یانه‌ هه‌والې شیوەنو وێرەگاو شارو غەریبا

شیوەنو وێرەگاو شارو غەریبا

بیسو په‌نجومین به‌ر‌گو ده‌فته‌رو ژیوایه‌نه‌ و‌ پاییزو هه‌وارو به‌نه‌نو ته‌ختو سانیه‌نه‌، وه‌رانوه‌رو یانه‌چله‌و پیرشالیاری، چنی ئازیزی تازه‌ یاری، په‌ی یه‌کۆمین و دمایین جاری، 

چه‌مشا وسته‌ بێ چه‌مو شاری، غه‌ریب و هامژیوه‌ش: تازه‌ وه‌یوه‌و هۆرامانی!

به‌ لوایش "لاشه‌ی زامارو ئه‌ده‌بیاتو وه‌ڵاتی' زامش تازه‌ته‌ر‌‌‌ بیوه‌ و کاروانو بلیمه‌ته‌ جوانه‌مه‌رگاو ڕاو هۆرامانی چاره‌نوسش خه‌مینته‌ر. پاسه‌ دیاره‌ن بێسارانی واته‌نی یانه‌وێرانی هه‌ر په‌ی هۆرامانی و پیایه‌ عاڵاش ئامان و "نمه‌تاویچ  گیری که‌سێوی دامان".

فره زوش بێ و واده‌و ئی کۆچیه‌ نه‌وێ. تازه‌لاو بێ و نه‌ونه‌مام. ته‌ژنه‌ هه‌رمان و په‌ر ئه‌و‌ فام. ڕۆح سۆک بێ عه‌ینو وای. وێنه‌و شنه‌و "وه‌سیای". هه‌م به‌ جه‌ماڵ و هه‌م به‌ که‌ماڵ. باڵا به‌رز و چه‌م نه‌خشین. ده‌س ڕه‌نگین و ڕه‌وت شیرین. جامه ‌به‌سه‌ر و وه‌ش کردار، په‌ڕ خیاڵ و وه‌ش گوفتار.

بێشکێ یانه‌و تاعه‌تدارانه‌، خه‌ڵوه‌تگاو دوری شارانه‌،  گلێرگا و کۆگاو ئاوه‌زدارانه‌، سێوه‌راو سێوه‌رو پاو نسارانه‌، مێحرابو سۆحو ساڵحانه‌، مانگه‌شه‌وه‌و چه‌منزارانه‌ و وه‌رده‌مو شۆڵه‌و زانایانه‌، تاریکایی هه‌سارانه و ئاسمانی بێگه‌ردو مافه‌تدارانه‌ گیان و ڕۆحش په‌روه‌ریابی و په‌روه‌رنا بێ و ماریفه‌تش تالیم و ئه‌رمانا بێ. به‌ ئاوه‌و هانه‌چه‌مه‌و بڵی شه‌تڵه‌و ژیوایش ئاژین دارا بێ. یانه‌چله‌و ته‌لیله‌که‌راو پیراو ته‌رێقه‌تینه پارێز و ئه‌خلاق و ئازاده‌گیش مسیه‌ بێ. ویرچه‌مه‌و مه‌ولاو بێسارانی و خدرو ڕواریینه‌ و یانه‌و ئه‌راگێڵه‌که‌و سه‌رو پیرینه‌ مه‌شقو ئێشق و عێرفانیش وانابێ و باره‌گاو خواشناسانه‌ جامه‌و مامۆساییش‌ پۆشا ‌بێ.

قاره‌مانو بازارو ئه‌غیارا و سه‌رمایا نه‌وی. دارایی و ئابروش چی دنیاینه‌ قه‌ڵه‌میه‌ بێ و چن په‌لێ کاغه‌ز و مه‌وله‌وی ئاسا سه‌رێوی سه‌وداسه‌ر. نمه‌زا ئیسه‌ ئه‌چا یاگێنه‌ که‌ هه‌ن ئه‌حواڵێو مه‌په‌رسا ئه‌و‌ شێعر و شاعێریش؟ ڕه‌نگا‌ هه‌ڵای چه‌نی "مه‌تی"نه‌زیرێ" هه‌نێ وه‌رمی غه‌ریوه‌نه به‌ڵام یاد و خاتره‌ش به‌ یادگار ئاسته‌نوه‌ په‌یما تا جه‌ ویر به‌رمێوه‌ بێ ئادی و غه‌یبه‌تی تاقه‌ت پروکنش وه‌رگه‌ گێرمێ و به‌یمێوه‌ وێماره‌ و بارمێشوه‌‌ ئه‌و یاد. یادو و ده‌نگو ده‌ورانو زارۆڵه‌ییش و بێگه‌ردیش جه‌ "هانه‌ڕه‌نگینه‌نه‌" و به‌رزه‌بانه‌که‌و شارو هۆرامان ته‌ختینه‌ و ده‌سپه‌نه‌و هۆنیاگه‌ریش و شێعره‌و "ئه‌دالێش" که‌ بییه‌ به‌ سه‌رچه‌مه‌و هانه‌و شاعێریش. ئاوه‌خته‌، ئینسان ئاسا ته‌عبیری ناڕاسما که‌رده‌ بێ و دڵما سوته‌ بێ په‌ی مایه‌و ژیوایش و که‌چ ره‌فتاری غه‌ریبو رۆزگاریش. چه‌پما وه‌نه‌بێوه‌ و نه‌زاناما حه‌کایه‌تو وه‌شه‌ویسیش په‌ی وه‌شه‌ویسێش بێئه‌و نه‌ویه‌ن و خه‌جاڵه‌تبار تا هه‌نمێ دلێ ئاه و ده‌رده‌و‌‌ هێجرانیشه‌نه‌‌‌ مه‌مانمێوه‌‌.

