یانه‌

بەیانیە

بەیانیەو تاقموو جواناو نۆ ئەندیشوو هۆرامانی، پەی هایاوە کەردەی و مەحکووم کەردەو تەوهیناتەکانوو پارلەمانتارە کوردەکەو عێراقی بە زوانی هۆرامی.چن وەختێ چیوەڵ

خەبەروو تەوهین و بێ ئێحترامی کەردەی بە زوان و فەرهەنگ و هۆرامانی جە لاو یۆ جە نمایندە کوردەکاو کورسانوو عێراقی وزیا سەروو فەزای مەجازی و پەی جارێ تەری سادیسم و ئازارێ رۆحی تاکی هۆرامی جە لاو ناسیۆنالیستەکانوو کوردیوە بە تەشکێ نژاد پرسانە واوەی کریاوە.

 پی بۆنەوە، ئێمە پسەو تاقمێ جە جوانە نۆئەندیشەکان و قەڵەم بەدەسەکانوو محاڵوو هۆرامانی، بە وەنەوەیێ تئۆریک و ڕۆشنگەرانە و ئاوەزمەدار و واقعوین، ئی جۆرە تەوهینات و بێ حورمەتیانە پسەو گراڵێ نەهادینە کریای جە نژادپرسی ئامانج مەحوەری دژوو خەڵکوو هۆرامانی لەیەک مدەیمێ، هەر پاسە کە ساڵانی سالا، لاو دەسەلاتوو فدرالوو کورسانوو عیراقیوە سوور بە سوور و ئاشکرا، هەنگامێ سیستماتیکێ و سازماندریێ پەی ئەوەتاوناو زوانی هۆرامی و فەرهەنگی هۆرامی و ماڕاو کێبیەو جامعەو هۆرامانی ملا ڕاوە، و جە هۆرامانوو ئێرانیچەنە، جە لاو ئەحزابی کوردیوە بە شێوێ میدیایی و نهادینە هۆرامان دریان وەروو هێرشیوە و بە شێوێ درۆیین بە بەهانەو خزمەتیوە، خەریکوو پیادەکەردەو سیاسەتوو ناسیۆنالیست پەروەرناو جوانەکاو ئی محالینێ و هەر جە دەسوسەینە دلێ کۆبیە فەرهەنگی تا جەژنەو نۆرۆزوو پاڵنگانی و دەیان جەژنێ هونەریێ و فەرهەنگیێ تەرێ، گەرەکشانە گەورەیی ئی خەڵکی و تاریخ و زەحماتوو ئی خەڵکەی کاڵ و خام دزاش و کەراشەنە قەباڵە و مڵکوو ناسیۆنالیستی کوردی. ئارۆ کە جنبشوو هایاوەکەردەی و وێشناسی هۆرامانی، رۆ بە ڕۆ پەرەش سانان و زوانوو هۆرامی خەریکا ڕۆ بە رۆ هەنگامێ گەورەتەرێ هۆر منیۆ، ئی مەسەلێ بیێنێ چەمتەقنوو فرەو ئەغیارا ئی دیمی و ئۆدیمی و هەر ڕوێ بە جۆرێ هێرشێ جۆراوجۆرێ کەرا سەروو چالاکە فەرهەنگی و مەدەنیەکانوو محاڵوو هۆرامانی. هەر پی بۆنەوە ئێمە تەوهینوو ئی نمایندەی جیا جە تەوهیناتە وەرپانەکا جامعەو کوردستانی دژ بە خەڵکەکەیما جە محاڵوو هۆرامانی لەیەک نمەدەیمێوە و گردوو ئی سیاسەتا، بە وردکۆڵیێ فرەو فراوان و زانشتیانە و ئاوەزمەدار لەیەک مدەیمێ و ئانتی پلانێش پەی چنمێ. نەهایەتەن، پسەو جوانە نۆئەندیشەکانوو هۆرامانی، وەڵێ گرد چیوێنە بێ دەنگی جامعەو فەرهەنگی کوردی و ئیدعادارەکانوو بەرەو ئازادی و مافوو ئینسانی جە ئێران و عیراق بە پشتیوانی و لایەنگەریێ وێڕاس مدەیمێ قەڵەم و داواکارێنمێ کە بە زووتەرین وەخت دەنگوو ناڕەزاگەری وێشان پەی ئی مەسەلێ برمانا. چوون ئی ئیمکانە ملۆ کە ناڕەزایەتی هەمەلایانە هۆرامانەنە وەرانوەروو ئی مەسەلێ و مەسەلە گەورەکا تەری هۆرگرسیۆ و ئاژەکەی سخلەتتەر کەرۆن. تەوهین کەردەی بە زوانی هۆرامی جە قەڕنەو ٢١ینە و بە ڕەسمی نەژناساو زوانوو ١ملوێن کەسی، ڕێک چیرپا وسەو حقۆقی بنیادین ئینسانیا. و مەحکووم بە شکستین.

تاقموو جواناو نۆ ئەندیشوو هۆرامانی:

١. بهزاد کەریمی

٢. سەعدوڵا خوونخام

 ٣. ژیار سڵامەتیان

 ٤. نیشتمان ڕەزایی

 ٣١/٢/١٣٩٥

 

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