یانه‌ شېعرې سیامەند هۆرامی تافی پؤژیا

تافی پؤژیا

Download Embed Embed this video on your site

داخ نامېۉ پەی تافی پؤژیای꞉

هۆ تاف شیرین تؤفان دارەکەم

هۆ دؤس دېرین پەڕ هاۉارەکەم 

ئەژنیم بە تیرەو سەختی پېکیانی

تؤی دیۉار نریا و بتؤن پېچیانی

میاوەنە ڕەنجیت و بە سەر ئامانا

هامدەمو داخا و هەمڕاو زامانا

مزانو بە ئېش جە دنیا کنیایت

جە ڕەنگا کۆتە و جە جما بڕیایت

سرشتیچ نە بؤ و پەی وەشکریا بې

سازدەرش ئازاد ئەتؤ گیریا بی

یاۉا بی یاگېۉ پاسە بېچارە

دیۉار و مورېش ڕات پەی بنیارە

دیۉار ڕەنگ کەرو رؤ و ڕؤزگاریت بؤ

هەر ئاد نیشان دەر ڕاو گوزاریت بؤ

خاترت هەر تاۉ پېکؤ بە خارېۉ

شۆقت هەر دەمە کېشؤ ئۆ دارېۉ

قازیت دیۉار بؤ و سیمان یاسا دار

یؤشا پؤلیس و ئەۉشا دادیار

دیۉار برمانؤ کې گؤش دارت بؤ

چېش دڵگیرت بؤ کې دڵدارت بؤ

هەر ئاد برمانؤ چند بلؤ دەنگت 

چون بؤ ئاۉاز و چون بؤنە ڕەنگت

سەد جمش پەنە و دەس و باڵ بینیا

سەد هاۉار چەنە و هاۉاری چنیا 

شیرین تافەکەم تافی شیرینم

هام دەم و هام ڕای کەیا دیرینم

ئانە کە تؤش چا و پا جؤرە گەسەن

چولاۉە گەرەو گؤراڵاش بەسەن

چاگە بە دیۉار چەنی تؤ دۉا

چولاۉە خونچې بە تېڵێ کۉا

بە داسې مەیا دۆرو ئاسکارە

بە مشار لچې ۉلا مارارە

ئاۉایی گېرا و زیندانی کەرا

سجدە پەی سیماو ۉېرانی بەرا

ئینی مەۉینا ساعبو شەماڵی

شنەو بەیانی و گڕەو خەیاڵی

مەژناسا ناسک قرمەو قەڵۉەزا

وەش دوختی تافو تەڵانە بەرزا

ئیسە ئەر ئینېچ گرد مەنا چانە

داخؤ چېش ۉیەرؤ جەمەو دؤسانە

بې تؤ مشیؤنە حاڵشا چون بؤ

رؤشا چون ۉیەرؤ و شەوگارشا چون بؤ 

حالو نەمامە بەرزە وەزەکا

چنارە ڕېکە شیرین تەرزەکا

هەرزەل نشینې لا گؤشە بانا

گرؤ کؤمەڵې دەسەو جوانا

سؤتە دڵدارې شەو مانگە شەۉا

بې تؤ چونشانە و چونان سرەۉا

بې تؤ چون ۉیەرؤ ڕاز و نیازشا

کې گؤش مدؤنە سەداو ئاۉازشا

باڵا نەمامې هەرزەل و بانا

ڕازې دەرونی پەی کې موانا

تاف شیرینی شیرین ئاۉازم

هام دەم دیرین شەۉانە ڕازم

ئینې مەزانا تؤ چېش بیەنې

چەنی کام وەختا ئاما و شیەنی

پرژەت ئۆ چارەو کامین هەسا دان

تینت جە کامە سؤ و سؤتا ئەسان

ئینې بەس ئاۉەی خوڕەت مزانا

بە هاڕە و هاۉار ڕو بە تەڵانا

دەنگت دەسە مل دؤساشا نەبیەن

ئەنەزیای بەرەو کؤگاشا نەبیەن

نەبیەن بە موزیک شەو و شەوگارشا

تېکەڵ بە پچە و خەم و خەم وارشا

داخ منەت بارې شەماڵیت نیەنې

دەماخ کەیلە عەتر وەش خاڵیت نیەنې

تؤشا نەنیشتەن تؤی درون و دڵ

نەگېڵان ۉیرشا دۆرتەنە خجڵ

هۆ تاف شیرین جە دەنگ ۉزیاکەم

هۆ ناچار کۆتەی چارە شېۉیاکەم

تا ڕۉېۉ هەۉاش چا گؤزەرۆ بێ

چا سەمون ماۉای زیان دەرۆ بێ

بەختەو من و تؤیچ هەر پېسەش مارؤ

من وېلو شارا تؤیچ ڕؤت چون ئارؤ

تؤ پا وەزعېۉە و تؤی بتؤن پېچیا

منیچ زام زەدە و جە یارا جیا

بەڵام گیانەکەم دؤسی دیرینم

زامان ئاۉەردەی دڵ زۉیرینم

ئارؤ هەر چندە تەم و تواڵیا

کەیلە پویان و نەۉە هاڵیا

هیزیش نیشتەن و چلې مژمارؤ

تەماش بەسېنە و نمێش باز بارؤ

ئانەی بزانە سرشتی یاسان

کؤنە مؤ بلؤ چ سوک چ ئاسان

چی ڕانە کؤنە چند پێ گېرؤرە

چاڵەو تەقاو وېش خاستەر بەرؤرە

دماو ئی تەمې گؤراڵې شادی

مزیانە و گېڵنا بەزمو ئازادی

پؤل پؤل مەیانې جە خېڵو یارا

خاڵې نەخشینېت ۉزاۉە سارا

جا ئەر تەمەنی گەڕېش ئاردېنە

منش پېتانێ و نیانېش چېنە

تؤ جیاتی منیچ ڕەسا کەرە دەنگ

بە دەسوری وەش ڕېک و وەش و ئاهەنگ

پەیامو ئارؤیم بیاۉنەشا پەنە

ۉاچە هەزار جار وەشڵەیشا پەنە

سیامەند هۆرامی

12\05\2016

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Friday, 12 May 2017 18:35)