یانه‌ شېعرې سیامەند هۆرامی راو مەدرەسەیەنە ـ بې موزیک

راو مەدرەسەیەنە ـ بې موزیک

Download Embed Embed this video on your site

ڕاو مەدرەسەیەنە

ساعبانېۉ چەنی یەکەم تیجیاری

ڕاو مەدرەسەیەنە و ڕاکې نساری

وەرم ئالوسینو نەوتەی شەۉانەی

سەر چون پورە هەنگ داخا زەمانەی

یاۉانې ئۆ لا باسو شەماڵی

چەنی شۆبوەو زیێ قەد پاڵی

شەماڵ وېش ئاسا بە نەرم و نیان

پی جؤرە پەرسې ئارېنە میان

تؤ کە شؤرەتو ناسکی پەلات

سەر کەردەن لۉان ۉەڵاتە و وەڵات

چون تاۉات پی گرد شیرین خاڵاۉە

سەرە بەر کەری دەسو تاڵاۉە 

سەنگی بار خاک قورسی بار سەنگ

تاری یاگەی تار تەنگی یاگەی تەنگ

سەردی تەۉەنې بې دەنگی خاکی

خؤتەو تاریکی ولەو نمناکی....

شەوبؤ جواب دېۉە بەیانش سەختا

ئانە تؤ ماچیش بە یاگە و وەختا

دیارا هیچ زایېۉ بې دەرد مەبؤنە

هەر هەنگامېۉە رەنجېۉ بەرؤنە

سەردی و کزەی هار سەختی و سەنگی بار

هەۉای توش و دەم کپ و و یاگەی تار

ئەر بەیاگە و وەخت بزیانە دیار

کریؤ دەسبار دا و سوک کەرانې بار

پەیشا هەن گېڵا دیمو خاسیەرە

ڕانمێ ڕێ با بارو ڕاسیەرە

خاک و تەۉەنیچ زۉانو وېشا هەن

داراو باریەنې و تان و پؤشا هەن

سەردا و گەرمای رېک نەرم و بە میزان

یاۉەرو تؤمیا تا ۉەزؤنە ژیان  

بە هەر ڕو ڕاو من سەخت دژوارە بې
تا جارېۉ بارە سەد بار لارە بې

ئامېتې داما و ماۉاو ڕەتا بې

گؤزەرگەو تراما و ۉیارگەو پەتا بې

کەمینگاو ددا و وېشەو دڕا بې

ماۉاو کاڵ فاما و پوران پڕا بې

کرمې تؤم وەرې مؤرې گیان کوژې

داعبێ سەمەرې دڕې ون مژې

چندین هەماڵېم داما پېتېۉە

سەر نگمې کۆتې و کەسی نەدیېۉە 

سەخت تەلاشم کەرد تا دەۉام بارو

ڕەتا دەرباز بو داما ۉیارو

چراۉەو هەمېدیم وەر ئاسا گڕې

تاریکی پېکې و ڕای تارە بڕې

خاس خاس زانېنې چېش هەن ڕامەنە

کامەم ۉیارا و کامە دامەنە

زانېنې ئەگەر تامڵی بارو

سەختی دەوۆ لا و کوسپې ۉیارو

ئا ڕۉە کانا بەردەناش ئارام

ساعبانېۉی وەش مزیؤنە ئۆ ڕام

کەرؤم بە چەم دار ڕاکې مەدرەسەی

هام ڕا نەماما جە خەما ڕەسەی

پاجؤرە زامېم ساڕېشی ۉینا

کولېشا بڕیا و پەترؤکې بینا

زانېنې هەۉای وەش و وەرەتاو

ماتڵیم کەرا بە گەرم و بە تاو

بڵبل و نەۉاش چەمە ڕێمەنې

خونچې مەدرەسا بە تەمێمەنې

ئانە بې ڕەنجم ئاسان پەی بریا

وېداریم ڕس و تامڵیم کریا

سیامەند هۆرامی

20150608

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Friday, 12 May 2017 18:32)