یانه‌ شېعرې سیامەند هۆرامی بازو تەختی

بازو تەختی

بـازو تەخــتــی \ کلیک کەرە پەی دەنگی

گېڵناشۆ و ۉاتش ڕۉېۉ ڕؤزگارېۉ

هەرمانە هەر دەم یاۉنېم ئۆ شارېۉ

ڕۉېۉ چا ڕۉا و ڕاو ئامایەنە

کەیو لارە سێ ۉېرەگایەنە

ڕاش ۉسا ئۆ یؤ چی یاگە تازا

چی پؤست مؤدېڕن و پەڕەمز و ڕازا

چی قەسران شېۉە و  بابلی ڕەنگا

نەسرانی ۉیرا و فرعەون ئاهەنگا

شار پەی شارېۉی ماشین تاۉ دېنې

خەریکو نیگاو دیمەنا بېنې

دیۉارې بەرزې و کەلان پەڕچینې

چینیا دەسور کېشیێ و نەخشینې

بەرەو بارومې ئوتوماتیکې

تەمام مؤدېڕنې و یەک جار عەنتیکې

 

سەرگەرمو ۉیرا و نگمو خیالا

ناگا خاڵېۉەم زیانە ئۆ ڕا

بؤرە و بوڵینە سینەو جادەیۆ  

جادەی ئاسفاڵتی تازە وادەیۆ

نزیک بیانێ دیم کؤیا مەلېۉ

وې کېشؤ و ملؤ بە پەلە پەلېۉ

ماشینەم لا دا و ئازا ۉەسارە

لۉانې بزانو چېش کەرو چارە

بازېۉی شېۉیا و دژیا پەل و باڵ

وې کېشې و لۉې بە حاڵی ناحاڵ

دیې منەنە و بە نگەرانیۆ

بە هات و هاۉار بې زۉانیۆ

قاچېۉش کۆتە پەیش بەرز نەبېۉە

باڵېۉش شەلې و جواب نەدېۉە

تا چنگ و چؤڵېش بې خەتەر گنا

بە ئاسان گیریؤ و ئاسان بێنە ڕا

کەۉاکەم ۉەت و لۉانې پېۉایشۆ

پېۉای دەرمان و دەرد و دەۉایشۆ

ڕەم و گیرما بە گوڕ گیسیانە

دەمېۉ یاگېنە و تاۉېۉ جە ڕانە

هەر یؤ بە جؤرېۉ هەڵمەتە دېنمې

ڕاو نەجاتیەنە تەلاش کەرېنمې

ئاد گؤش بە سرشت پا بە ڕەمایۆ

منیچ بە ئاۉەز شؤنەو دەۉایۆ

 

ناکامېۉەنە فرسەتم ئەسا

هەر بە کەۉاکۆ دام دلې دەسا

کە زاناش دەسېم دؤسانې مشا

دەسش جە تەلاش پەی لۉای کېشا

ئاد تؤ کەۉای و من بە بې کەۉا

سوارې بیەیمې و کۆتیمې ڕا

 

