یانه‌ شېعرې ۋېناکەرە

ۋېناکەرە

ۋېناکەرە، ھەرچڼە ۋېناکەردەیش سەختا

جەھانېۋ کە چاگە گرد کەس وەشبەختا

جەھانېۋ کە چاگە زەڕ و نەژاد و سەروەری نرخشا نېیا

وەڵامو ھامدەنگییەکا سەرکوتگەری پۆلیسی نېیا

نە بۊمبی ئەتۆمیش ھەن، نە فڕۊکە و نە خومپارە

ئیتر زاڕۊڵۍ سەرو مینیۆ پاشا جیانمازارە

گرد تەمام ئازاڎېنۍ! گرد تەندرۊسۍ و بېدەردېنۍ!

ڕۊنامەنە نموانیۆ، نەھەنگۍ تووشو وېکوشۍ بیینۍ !

جەھانېۋ ۋېناکەرە، بەبۍ نەفرەت و بارووت

بەبۍ ستەم و ملھوڕی، بەبۍ تەرس و تابووت

جەھانېۋ ۋېناکەرە، لېۋانلېۋا چە خەندەی و ئازاڎی

لېۋانلېۋ چە ۋل و ماچی، پەڕ چە بەردەۋامی ئاۋەڎانی

ۋېناکەرە ھەرچڼە تاۋانا ۋېناکەردەیش

کە گڵۋی پەڕە بۊ سورمە بە نامبەردەیش

ۋېناکەرە جەھانېۋ کە دڵېشەنە زیڼان ئەفسانەن

گردو جەنگەکا دنیای بە ئاشتی دمایشا ئامان

کەس سەروەرو جەھانی نېیا، یەکسانېنۍ کەسەکۍ

بەشۊ ھەر مرۊڤېۋېن دڼە بە دڼەو خەرمانو گەنمۍ

بەبۍ مەرزبەندی! نیشتمان واتا گرد دنیا !

ۋېناکەرە کە تۊ متاۋی بەدیباری ئی وەرما !

یەغما گولرویی

ھۊرگېڵنای: ئاکۊ مارانی

---------------------------------------------

* چڼ دېڕېۋەنە پەی درۊسبیەی سەروای و پارېزنای ئاوازو ھۊنیێکۍ، دەسکاری واژەکام کەردەن، بەڵام بەبۍ فاڕای واو ھۊنیێکۍ و ئامانجو ھۊنیارەکەی .

** ئەگەر سەرنجو ئی ھۊنیێ بڎەیمۍ، فرەتەر چە ھۊرگېڵناو ھۊربەسو گۊرانییەکۊ (جۆن لێنن John Winston Ono Lennon)ی مشۊ، کە (موسڵیحی شێخولئیسلامی) پەی زۋانی سۆرانی ھۊرگېڵنێنە و شاڎڕەۋان (کاروان عوسمان)ی کەردېنە بە سروود "بێنە پێشچاو".

*** ئی ھۊنیێ (سیاوەش قمیشی) کەرېنە بە سروودېۋە فرە دڵگیرە "تصور کن"، کە دڵو گرد مرۆڤېوی ئازاڎیوازی پەی وېش کېشکەرۊ.

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Sunday, 15 January 2017 22:01)