یانه‌ شېعرې سیامەند هۆرامی شؤنەما

شؤنەما

Download Embed Embed this video on your site

ئارؤ ڕام کۆتە ئۆ ڕازیا مڵکېۉ

ئارام ئاۉەدان پارېزیا مڵکېۉ

جە لێۉۆ بزەو خونچەو ۉلا بې

جە لێۉۆ خەندەو گرؤ گوڵا بې

تافې بە پرژە و ڕؤجیار بە تیجیار

هۆرامانېۉشا ئاردە بېنە دیار

نەۉاو بڵبڵی مەسیش پۆ ۉارې

شەماڵ عەتر و بؤی ۉەهاری ئارې

مەل و مؤر سەرجەم گەرمە کەیشا بې

تاف و تەڵانې نەۉاو نەیشا بې

ناگا چا وەختو گەشت و گېڵانە

چا گەرمە تؤفو وەرە شېڵانە

لا حەسارېۉیەنە پیرە کؤتەرېۉ

پویا و پەک کۆتە ئەرمانا سەرېۉ

قامەتی ڕېزاش جام رؤخسار بې

تەپاییش نیشان ڕەنج ڕؤزگار بې

ئەۉیس نەکەرې دەنگ باریەنە ڕا

نیگا سەد پەرسې یاۉنې بې هەرا

نە جواب بە سەیر پەرسانە بارم

ئیشارېۉش دا ئاشنای هەژارم

سەرنجش بەردا پەی نەمامېۉې   

پا ژەرەژ دارە  توڵە خامېۉې

ۉاتش زەمانېۉ منیچ چون ئانې

شەماڵ ئاۉازې خاڵېمۆر وانې

بەرزە و بڵندە شیرین قەد و بار

دلې دؤسانە یاگە و پاگە دار

نە ئینەم ڕؤ بې و نە ئینەمە وەخت

نە پېسەم توش بې و نە پېسەمە سەخت

تا ۉا ۉیرم بێ و زەینم یاردی دؤ

مزانو تەمەنیم ڕوەش نیا ئۆ کؤ

بەشېۉ شی چەنی شەتڵ و کیاری

چەنی ئاموزش باخ و باخ داری

بڕېۉ هامنا دانە ۉەر و بەرد

بازېۉ زمسانا سیا و سؤتە کەرد  

بەشېۉ دەردا پېت بازېۉ نەوەشی

بڕېۉ بەد بەختیا دانە ۉەر و شی

ئیسە با تاۉېۉ ئی گازا بنیەو

ساتېۉ چەم ئۆ لا دلوازا بنیەو

بزانو چا بەشې یا جە دل خېزا

چندش کؤۉە شی و بە چېشۆ ڕېزا

ۉیرما بازېۉش نیشت پا دیارگاۉە

بە دیار ئا کؤگا وکەپر و هارگاۉە

بەشېۉ بە هامڕا چەنی هەسارا

بی بە ڕاۉیارو گؤزەرگەو یارا

بڕېۉ پېچیانە زنجو ئا ساۉې  

بازېۉ خزانە جۉەو ئی ئاۉې

بڕېۉ هەم قەتار گەڵاو سەر بەرزا

بی بە سۆدایی لەنجەو وەش تەرزا

بازېۉ شەماڵی یاۉنا بە هەردا

کەردش ئەڕاگېڵ ڕاو گەردەن زەردا

بڕېۉ شی چەنی پرژەو ئا تافا

وې دانە دامەو شیرین کڵافا

بەشېۉ بە نەۉاو دەنگو هەزاری

ۉەسەنە شېعرا ۉلەو حەساری

یانې ئەر زەفەر زنجیرام بەرو

کریؤ شؤنەماو گردی هؤر کەرو

چېنە کؤتەرە لۉاۉە دەقو وېش

منش ئاستانێ و دنیای پەڕ ئەندېش  

سیامەند هۆرامی

31\05\2016

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Friday, 12 May 2017 18:37)