تازە دېر بیە بې شەۉە ڕانە بې

بەیتەری بینیا و دەرمانگا نەبې

دؤسېۉی پیرم گورج ئاماۉە ۉیر

کە چا بەزمانە ئؤسا بېنە و ژیر

یەکسەر لۉانې ۉەرو بەرەیشا

وەش پەیم گېڵناۉە ماجەرا چېشا 

ئازا جمارە پیری فەرزانە

ئاما و پېۉەرە لۉایمێ یانە

چاگە چوەرېۉی پؤختە و پاکەنە

کەم ئامؤشؤنە و کەف جە خاکەنە

یاگې خاسەما خاس پەی ۉنارا

چەمما ئۆ چېۉە ئەۉیسا دارا

دؤسی فەرزانەم پېکیاو ڕؤزگاری

کۆت ئؤ نەۉازش بازی زامداری

دەسې پەڕ مېهرې و گەشتی ئؤسایی

بازشا ئارام ۉست لینی ئاسایی

باڵ و پەل و پؤ مەلەیش بە گردی

دا ۉەرو شۆقو سەرنجی وردی

بە وەشیۆ باڵش هیچ نەمەڕیا بې

تەنیا بېخەنە کەۉە و کؤیا بې

ئۆسام ئؤسا ڕەنگ و منیچش ۉەردەس

قاچەکەش گرتۆ و تەتەڵېما بەس

زەدەو دەنوکیش گرتما و لاما بەرد

تا ۉا کە کریې رېک و پېکما کەرد

چەنی موچیاریا دماو هەرمانې

ئؤسا لۉاۉە و منش ئاستانې

شؤنیەرە ئؤسا چند جارېۉ ئاما

بەڵام دماتەر رەنجا ڕا نەدا

من وېم ڕۉانەی چەمش دارېنې

خؤراکش دېنې و ئاۉیش فاڕېنې

چەنی زەمانی چەنیم ئامارە

تەرسیش هؤرچنیا خؤفیش ڕېزارە

نیگاش کەم کەمەی سؤ غەریباش ئاست

وېش بە ڕەنگ و ڕوی دؤسانە ئاراست

چی دماۉە زۉانېۉ بەینمانە ۉیەرې

بە نما و ئیما هەرمانە کەرې

 

ڕۉېۉ کە وەشیش کەرېنەم سەرسام

ناکامېۉېۉەنە و بە ئارام  پەرسام

تؤی بەرزە فڕی ئاسمانی ماۉا

چون و چەنی بې ڕؤت پی ڕۉ یاۉا؟

حەز کەرو بزانو چەنی بیەی پۆ

چەنی توش بیەی چەنی تلیای چۆ

 

ۉاتش حەکێتش دور و درېژا

پەڕا زامەتې و پەڕا جە ئېشا

ئەر تاقەتت بؤ پەیت باس کەرونە

بە خەیاڵ چەنی وېمت بەرونە

ۉاتم تاقەتم هەن و حەز کەرو

سەرە ئۆ ڕازە و زامەتات بەرو

ۉاتش دەی مادام چامنەن گؤش دارە

بە دڵ هؤر گېرە و بە هؤش بسپارە

من تەختۆ بېنې و تەختم ماۉا بې

یانەو دەرونیم یانەی ئاۉا بې

 

دنیا دنیام بې و دنیام بە کام بې

ئاسمانم دەسۆ و زەمینم ڕام بې

بزازەرا و هامنؤ شەمشی و داڵانی

بەرزی نامدار تەختەکەو سانی

ژاڵانۆ گېرەش تا دەرەو زەلتەی

سیرۉانۆ بارەش تا کەلو تەتەی

زەڵم و کؤسالان هانە ڕەنگینە

هەرات و شێنە باخچەو مەکینە

ئاندې و ئاندەتەر جاو گەشتام بېنې

هەر تاۉە یاگېۉ لۉېنې و گېڵېنې

پا سەرۆ گرد چېۉ ۉەرو چەمامۆ

جە پیر و جوان خونچە و نەمامۆ

ژەرەژی و گواری قاژې و هۆرېشې

ڕۉاسې و مارې و مریچڵې پەرؤشې

چو سەرۆ هیچم چەنە گم نەبې

دوربینو چەمام جە پؤپەنە بې

 

خۉەم بە خەمی و پېچ و خەماش ئې 

گاڵتەم بە دەردې وئېش و دەۉاش ئې

ڕۉېۉ چا ڕۉا و بەرز و بەرزاۉە

کەیفم کەیف وەرې دەمو چەرخاۉە

جە لولېۉەنە و جە پڕېۉەنە

کۆت ۉەرو چەمام لا دەرېۉەنە

بازېۉ بەرق ئاسا وېش نیشانە دا

کاۉەترېۉەش پەلې پژگنا

منیچ پو سەرۆ و تەنیا پەی وەشی

دامەرە و لۉانې تا بنارو کەشی

هەڵمەتەم بەردە تېکش دەو ۉەنە

نەچیری گیریاش بسانو چەنە

نەزانام چەنی و چکؤۉە زیاۉە

ئاما ڕوەمۆ تؤڕېۉەی سیاۉە

مەگیرە داما و هەر پەی من نریان

ئانە بازېۉا و دەسەمؤ کریان

گرتا و بەردانې باڵ بەسشا کەردا

چەمې بینیێۉە ئۆ دورشا بەردا

چاگە و چوەرېۉی تاک و تەنیانە

بې ڕؤچنە و بې نور دنج و پەنانە 

پا بە زنجیرۆ زیندانشا کەردا

بە دەردەو کاری بەندیاشا بەردا

ئاستاشا جیا و بەرەشا ژەنا

پېۉارې بیې و کۆتېنە پەنا

 

