یانه‌ هه‌والې هۆرامی دیگیتالیزە کریا

هۆرامی دیگیتالیزە کریا

ئاكو مارانی

٢٢ی ئەپریڵو ٢٠١٦

ڕەنگا ئی سەردیڕە کەمیۋ ناجۆر یا ناڕۆشن بو، بەڵام چە سەردیڕەکەو من ناجورتەر و ناڕوشنتەر هۆرامیۋوا کە چە وی و چە کولتووری ویش و چە سروشتە هۆرامییەکەیش ناموبیەن و کۆتەن شونو قەرەباڵخی کولتوورو بازاری و هولیودی و شارزەدەیی و وردبیەو کەسایەتی.

ئارو دوسیۋی ئازیزی توماریۋی ڤیدیۆیش پێ من کیاست، تەنیا ئاندەمە وەشبی، کە ڤیدیۆکەم دی، ئیتر چە ژیانی و مەنەی و مروڤبەی ویم بیزاربیا، بەتایبەت کە ڤیدیۆکە بەزوانی ھۆرامی و ناوچەو هۆرامانو بەشو ئێرانی بی، هۆرامی هۆرامانیۋی کە تەنیا ئومیدو من بی و منا، کە تاۋابوش کولتوور و زوانو و سروشتو ویش پاریزنابو. بەڵام ئیتر هیچ دڵوەشیۋ نیا من ئومیدوارکەرو.

هەرچەننە سەختا من بە چند دەسەواژیۋ بتاۋو ڕاسی و كەتواریۋی گیڵنوۋە، كە تەنیا دیەیش متاۋو بەیانكەرو دیمە جوراوجورەكاش بو، ھەم باری دەروونی تاتەی نائومید و گیرودەی، ھەم خۋوەو ھامسەری بیھەستی و ھەم خۋوەو كوڕی دیگیتالیزەزەدەی، كوڕیۋ كە سەخترین باری دەروونی تاتەیش پیسەو كایەو سەرگەرمی توماركەرو و چە توڕە كومەڵایەتییەكانە وەلاشكەروۋە.

ھەرچننەم كرد، نەتاوام ڤیدیۆكەی نیشانەدەو شمەی ئازیزی دەو، چونكە ئەگەر ئاسمان سەربانیۋ بیێ، بە دیەی ئا ڤیدیۆیە، بە دیەی بارو دەروونی ئا تاتەیە، بە بیھەستی ئا ھامسەرو و كوڕەیە وڕی.

وەشڵێ تاۋێم تەنیا پێ یەك ساتی چنی ئا ھامسەر و كوڕە بیھەستەیە قسیكەروو و پەرسو؛ شمە بە چیشی خوودی، بە ۋیرانی باری دەروونی تاتیۋی زەحمەتكیشی و نائومیدی یا بە ویتا ھۆرامییە ولاویێكا شارا و دونیاو ئینتەرنیتی، ھۆرامییە چە وی ناموبییەكی، ھۆرامییە چە كولتووری ناموبییەكی، ھۆرامییە دیگیتاڵزەبیێكی؟

بەڕاسی ھەرچننە كوشام ھەرگیز نەتاۋانم ئانەیە ۋەرو چەماو ویم باروو، كە زاڕوڵەو ھۆرامانی تا ڕادەو ڕۆبۆتی نائومیدی و شیۋیای باری دەروونی تاتەیش ھەست و سوزش نە ورووژنو و كاتیۋ كە ۋینو مروڤەكی بەتایبەت كە تاتەو ویش بو، ۋەرو چەماشەنە ۋیران بو و دەروونش بیەن بە دوزەخیۋی ھەمیشەیی كە گیانش، بیەیش، وەرمەكاش، وەشییەكاش و ئاواتەكاش سوچنو و سات بە سات ۋیرانەر بو و سەرو دووڕیانو دیوانەبییەی و ویكوشتەیەنە نائومید مدران.

پەڕ بە دڵ ئارەزوومكەرد، كە پێ ساتیۋی پاڵو ئا پیا نائومیدەیەنە بیێنی و جیاتی تاتەیم، جیاتی ویم، جیاتی گردو مروڤە گیرودەكا گیرتەیم باوەشو ویم و جیاتی كوڕەكەیش، جیاتی ھامسەرەكیش دڵوپ دڵوپ شەرماۋەم بەردێ.

ئای ڕوزگار، چی پیسەو ھامپولەكام نەبیا چیرو دیوارە وڕاكا ھۆرامانی، تاكو ئی ڕوزگارەەمە نەدیێ، كە مروڤایەتی بییەن بە كاڵێۋی بیبەھاو بازارو سیستەمو مروڤناموكەردەی؛ سیستەمیۋ كە ئامانجش ھاڵیكەردەو مروڤیا چا بەھا كولتوورییە بەرزا، كە وەڵیناما بیەو ئیمەنە دروسشاكەردەنی؛ مروڤبیەی و ھامدەردی و ھامپەشتی و ھامخەمی.

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