Hawraman

خېر بەیدې پەی هۆرامانی

  • Increase font size
  • Default font size
  • Decrease font size
یانه‌ رؤچنه بە بؤنەو ساڵڕؤ مەرگو کاکە محەمەدی مسەفازادەی‌ۆ

بە بؤنەو ساڵڕؤ مەرگو کاکە محەمەدی مسەفازادەی‌ۆ

E-mail Print PDF

ڕؤ ٢٠١٣\١\٢٦ساڵڕؤ مەرگو کاکە محمەد مسەفازادەیا. یەرې ساڵې چێۉەڵ و چی ڕۉەنە، کە یؤ جە رۉە سەختەکا زۉانی هۆرامی بې، کاکە محمەد پەی دما جاری سەرەش 

نیاۉە و گردما داخدارېش کەردیمې. لۉای کاکە محەمەدی زەدېۉی گۆرە بې ئۆ کارۉانو ڕاۉیارا هەرمانەو زۉانی هۆرامی.

 کاکە محەمەد یؤ جە هەماڵە ۉەنە بڕیاکا و یؤ جە ڕابەرە ڕا ئەژناساکا بې. نەبیەی کاکە محەمەدی گرد یاگېۉۆ دیاری بې و جە گرد سەنگەرېۉەنە یاگېش هاڵیە بې. بەڵام یارەکې ڕاو کاکە محەمەدی سەرسەختانە عەزمشا جەزم کەرد کە نازا ئا کارۉانە مدرایش بێنە ڕا. دیارا ئاسان نەبې و تیرې ژارینې دماکۆتەیی و تؤپې غەرەزینې کەمې نەبېنې. بەڵام دەی ئانې سەرەڕاو زامەتاشا هەر پاسە کە جە هیچ یاگېۉو دنیایەنە نەتاۉانشا ۉەر بە هەرمانا مەردمی جە ڕاو بە دەس ئاردەی مافا وېشانە گېرا، لا ئېمەیچۆ هەمان چارەنوس چەمەڕاشا بې.

هەماڵەکې کاکە محەمەدی سینەو قەلەماشا سپەر کەرد و داخەو جە دەس دای هەماڵی وەشەۉیسیشا کەرد بە تەۉان و لۉێ گژې نا بسامانیارە. دیارا زۉانی هۆرامی هەڵای هەر فرەش ئینا ۉەرەنە بەڵام چەمېۉ ئۆ ۉیەردەیما مرمانؤ کە ڕێۉەی فرېچ ئامێنمې.

چا وەختۆ تا بە ئارؤ سەیەو ڕەۉەندی دنیایەنە و پاڵو زامەتا شمەی وەشەۉیسیەنە، فرە چېۉې گوڵې ئا وەختې ڕەنگەشا کاڵە بیېنۆ و فرە چېۉې تازېچ یاگېشا گرتېنە.

ئارؤ مەردمو ئېمەیچ هامرا چەنی مەردمو خاۉەن ئاۉەزو دنیای وەشتەر یاۉانەنە زۉان و تاریفا زۉانی و گرنگی زۉانی. ئارؤ ئیتر تاریفې عەشیرەتیې نەتەۉەی ڕوەو ئاۉەدانیشا نەمەنېنە و تاریفې تازې و سەردەمیانې ئینێ دلېنە. ئارؤ ئیتر کەس مەتاۉؤ بە ئاسان ئا پەرچەمە نا ئینسانیا بەرزې کەرؤۉە و شەرم نەگېرؤش. ۉیەڕې کوردسانیچ ئەرمانانشا کە ڕاسیې ئینێ کام کؤگانە و درۉې کامە دؤڵەنە. هەر پاسە بەرشا ۉستەن کە جە مافا وې ۉیەردەی چ زەرەرایېۉ مارؤ ملەرە.

دلې ئینشانە هەن کە زۉانی هۆرامیچ باڵاش کەردەن و قامەتش کېشتەن. مەردمو هۆرامانی و بە تایبەت جوانې قەڵەم بە دەسې ئیسە خاس یاۉێنېنە کە چەنی پەشتەو قسا بواناۉە و ڕاو وېشا بەر کەرا و ڕا نەدا کە چېرو هیچ پاساۉېۉیەنە مافې ئینسانیېشا چەنە شاریاۉە و چەنە کریا.

حەیف کاکە محەمەد نیا دلېمانە تا ئی وەزعې ۉینؤ و پەی ساتېۉیچ بیەن خاترە ئاسودە کەرؤ. یاگېشەنە کە گرد ساڵېۉ چی ڕۉەنە بە یادو کاکە محەمەدی وەشەۉیسیۆ چەمېۉ ۉزمې ئۆ ۉیەردەیما و پەیمانە تازې کەرمېۉە کە هەر سەرو ئا سرشتیە درېژەدەرې ڕاکې کاک محەمەدی مسەفازدەی بیمې.

مەنتەقەو ئېمەنە پارېزنای زۉانی هۆرامی، چەنی پارېزنای دیمؤکراسی و مافا ئینسانی سەخت لۉێنېنە پاڵو یؤی. بە نسبەتو وېچماۉە جیا چینیشا، ئینە پارېزنای مافو وېمانە و ئەرکمانە و ئەرکی ئینسانیمانە.

یادو کاکە محمەدی مسەفا زادەی هەر بەرز و گرامی بؤ!

ڕاو ئەرکا زۉانی هۆرامیچ پەر ڕاۉیارە!

ۉەرپەرسو پەلیانەو هۆرامانی

سیامەند هۆرامی

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 
Last Updated on Thursday, 14 January 2016 00:54