نە سرۉېۉ ئېنە و نە شؤڵېۉ ۉیەرې

نە گؤش هەرمانە و نە چەم کار کەرې

تەرسېنې ئانې لۉێ نەیاۉە

منیچ یاگېم بؤ بە چاڵە سیاۉە

 

مەزا چند وەختم چاگە دانە سەر

سەرەنجام ئامێ و بەردانېشا بەر

بەرداشا یاگېۉ یاگە حەیوان بې

لێۉۆ ئاوڕې و لێۉۆ کادان بې

 

ئا رۉە چاگە دان و ئاۉم دی

ئاورایی و تەژنەی جە لاشەم بەر شی

یؤشا ئارد دیارم چون گۆرەو گردی

گرد چەمیېنێ پەیش جە زل و وردی

یؤ پېسە قوشچی کۆت تاریف کەردەېم

تاریف جە ڕیشەی باسو ۉیەردەیم

ۉاچی ئی بازە بازو تەختیا

ئاشنا بە کاۉ و ئاشنا بە سەختیا

ئېنە پەرۉەردەو تەختی سانیا

ئەر بێۉ لینی بؤ جە ۉېنەش نیا

 

گۆرە جواب دېۉە ئاگا دارەنا

تەخت نامېش هەنە و خەبەر دارەنا

باس کەرا و ماچا زو گڕکان بیەن

سەر بە هاۉار و خرؤشان بیەن

دمای ئی باسا و بڕېۉ دەسورا

گۆرەی داش ۉەنە و ئاگەش ئاست جیا

 

بە پاو ئا حکما کە ئانا دریێ

قؤڵې تالیمی هەر چا هؤر کریێ

سەۉای ئا ڕؤیە دانېشانە ۉەر

پەی ئاۉ دای چەما بەردانېشا بەر

زنجیرشا بەسا مېخ سندانېۉۆ

ۉەراۉەر بە قەسر دیۉاخانېۉیۆ

دیارو ئېستەخری و کافە تریایۆ

چەمو ئاردەی و گؤشو بریایۆ  

سەڵتەنەتېۉ بې خوسرەۉانی ڕەنگ

خامش پەی کوشیا و پوختەش پەی دڵ تەنگ

 

بڕېۉ یاگېۉە زو  ڕؤ نەبېۉە

 شەۉە نیشېنە و ئاسان نەشېۉە

چاگە تا دېرېۉ کەیەو وتەی بې

ڕاۉەو مانیای شەۉان متەی بې

بې دەنگی ۉېنەو شەحنەو بازاری

نازې هیچ دەنگېۉ سەر دؤ دیاری

 

سا مەر جار جارەی ناخڵاف دەنگېۉ

یا کەمان کەردە زؤڵە  ئاهەنگېۉ

ئامێنې و دێشا بەرەو هەیوانش

لەرەشا ۉستێ دوخت و دوکانش

 

بڕېۉ یاگېچۆ هېمای هەر شەۉە

ژیۉای گیسیېنە و بې بە رؤی نەۉە

کارکەرې شؤنەو هەرمان و کاریۆ

کېشېنې پېۉای ڕەنجا رؤزگاریۆ

بازارو لەهجا چون ڕەنگین کەمان

هەر یؤ بە جؤرېۉ گفت دې ئۆ زۉان

جار جارەی کەیېۉ گؤشې دارېنی

ئجېت یاۉانی هۆشەو یؤ ئېنی

باخدار و چاشت کەر جە فیلیپینۆ

لەلە و گزی دەر جە هندوچینۆ

 

دما نیمەڕؤیچ بەزمې وېش ئارې

هەر یؤی یاگېۉۆ سازنې و ۉنارې

لێۉۆ ئېستەخر و مەلې و پریکە

 چۆ لاۉە ئەسپ و بازو چریکە

شەۉې هەم دیسان بەزمو شەۉا بې

دانس و ئاۉاز و ساز و نەۉا بې

 

