یانه‌ رؤچنه ئەلف و بې

ئەلف و بې

جیاۋازی (ی) پەیوەندی و (ی) جەمی/کوی و (ی) گولانەکەردەی و پیشنیاریۋە زۋانیارا هۆرامانی

ئاکو مارانی

٣ جونو ٢٠١٥

پیسە مزانمی، گرد زۋانیو تایبەتمەندی ویش هەن و ئا تایبەتمەندییە چە فرەو پیئاکامو بەشەکا ڕستەسازییەنە بەرگنو و ئاسانکاریی پێ ئەنەیاۋای دروسکەرو.  هەر پاسە کاتیۋ کە زۋان گنو سەرو کاخەزی، ئیتر ناچار مشیو ئا تایبەتمەندیی و جیاوازیی هیماسازی کریا و ئاسانکاری پێ ئەنەیاۋای وەنەری کریو، ئەگینا وەنەر پیسەو تومارگەریۋی کە [پیلەکیش] باتریەکیش لاۋازی بییبا، واژەکا دووبارەکەروۋە و ۋەرو و دما کەرو، تاوەکو دەسەواژیۋە یا پەرەگرافیۋ بە دروسی بوانوۋە.

بە پەیلۋاو یو جا تایبەتمەندییا، جیاۋازی دەنگو (ی) چە واژەکانە کاتیۋ کە یاگو واژەکی یا باری ڕازۋانی واژەکی فاڕیو، پێ نموونەی چە دمایی نامی جەمی و دمایی جانامی و نامی گولانەکرێینە. جی بارۆ من هۆڵمڎەو چند نموونیۋ ۋزو ۋەرو چەماو شمەی ئازیزی و پیشنیاریۋە پێ هیماسازی ئا جیاۋازییە ۋزو ۋەرو دەسو زۋانیارا هۆرامانی.

یەکەم: (ی) پەیوەندای/ نصب / GENITIVE

کابرای ئێرانی

Kabray êranî

ئاکو مارانی

Aku Maranî

خەڵکو بیسارانی

Xellku Bîsaranî

کابرای ژەنانی

Kabray jenanî

دەنگی نیرانی

Dengî nîranî

********

دووەم: (ی) جەمی / جمعی / plural

کناچڵە گولانی

Knaçlle gulanỵ

وردڵی مەچەکی

Wirdllỵ Meçekî

گورەۋی ژەنانی

Gurevî jenanỵ

****

یەرەم: (ی) گولانەکەردەی / تصغیر

کناچڵی هۆرامییە

Knaçllỵ horamîye

ژەنیۋە وەشڵی

Jenîwe weşllỵ

یانەو مەتیلی

Yanew metîlỵ

ئەگەر بە دروسی گوشیگیرمی و سەرنجدەیمی و واژەکا ۋاچمی، بە دروسی و  بە ئاشکرا جیاۋازی دەنگەکاما پێ بەرگنو و نەۋاتەی و نەنۋیستەیشا زۋان شیۋنو و پرۆسێسو سۆرانیکەردەو زۋانی هۆرامی هەر پیسەو پرۆسێسو تەعریبکەردەی و فارسیکەردەی و تورکیکەردەی یاگو ویشگیرو.

هەرچندە من ۋەڵتەر چە ئامادەکەردەو کیبوردەکی هۆرامییەنە هیماو (ﯤ) بەکاربەرینە و پەشتیم بە ئەرەۋەستەی و چەقای دەنگو (ی)کی چە دمایی واژەکینە پیسەو دەنگو (ه- کەسرەداری) بەستەن، بەڵام دماو گیڵێۋی فرەی یاۋانا پی پەیلۋایە، کە پێ نۋیستەی و جیاۋازیکەردەیش چنی دەنگو (ی) ئاسایی، هیماو (ــــۍ ، ۍ) کە چوکڵیۋی گولانە نا دماییشەنە، گونجیاتەر و وەشڵانەتەر و ئاسانتەرەنە هەم پێ جیاکەردەی و هەم پێ نۋیستەی.

ئومیدوارەنا هامکارە زۋانیارە ئازیزەکی هۆرامانی بە وردی سەرنجو ئی جیاۋازییە دا و بە خەموەری و پەیگیرییۆ سەرو ئی بابەتییە هەرمانە کەرا و ئی گرفتەیە چارەسەرکەرا. چی بارۆ من ئامادەو گرد جورە هەمکاری و ئەرەنیشتەی و  جەمۆبییۋی ئینتەرنێتییەنا، کە هەر یاگیۋو دنیایەنە بیمی، بە ئاسانی متاۋمی هەفتیۋ یا مانگیۋ جاریۋ ئەرەنیشتیۋی تایبەت بە پەرسو زۋانی و چارەسەری زۋانەۋانی کەرمی. هەر چی بارۆ [بوارو تەکنیکی]  پێ ئاسانکاریکەردەی ئامادەنا هامکاری و ئاسانکاریی کەروو.

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