یانه‌

ماف نمەدریۊ

بەڵکو بە کۊششکەردەی مسانیۊ و سەرو دەسەڵاتدارارە سەپنیۊ.

ئاکۊ مارانی

١٠و دیسەمبەرو ٢٠١٦

بە زۋانی ئەڎایی بوانە و بنۋیسە و ھەر بە زۋانی ئەڎایی داوازییەکات بەرزکەرۆ و ۋیرت نەشۊ، کە وەنەی و نۋیستەی بە زۋانی ئەڎایی یۊن چە ئازاڎییە بنەڕەتییە سروشتییەکا و ھەر پاسە یۊن چە مافە بنەڕەتییەکا (جاڕنامەی گەردوونیی مافو مروڤ).

ئارۊ ١٠و دێسەمبەرو ٢٠١٦، ڕۊ جاڕدای (جاڕنامەی گەردوونی مافو مروڤی)ن و کەسەکۍ کۊمەڵو ئیمە چە گرد مافیۋی بیبەشینۍ؛ ھەرمانۍ گونجیێ، بیمەی بیکاری، بیمەی کۊمەڵایەتی، بیمەی دەرمانی، سەرپەنای گونجیا و مووچەی تەمام و مووچە و کرۍ یەکسانە و مافو ئەۋینداری و ئازاڎی دڵدارۍ و چانیشاچە بنەڕەتیتەر مافو وەنەی بە زۋانی ئەڎایی، کە یۊن چە ئازاڎییە سروشتییەکا و ھەر پاسە یۊن چە مافە بنەڕەتییەکا (جاڕنامەی گەردوونیی مافو مروڤی) و ئەستەما کۊمەڵیۋەنە ئازاڎی بییەیش بۊ، ئەگەر یەکسانی مافو وەنەی بە زۋانی ئەڎایی و ئازاڎی وەنەی بە زۋانی ئەڎایی بییەیش نەبۊ.

ھەر سەرو ئا بنەمایۆ کە مافو وەنەی بە زۋانی ئەڎایی چە ھەریمو کوردستانیەنە پەی ئیمەی ھۆرامی-زۋانی نییا، قسەکەردەی چە بارەو بیەی ئازاڎی تاکەکەسی و ئازاڎییە گردینەکا گنۊ خانەو زیاڎەڕەۋی و خەڵەتنای و درۊکەردەی و مسۆگەریی ماف و ئازاڎی بنەڕەتیی و سروشتیی مروڤی سایەو فەرمانداریی ھەریمو کوردستانییەنە چنی سایەو فەرماندارییەکا تورکیە و سوریەی و ئێرانی ھیچ جیاوازیش نییا و ھەر پېسەو ئاڎیشا بە شۆڤینیزمی زۋانی پەشتیش بەستینە و ئازاڎی وەنەی بە زۋانی ئەڎایی بە بیەی دەسەڵاتی ڕامیاریی پەیوەستکریانۆ کرمانجی-زۋانەکۍ و سۆرانی-زۋانەکۍ مافو وەنەی بە زۋانی ئەڎایی ویشا ھەن، چونکە دەسەڵاتدارۍ کۊمەڵو ھەریمو کوردستانییەنی و ھۆرامی-زۋانەکۍ و کەلھوڕ-زۋانەکۍ مافو وەنەی زۋانی ئەڎایی ویشا نییا، چونکە پاشکۊ دەسەڵاتییەنۍ.

جاریۋتەر ئی بارە ئا پەیلۋایە سەلەمنۊۋە، کە "یەکسانی ئابووریی و یەکسانی دەسەڵاتیی کەسەکا بنەماو یەکسانی ھەمەلایەنەی یاسایی و مافیی کەسەکان" و تاکو کاتیۋ کە یەکسانی ئابووریی و دەسەڵاتیی کەسەکا مسۆگەر و مەیسەر نەکریابۊ، یەکسانی یاسایی و مافیی کەسەکا یان کەمینەکا ئەستەما و گنۊ خانەو درۋە ڕامیارییەکا.

ھەڵبەتە ئانەیچە ۋاچوو، نە مەبەستو ئا پەیلۋایە و نە مەبەستو من ئانە نییا، کە مشیۊ کومەڵۍ ھۆرامینشینە (ھۆرامان) پېسەو سۆرانیستانی و کرمانجستانی (بادینانی) چە لایەنو کومەڵیۋ ڕامیارا و سەرمایەداراۋە ڕاۋەبریۊ و سیستەمی بۆرجوازی زاڵ بۊ. نەخێر، چونکە ھەرگیز سایەو سیستەمو بۊرجوازییەنە (سیستەمو مشەوەرییەنە) ئازاڎی و یەکسانی و دادپەروەریی مسۆگەر و مەیسەر نەبیەن و نمەبۊ. بەڵکو مەبەستو من ئانەنە، کە یەکسانی ئابووریی و دەسەڵاتیی کەسەکا تەنیا بە سیستەمی وی-ڕاۋەربەری کۊمەڵایەتیی (Social Self Administration) پەشتبەستە بە دێمۆکراسی ڕاسەوانەی (Direct democracy) و فیدراڵیزمی نادۊڵەتی (anarchist federalism) و ئازاڎی ھەمەلایەنەی و دادپەروەریی کۆمەڵایەتیی مسۆگەر و مەیسەر بۊ و ئیمەی ھۆرامی-زۋان چ چە ئێرانەنە و چ ھەریمو کوردستانییەنە، پەی یاۋایما بە مافە ڕەۋاکاما، پیۋیستما بە وی-ڕیکۋستەی کۊمەڵایەتیی   (social self-organization) ئاسۊیی دوور چە ڕامیاریی و پارتایەتی و قاڵبی ئایدیۆلۆجیی و دوور چە دەسەگەریی و دەسەۋچنیی (ئیلیت-گەری) و دوور چە بەرتەریدای بە ڕامیارا و ڕۆشنۋیرا و سەرمایەدارا و دوور چە جیاۋازیکەردەی، ویما ڕیکۋزمۍ و ڕێکۋزیا جەماوەریی و کۆمەڵایەتییەکۍ و ئەنجومەنەکۍ یاگو ژیۋای و ھەرمانی و وەنەی و ..تد سازدەیمۍ و ھەنگام بە ھەنگام وی-ڕاۋەبەری کۊمەڵایەتیی ۋزمۍ یاگۊ ڕاۋەبەری ڕامیاریی (پارتایەتی و پارلەمانی و جەنەڕاڵی و دتکتاتۆریی و پاشایی) و پەی سەرو مێژوو وی-ڕاۋەبەری شار و دەگا ئازاڎەکا ھۆرامانی و زاگۊسنشینەکا گیڵمیۋە، کە بە دێمۆکراسی ڕاسەوانە یان ڕاسەقینەی پەشتبەستە بییەن.

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Saturday, 10 December 2016 10:57)