ئینە چکؤۉە ئې هیچ دیار نەبې

تابڵؤ و ئادرەسېۉ بەرقەرار نەبې

ئانە بەر گنې متە و پژگنای بې

فەلسەفەو کەیفی و ۉیرو ۉیارای بې

 

چاگە جە بازایچ جەمېۉ جەمشا بې

پیلا و پۆلارە ڕؤم و ڕەمشا بې

بازې بە ڕواڵەت چون بازا بازې

دەم و چنگ تېژې پەلان درازې

بڕېۉ تا ۉاگە پەیشا کریا بې

دؤختشا چەنی ئا دؤخیە ئارا بې

چانیشا بېشا کڵاۉەش لارە بې

بېشا ئاۉازش قاڕە و باڕە بې

بېشا لا ملیش دێ بېنېش تاڵان

تا بەرەجیؤشا جە خېڵو داڵان

سەرجەم ئەرەجیې ماشینا دیېنې

ئانەی کەرېنې پەیش کؤک کرېنې

بە ۉېنەو کەرگا بە دانېۉ ئېنې 

چەنی کشېۉی بې کرچە شېنې

دنیاشا دانە و هېڵە و کولینە بې

هؤنەرشا گرازە و قرتە و چینە بې

 

چانیشا بېچشا بریقەو پەلاش ئې

بازنې قاچەنە وریشەو پەنجاش ئې 

بېشا تا ۉاچی وەش خەت و خاڵ بې

چەرخ و چەم نەخشین دەنوک چون لاڵ بې

بەڵام خو و خدەو بازاشا نەبې

ڕەنگ و بؤ کاۉا و بەرزاشا نەبې

سەرو دەساۉە چەم بەس نیشېنې

بؤژە وەرېنې و منەتە کېشېنې

 

قوشچی تەماش بې منیچ پا شېۉا

چەشتېۉ بسانو و مل باروەنە ڕا

بەڵام من تا ئې نەفرەتم خېزیې

ئا بار و دؤخمە جە لاۉە بېزیې

 

وادەو قوشچیا چەنی زەمانیش

ڕېزارە و لۉا ڕو بە پایانیش  

کاری نەکریا و تەماو ئەربابی

تاقەتشا کەردش کؤتەو قەسابی

بەرزە قاڵېشا قاڵې وەرېنێ

پێ دېنې زەمین چېڕې کەرېنێ  

 

کەیېۉ چېڕېچشا نەداشا سەمەر

موچیاریېشا ۉسانېنە ۉەر

بازېۉی پیرشا زنیەنە دیارم

تا بە حەکێتې کەرؤنە کارم

 

ۉاچې تؤ تا کەی یەک تەن و یەک تاک

پی جؤرە گژیەی بې خؤف و بې باک

تا کەی گەرەکتا ڕەنجی بې سەمەر

دەیەنە ۉەرو وېت ۉزی خەتەر

ئانە کە تؤ دی دۆرېۉ بې و لۉا

ئیتر نمێۉە و شیۉەن بې خودا

تا کەی گەرەکتا وېت ئازار بدەی

بە تەماو چېشی ئېندە حۆل مدەی

یاگ چېگەی وەشتەر چکؤ مارینە

وەشتەر چېگەیە چکؤش ۉیارینە

بەختېت کەردەنش قەدرش بزانە

دەسو گۆرەیۆ چەشتېۉ بسانە

لۉە ئا ۉەرە و  سەرېۉ نامنە

نیشە سەر دەسۆ و کار تەمامنە

واز جە خیالا کەش و کؤی بارە

شانسیت ئاردەنش تؤ مەدەش ۉارە

 

هەر ڕؤ سەد چون تؤ مەیا و لاڵیاۉە

تا گۆرە لێۉشا کەرؤ ئۆ لاۉە

چی گوا تؤ چېشت چېمە زیاتەرا

ئېمە یؤ نؤکەر یؤما مەیتەرا

 

چی ۉیرت شیەنۆ تؤفو زمسانا

کزەو ئاورایی دۆرو کۉیسانا

قرچەو هامنی و پەلە پڕوزی

پاورا و تەژنایی بې ڕزق و رؤزی

چېگە نە هامن سەمونېۉ ۉەزؤ  

نە بە زمسانې کزېۉ یؤی گەزؤ

دایمە خؤراکش کېشیا و ئامادەن

ژیۉایش ئارام و بې مشە و سادەن

 

