Hawraman

خېر بەیدې پەی هۆرامانی

  • Increase font size
  • Default font size
  • Decrease font size
یانه‌ رؤچنه سەرو زۉانی هۆرامی

سەرو زۉانی هۆرامی

E-mail Print PDF

جە ڕېکۉزیاو پارېزەرا زۉانی هۆرامیۆ 

                                        

پەی پارلمانو کوردسانی

سەرو زۉانی هۆرامی
١ـ٤ـ٢٠١٥

چەنی ڕېز و سڵامی
ئانارە باسو پرؤژە یاساو زۉانیتا ۉسەنەناۉە مېدیا. پا جؤرە کە ئېمە یاۉێنمېنە باسەکا، مەبەستو شمە زۉانە ناکوردیەکې، پېسە ترکمانی و ئاسوریەنې. ئېمە چەنی پیرؤز بایی ۉاتەی پا پېک ئامایا، ئی پەرسېچما لاۉە تازې بیېنێ کە داخؤ پارلمانو کوردستانی، ئېمە و زۉانەکەیما بە چېش منؤرە؟ تا کەی گەرەکشا پا بە پاو باقی ئؤرگانەکاتەرو دەسەڵاتی کوردی، سیاسەتو بایکؤت و کارشکەنی جە راو ژیۉای زۉانی هۆرامیەنە بەرؤ راۉە؟

باسو زۉانو ئېمە پېسە بەشېۉ جە مەردمو کوردی کە دېر زەمانېۉا ئینا دلېنە، باسېۉی ئینسانی و دیمؤکراتیکا و ڕؤ بە رؤ پەرەش ئەسان و بەرجەستەتەر بیەنۆ.

چەنی ئینەیچە جە هەل و مەرجو  ئارؤ مەنتەقەو ئېمەنە کە دیمؤکراسی و پرنسیبەکېش بە ئاشکرا و سەخت کۆتېنې ۉەرو پەلامارا دماکۆتەیی، پەشت هؤر کەردەی ئۆ مافېۉی سەرەتایی و دیمؤکراتیکی چیمنە، بە پاو گرد پیمانېۉی دیمؤکراتیانەی سیاسەتېۉی نا کارا و نادرؤسا. دیمؤکراسی جە پەرەدای و جە بە کار بەردەیشەنە رېخې بەرؤرە و باڵا کەرؤ.

جا پۆکەی ئېمە جارېۉتەریچ داۉا کەرمې تا پارلمانو کوردسانی، پېسە ئورگانېۉی مەردمی، چی ڕانە ئەرکو وېش بە یاگې بارؤ و یاگې بدؤ بە زۉانو مەردمو هۆرامانی تا ڕاو مەدرەسە و میدیایش پەی کریؤرە و ئەرکو ئەۉە ئاستەیش تەنیا سەرو شانا تاکەکاشۆ نەمەنؤۉە.

ئینە چەنی ئانەیە کە جوابېۉی درؤس بە مافېۉی سەرەکی و بنەڕەتی مەردمیا و بە یاگە ئاردەیش هەرەکەتېۉی ئینسانی و دیمؤکراتیک، دڵ گەرمیېۉ مارؤ شؤنیەرە کە شؤنەمای نزیکەش کەرؤ بە پتەوتەر کەردەی یەک رېزی دلې یانەو کوردی، کە کورد چی وەختانە جە گرد وەختېۉی فرەتەر نیازش پەنەشا.

هەمېد کەرمې کە پارلمانو کوردسانی بە هەرمانېۉەی چی ڕاسانە بە ئەرکو تارېخی وېش هؤرزؤ. تکا کەرمې کە تا دېر نەبیەن چەمېۉی ئارؤیانە خشنؤ سیاسەتو زۉانەۉانیەرە.

ئېمە وېما بە بەشېۉی ڕەسەن جە کوردی مزانمې و سەیەو ئی پەیلۉایمانە هەن کە داۉاو بە یاگە ئامای مافە زۉانیەکا وېما کەرمې، درؤس هەر پاسە کە پەی سؤران و بادینانی فەراهەمې بیېنې. جا ئەر شمە ئینەیە بە درؤس مەزاندې و یاگې ئېمە جیا جە کوردی منیەیدېرە دەی ئا وەختیچ هەر پېسە ئینسانی مافو وېمانە کە زۉانەکەما جە کوردسانەنە بە فەرمی بژناسیؤ و ڕاو بەرکۆتەی جە میدیا و مەدرەساش پەی کریؤۉە.
چەنی رېزیما.

ڕېکۉزیاو پارېزەرا زۉانی هۆرامی

١ـ٤ـ٢٠١٥

رونۉیس پەی꞉

١ـ سەرۆکایەتی هەرېمو کوردسانی

٢ـ حکومەتو هەرېمو کوردسانی

٣ـ یەکیەتی نیشتمانی کوردسانی

٤ـ پارتو دیموکراتو کوردسانی

٥ـ بزوتنەۉەو گؤرانی

٦ـ سازمانو یؤنسکؤی
٧ـ شؤراو ئوروپای پەی زۉانە کەمینەک

 

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 
Last Updated on Saturday, 04 April 2015 19:29