یانه‌ رؤچنه چەشمەکې ناسییؤنالیزمی

چەشمەکې ناسییؤنالیزمی

ئاکو مارانی

١١و ئایارو ٢٠١٥

ئا کەسی کە بە زوردارەکی هۆرامی کەرا بە زاراوە [دیالێکت] و ماچا "هۆرامی یون چە بنەزاراوە کوردییەکا"، یا ماچا بنەزاراوە [سەب-دیالێکت] "هۆرامی بەشێوا چە ماچوی و ماچو بەشیو چە گۆرانی و گۆرانیش یون چە زاراوە کوردییەکا، مەگەر هەر تەنیا ویشا بیاوانە ئا زوانە تڕکەڵەکییە. ئاخر مەگەر تڕکەڵەکو ویناکەردەو بومەلەرزەی لاو ئایینەکاوە ئیندەو تڕکەڵکەو زاراوە و بنەزاراوەکەردەی زوانی هۆرامی بە خاترو ناسیونالیزمی ئاوەزنەگیر بو.

-  ئایا زوانیو بەنامو زوانی کوردی بییەیش هەن، چە کەیۆ و کامەنە ؟

-  بە کامە بنەمای زوانی و پیوەری زوانناسی و بەڵگەی ئاوەزگیر هۆرامی زاراوە ، بنەزوان یا بن-بنەزوانا ؟

- ئەگەر کوردی زوان بو، "گۆران" زاراوە بو، "ماچو" بنەزاراوە بو، هۆرامی بنە بنەزاراوە بو، ئەی شێوە قسەکەردەو تەویڵی و نۆسودی و هۆرامانو تەختی چیشا ؟

ئایا ئا پارتیی [حزبی] و کەسی، کە پاگەندەو ئا تڕکەڵەکە ناسیونالیستییەیە کەرا، متاوا پێ ئیمەی نەزانیش ڕوشنکەراوە و سەلەمناش، کە بە ژڵیویای قلیچکەو (گاوە شیتەکی)* بومەلەزەو کینەدوزی دروسمەبو و زوانە کوردییەکەو ئادیشا سەرو پایشۆ مەنووە ؟

بەپیچەوانەو پەیلواو ئادیشاوە، ناسیونالیزم بیجگە ئانەیە ویروکیوی ئایدیۆلۆجیا و کەتوارەنە "ناسیۆن" بییەیش نییا، چە کەتوارو ئارویەنە بە ئاشکرا بەرکۆتەن، کە بکوژو ڕوشنویری و پیشەلکەرو مافو تاکی  و ویرانگەرو زوانی و کولتووریا. چی بارۆ با پیوەرە سەرنجو ئی نموونە زیندەیە دەیمی؛ ئەگەر وڵاتو ئاڵمانیای بیشکو ناسیونالیزمی نەبییەبو، بەدڵنیاییۆ پەیمانگەو پنەیاونای ویری ناسیونالیستی بییەن و تاوانش تا لوتکەو شۆڤێنیزمی و فاشیزمی بەروش و یەرە سەد ساڵی زیاتەرا کە زوانی ستانداردش هەن و زاراویوش سەپنان سەرو قسەکەرا زاراوەکا تەرییەنە، کەچی ئینە چند ساڵین سەری ناسیونالیستانەشا مدو تەوەنەکا کەتواری و دیشا کە چنی فوتیای هەر زاراویوی بازنیوی کولتووری فۆتیو و کولتوورشا هەژارتەر بو؛ دوی ساڵی چێوەڵتەر ناچاری بیینی زاراوەو شارو (کٶڵن)ی چە فۆتیای ڕزگارکەرا و چە فیرگەی باڵای گەلیی (Volkshochschule) کورسی تایبەت پێ وەنەیش و پاریزنایش بنیارە، هەر پاسە چواردە ڕوی چێوەڵتەر دەسەڵاتداریی هەرێمو (شلێسویگ-هۆڵشتاین) ناچار بی دوی زاراوی پلات دۆیچ (Plattdeutsch) و فرییسیش (Friesisch)ی کەرو بە زوانی فەرمی کارگیریی و چە فۆتیای پاریزنووشا. http://www.n-tv.de/…/Schleswig-Holstein-will-Dialekte-als-A…

ئایا ناسیونالیستە کوردەکی [بەتایبەت شونکۆتە هۆرامییەکیشا] بەتەمانی چیش وزا سەرو خەرمانو ناسیومالیزمی، کە بیجگە شۆڤێنیزم و فاشیزمو دەسەڵاتی [دۆڵەتی] هیچی تەرش بەرهەمناردەن و نمارو ؟؟؟؟؟؟؟؟؟؟؟؟؟؟؟؟؟؟؟؟؟؟

*******************
هەر هۆرامیزوانی و هەر کەسی تەر گەرەکشا چی بارۆ دڵنیابو، فەرماوە ئینە لینکو ئا هەواڵەیەکە ڕو ٢٨و ئەپڕیلو ٢٠١٥ وەڵابیۆ. http://www.n-tv.de/…/Schleswig-Holstein-will-Dialekte-als-A…

سه‌رنجې

  • 1) سه‌رنامه‌ش نیا

    Author: ئومید

    سلام په ی تو سایته کیت فره وه شه نه ده ست وه شبو ایسه بلاگفا قه تا بلام ئاماوه عازانه و کاری دلی په ی وه نده کام نه من یه و ره سایته کیت په نه م وه شا توچ وبلاگه کی من بن یه ی ره ده ست وه ش

سه‌رنجېوی تازه‌ بنیه‌ره‌‌