مه‌حاڵه‌ن په‌ی جارێوته‌ر چنی یاره‌کاش و یاردگاریه‌کاش بلۆنه‌وه‌ "گه‌ناوه"‌. کۆچی نه‌وهاڵانش لوان و ئێمه‌ش ئاسته‌ن به‌لاو خه‌م و حه‌سره‌تاوه. که‌س نمه‌زانۆ چا وێره‌گا شومه‌نه‌ هاناش په‌ی کێ به‌رده‌ بۆ. داخم ده‌سێ چه‌ ئازیزێیش چڕیێبا تا ده‌سه‌ نازاره‌کاش بارۆ پیرایشوه‌/پیوایشوه‌ و سه‌د حه‌یف که‌ نامای. داخم "هه‌یاس" دمایین ساتو حه‌یاتیش و ئاخرین هه‌ناسه‌و سه‌رو بساتیش په‌رۆشو چێشی بیه‌بۆ؟: چاره‌نوسو "چه‌مه‌ سیاوه‌کاو" تازه‌ یارێ، مه‌ینه‌تو یانه‌ی ئازیزیشا، بێکه‌سی و یانه‌وێرانی هۆرامانی، وانیاره‌کاو "وانیار"یش یا خۆ نزیکی وه‌سڵو دیدارو باری! نمه‌زا به‌ڵام دماو لوایش گرد لادێو ئه‌ر وه‌نۆزیما دایبۆ‌ پا هانایوه‌ بیه‌ن که‌ به‌یه‌وه‌ و واوه‌ی شێعرێما په‌ی بواچۆ و چه‌مه‌ڕایش بیمێ تا بزانمێ کورێ بێره‌حه‌مه‌و دنیای بێبه‌قاینه‌ و یانه‌و ته‌رێقه‌تیه‌نه‌ و حوجره‌کاو دڵانه‌‌ و فێرگاکاو هه‌قیقه‌تینه‌ کام وانه‌و ژیوایش به‌ سۆقات ئاورده‌نوه و ماوه‌رۆوه‌‌ په‌یما و چه‌ گوڵێ مده‌و ده‌سماوه‌ په‌ی ڕه‌نگینته‌ر که‌رده‌و باخو فه‌رهه‌نگو وه‌ڵاتی ئازیزیما‌. هه‌رچه‌ند مه‌زانمێ نمه‌یوه‌ عومری ویه‌رده‌ و مه‌حاڵه‌ن ئامای دۆسی بارکه‌رده‌. ئاخ و داخ واچان مه‌ر بارمێ تاقه‌ت تا قای قیامه‌ت، بێ کامه‌رانی و به‌ ده‌سه‌زرانی په‌ی غه‌ریوه‌که‌ی شای هۆرامانی!

مامۆسا هه‌یاس غه‌ریبی ساڵه‌و 1369 کۆچی ڕۆجیاری شاره‌ده‌گاو هۆرامان ته‌خت ینه‌ جه‌ ئه‌دای بیه‌ن و ویره‌گاو وه‌ختو 21 ترازیێ 1394 کۆچی ڕۆجیاری هه‌ر جه‌ هۆرامانه‌نه‌ کۆڵ و بارو ئاواته‌کاش رۆبه‌ شارو خاموشا پێچناوه‌ و جه‌ زیاره‌ته‌ڵانو پیرشالیارینه‌ په‌ی هه‌میشه‌ی ئارامش گێرت.

یاده‌ش به‌رز و پیرۆز بۆ.

داریۆش ڕه‌حمانی. مه‌ریوان

24 ترازیێ 1394 کۆچی ڕوجیاری

16 ئوکتوبرو 2015 میلادی

دمانویسیا:

ده‌س وه‌شی ماچو به‌ برای ئازیزیما کاکه‌ جه‌لیل خوندڵ ی که‌ زه‌حمه‌تش کێشان و به‌ ده‌نگو وه‌شه‌که‌و وێش ئی واتارشه‌ وانانوه‌ و زه‌بت و وڵاوشوه‌ که‌رده‌ن.

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