تازە ئەر ملت نەدا و بیەی ئاۉا

کې هەن بێ ۉاچؤ کورە خانەت ئاۉا

دمای چند ڕۉا قاڵت بڕیؤۉە

بازارت کنیؤ و ملؤ و پېچیؤۉە 

 

یەک بین پی بەزمە دېنې ئۆ سڕنا

تا هەر جؤر هەن کؤ ورەیم وڕنا

 

کەیېۉ زاناشا کارشا مەۉیەرؤ

بەزم و بادشا ڕا بەر مەکەرؤ

 

ئینجا دەسشا دا زەجری ئاشکارۆ

کوشت و بڕی سەخت تەمام عەیارۆ

گا پەلې گیانیم پەل پەل کېشېنې

گا ملم چون جەڕ بە مەیل جەڕ دېنې

گا بە قاچېۉۆ کېشېنېم ئۆ دار

گا بە زمەی داخ خاس دېنېم ئازار

سەرەت نەیېشنو ماۉېۉی پی ڕەنگە

ئەزیەتشا کەردا هەر پی ئاهەنگە

بەڵام من لەرەم تا ئې قەد کېشې

نە داخە پېکېم نە زەجرم ئېشې

پاشا ماڕانې و دەنوک هەرپاسە

بەڵام هیچ کارشا نەکۆتۆ ڕاسە

 

دماو ئا بەزما گیانشا هاڕانې

گؤشېۉی دنجۆ فڕەشا دانې

جە کەیېۉەنە دور جە چەمداری

گؤشېۉۆ نورېۉ وېش دا دیاری

وېم کېشا پەی لایش بە جەسەی کؤیا

بە قاچی ورد و دەنوکی مەڕیا

ئاۉە روېۉ بې و ئاۉېۉەش چەنە

هەۉێۉش دەمۆ و شۆقېۉش پەنە

 

هەر بە حەسابو چېش بؤنە با بؤی

ماتڵیم نەکەرد وېم ۉەر دانە جؤی

جۉې جمنانې تا لا پەنگېۉی

پەنگېۉی گۆرەی گؤمە ڕەنگېۉی

ناستم زام و ڕېش ڕام پەی بنیارە

بە گرد ئېشېۉۆ وېم کېشا ڕارە

چاگە زیانێ و کەم کەم لۉانې

تا تؤ ئامای و باقی داستانې

 

کە یاۉا ئېگە پەرسام بەروت کؤ

کە پەی ۉەر بیەیت رېک و سەر ڕاس بؤ

ۉاتش هیچ خەمو یاگې مەوەرە

بەرەم ئا هۆشې و چا ڕەهام کەرە

 

هەر ئېندە بڕیەو ئە چی دیۉارا

ئیتر ئاسمانا و مېدانو جارا

بە یەک دۉە چەرخېۉ گنوۆ ئۆ ڕاسە

تەختی کەروۆ چەم بە یەک هەناسە

 

منیچ هەر پاسە ئانا باسم کەرد

بەردم پەی هۆشې و گؤناش ماچم کەرد

چەنی ئانەیە هەسې خېزیێ

کۆتېنە جمە و جە ئارام زیێ

جە لێۉۆ شادی و شۆقو ڕەهایی

جە لێۉۆ دوری و خەمو جیایی

 

بە دڵی پەرۆ نیامەرە زەمین

ۉاتم ئافەرین سەد جار ئافەرین

پەی ڕەنجېۉی دات پەرې ئازادی

لۉە و بژیۉە هەر دەم بە شادی

باز مشیؤ بازو سەرو بەرزا بؤ

نەک ڕېزە چنو ۉەرو دەسا بؤ

 

گەردەنېۉ گېڵنا و چەمېۉ چەرخنا

دیا منەرە و پېڵېۉش نەمنا 

بە دۉې تەکانې وېشایی ئاسا\ بازانە ئاسا

دیۉارېش نیێ و ئاسمانش ئەسا

چاگە دۉې چەرخې بە دۆر چەرخیاۉە

ناگا داشەرە و دیسان گیڵاۉە

یاۉا و بە نیگاې پەڕ جە ڕەزاۉە

مەمنونو تؤ بی و جە نؤ خېزاۉە

سیامەند هۆرامی

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Saturday, 13 May 2017 10:20)