‌تی ڕۆزگاری ئامان ملماره‌، گرد بۆنه‌و ڕه‌سه‌ن بیه‌یماوه‌ بیه‌ن! - تا ئیسه‌ کێ دیه‌نش ته‌وه‌نی شانا ویکۆڵی خوێڕی قه‌راخوو ده‌ره‌یره‌؟ ئا براده‌ره‌ که‌ وه‌رپه‌رسوو پانێله‌که‌ی بێ پێسه‌ تیره‌ ماڵی جه‌رگشه‌ره‌، شۆنه‌و باسێوه‌ فره‌یره‌ ئنده‌ ناشیرین چێوه‌که‌ش وه‌رپه‌رچ داوه‌، کاک مدریکش ئاوردۆ ده‌نگێ و په‌شتگیریه‌وه‌ فره‌ خاسش که‌رد جه‌ زوانی هه‌ورامی!! با باسوو ئانه‌ی نه‌که‌روو که‌ دماوه‌ چند هه‌ڕشێ کریه‌ سه‌روو کاک مدریکی.

       دما واته‌و ئی خاڵێ ئانه‌ن؛ چه‌مه‌که‌م! کاکه‌ گیان! من چه‌نی ئانه‌ی ناکۆکیم نیا که‌ تۆ زوانه‌که‌یت نه‌پارێزنی یا په‌ره‌ش نه‌ده‌ی په‌نه‌ - گێره‌ یاردیچت ده‌و، هه‌رپاسه‌ که‌ تا ئیسه‌ یاردیده‌رت بیه‌نا – یا زوانی ڕه‌سمی نه‌بۆ؛ تۆ حه‌زت وازۆ گردوو واته‌ و واتیله‌کاش به‌ ئاوه‌و تڵای بنویسه‌، به‌ڵام گرد که‌سی په‌ناو وێته‌نه‌ قوربانی مه‌که‌ره‌! ئه‌گه‌ر تۆ وێت به‌ کورد منیه‌یره‌، من وێم به‌ بنه‌ڕه‌توو کوردی منیه‌وره‌!! ئه‌گه‌ر چی بارۆ بنویسوو، چند ده‌فته‌رێ به‌ش مه‌که‌را، به‌ڵام چینه‌ی زیاته‌ر سه‌رش مه‌لوو .....

  • زوان هیچ، گۆرانیێ و سیاوچه‌مانه‌یچ هه‌تیم بێ! هۆره‌ کریاوه‌ سه‌ر، مووسیقیه‌ی لۆڕیه‌ و خوراسانیه‌ کریاوه‌ سه‌ر ... به‌ڵام هه‌واڵ جه‌ سیاوچه‌مانه‌ی و ورده‌ به‌زمی نه‌بی؛ تاخایت دلێ فیلمه‌که‌یچه‌نه‌! به‌ یه‌ک­ڕه‌نگی خودای قه‌سه‌م ئه‌گه‌ر ئه‌حمه‌د به‌گ دڵ و ڕۆح و گیانش به‌ قاسپه‌و ژه‌ره‌ژا و نه‌واو سیاوچه‌مانه‌ی و کنا له‌یلی زاخاوه‌ نه‌دریایه‌؛ هه‌جگیزا و هه‌جگیز نه‌تاوێ شاکاروو «گڵکۆی تازه‌ی له‌یلی» که‌ ئیسه‌ بیه‌ن به‌ڵگه‌و شانازی، خولۆقنۆ!! برای ئازیزم! قه‌دیمی ڕاسش فه‌رماوان: دوور و دۆس؛ به‌ڵام به‌ خودای گه‌وره‌ قه‌سه‌م ئه‌گه‌ر کابرێوه‌ ئێسپانیوولی ئامایه‌ و به‌ زوانی ئێسپانیوولی گۆرانیێش واتایه‌نێ گێره‌ خه‌ڵکه‌که‌ هه‌ر ئانده‌ حاڵی بیایه‌ که‌ جه‌ کابرای گۆرانی واچی خوراسانی (قووچانی) حاڵی بی!! شنه‌و خوراسانی زرێباره‌ش پێکناوه‌ و جه‌ حه‌مرینی ویه‌رد، به‌ڵام هه‌واڵ جه‌ شاهۆی و کۆساڵانی نه‌بی!! من مه‌زانوو چی؟ به‌ش تۆ بزانی و واچیما په‌نه‌! هه‌ورامی ماچۆ: په‌ژموو وێش مدۆ نیمه‌رێسی، به‌ڵام وێش کوڵک و موو په‌ی خه‌ڵکی ڕێسۆ! کاکه‌ په‌ژموو وێت مه‌ده‌ نیمه‌رێسی!
  • مه‌حاڵوو کۆماسی کریا به‌ چند به‌شێ و هیچ مافێوه‌ ئه‌حمه‌د به‌گیشا پۆ هه‌ورامانیۆ ناست! کاکه‌ ئادیچ پێشکه‌شت!!
  • ئه‌گه‌ر یۆ نابه‌ڵه‌د تازه‌ ئامایه‌ دلێ تالاره‌کێ، هیچ وه‌خت نه‌زانێ ئینه‌ کۆڕه‌و ئه‌حمه‌د به‌گینه‌، به‌ڵکوو ئه‌جێش ئی یاده‌ یا په‌ی «نالی»ن یا په‌ی «مه‌حوی»ن یا په‌ی شاعێرێوه‌ ئه‌ڕا زوانیا؛ چوون دوه‌ موجریه‌ وه‌شه‌ویسه‌که‌ شه‌ڕه‌ شێعروو ئی که‌سا که‌رێنێ. ئه‌ڵبه‌ت گێره‌ دوێ ده‌قێ شێعرێ ئه‌حمه‌د به‌گی وانیه ‌باوه‌، به‌ڵام په‌ی ئه‌حمه‌د به‌گی و کۆڕه‌کێش هه‌ر هیچ نه‌بێ.
  • فره‌ توولش نه‌ده‌یمێ په‌نه‌؛ کاکه‌ گیان! ئه‌گه‌ر تۆ ته‌شکت مێ وه‌نه‌ ددان بنیه‌ی زوانه‌که‌و ئه‌حمه‌د به‌گیره‌، ئه‌ی ئه‌حمه‌د به‌گی هاڵی و په‌تی ده‌رده‌و چێشیت وه‌رۆ؟! گیرام ئادیچ نه‌بی!
  •  
  • سوبحان ئه‌مینی 10 / 10 / 1393

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