یانه‌ رؤچنه هؤش و ماددە

هؤش و ماددە

هۊش و تیئۆری ۋەڵۍ ماددەی و کردەی گنا یان پېچەۋانەکەش

ئاكٶ مارانی

٢٥و جێنیوەری ٢٠١٧

سەرەتا بە دۊسە ئاییندارەکا ۋاچوو، کە مەبەستو من چی پرسیارۍ سەلەمنای بیەی و نەبیەی یەزدانی نییا و ئامانجیشم ئانە نیا بابەتېۋۍ چامنۍ ورووژنوو، چونکە چە ئیسەنە پەی چارەسەرو گرفتەکاما کەڵكش نییا و ھەر پاسە تېکېۋ نان پەی سەرو سفرەی هاڵی ئېمەی بەشوریێی و بیدەسەڵاتی زیاڎنمەکەرۊ و ژەمېۋ شۊت پەی زاڵەو ئاوراکاما مسۆگەر نمەکەرۊ.

بە دیاریکریای مەبەستو من مشتومڕکەردەی ئانەین، کە ئایا چین و تۋە ستەمدیدەکۍ کۊمەڵۍ پېۋیستشا بە ڕابەردەی ڕامیارا ھەن یان گرد کەس متاۋو تەنیا ڕابەرو وېش بۊ و ھەر کات ئېمە ڕابەریی وېما بە کەسەکا تەری بسپارمۍ، سەرەنجام بە وابەستەیی کەسایەتی و خەسیای ھۊشی و چەدەستدای ئاۋەزیما کوتاییشمێۋ. ئەگەر چا بارۆ بە وردی و کونجاۋانە سەرنجو ۋییەردەو وېما بە تایبەت سەردەمو سەرھۊرداو  (دۆڵەت-نەتەوە)ی و پارتایەتی و شوانەیی ڕامیارا دەیمۍ، فرە بە ئاسانی پەی ئېمە بەرگنۊ و ۋینمۍ، کە بەگردی ڕۊ بە ڕۊ کەسە بەشوریێ و بېدەسەڵاتەکۍ ناتەۋانۍ و ناھۊشیارۍ و کەمتەخەمۍ کریا و تەنانەت بڕۋاشا بە کارابیەو وېشا نەمەنېنە و تەمادارو ڕامیارا و پارتییەکا و دۆڵەتی مەنېنۍ، تاکو ڕاۋەبەری کۊمەڵۍ و گرفتەکاشا پەی چارەسەرکەرا، کە ھەرگیز چارەسەرشا نەکەردېنۍ و خراپتەر چە ۋیەردەی ئاشاییشی کۊمەڵایەتیشا دلېنەبەردەن و خەڵكشا گیرۊدەتەر و وابەستەتەر و شۊنکۆتەتەر کەردەن و ملھوڕی وېشا زیاتەر سەپنان.

با بە جۊریۋتەر پرسیارەکۍ ئاراستەکەرمۍ، ئایا ئەندېشەو ئازاڎی و یەکسانی گردو مرۊڤەکا و داڎپەروەریی کۊمەڵایەتیی زاڎەو ھۊشییا یان ۋەرئەنجامو ئەزموونگیری چە ۋیەردەو کۊششو مرۊڤایەتی ؟

وەڵامو ئی پرسیار‌ کڕیڵو گردو قفڵەکان و چا بارۆ دۋۍ وەڵامۍ زیاتەر بیەیشا نییا؛ یان ھۊش و تیئۆری زاڎەو کردەیەنۍ، یان کردە و ئەزموون زادەو ھۊشی و تیئۆریەنۍ، کە بە پەیلۋاو من، ئەگەر ئېمە وەڵامی یەکەمی پەسینمۍ، گردو قفڵەکا سەراپاو ۋەڵینەی کەرمېۋە، بەڵام ئەگەر وەڵامی دوەمی ھۊرۋچنمۍ، پەی ھەمیشەی مۊرۊ ئەۋەنەکریای ئۆ بەرە قفڵدریاکا مڎەیمۍ و ناچارۍ بیمۍ تاکو مەردەی چەمەڕۋانو پارتییەکا و دەسەچنە ڕامیارەکا و کەسە وۍ بە ڕابەرزانەکا بېمۍ و خاسترین بارەنە چەمەڕۋانو فیلۆسۆفا و ئەندېشیارا بېمۍ، تاکو ئاڎۍ پېسەو فریادڕسېۋی فریاو ئېمە گنا و بەرەکا پەی ئېمە کەراۋە و ئېمەی دەسەپاچە و بڕۋا بە وۍ نەبیەی پېسەو گەلەی ۋەرو وېشا بڎا !

بەداخۆ فرەو ئا کەسا، کە چە ناوچەو ھۆرامانی پېسەو ھەر بەشېۋو وەرکۆتی میانی و جەھانی، کە تاکو ئېسە وېشا بە سۆشیالیستواز ئەژناسنان و پېناۋۊ بەدیئاۋردەو کۊمەڵۍ ئازاڎ و یەکسانینە کوششاکەردەن و گیانو وېشا بەخشان، بنەمای ئەندېشەیی و میتۆدلۆجیی و ئایدیۆلۆجیی دژەکەیشا سەلەمنان و سەرو ئانە پاشاگېرتەنەرە، کە کەسە ستەمدیدەکۍ پەی ڕزگاربییەیشا پېۋیستشا بە سەرۊکی و ڕابەری و پارتیی ڕابەری و پارتایەتی و پارلەمانی و فەرماندار و فەرمانداریی و دۆڵەتی و ھەر پاسە دەزگەکېچشا سەرو بنەماو پیکئامای قووچکەیی مەرزنێنېرە و ھەرگیز نەتاۋانشا چە چوارچېۋەو سیستەمە ستەمکارەکەی بەربشا، چونکە میتۆدو ۋیرۆکەردەی و شېۋەو ڕېکۋستەو وېشا کوپیکریاو میتۆد و شېۋە و شېۋازو سیستەمە ستەمکارەکەی بییەن، یان درۊستەر ۋاچوو، ھەرچندە بە خیاڵو وېشا دژو سیستەمو سەرمایەداریی و یاساو بۆرجوازی گژیێبا و کۊششاکەردەبۊ، بەڵام سەرەنجام تەنیا ئاۋیشا ئاساۋو سیستەمە ستەمکارەکەیەرە کەردېنە و دۆڵەتشا بەھېزتەر کەردەن، کە تۊکمەتەرەین دەزگەو سەروەری چینایەتین و تاکو ئاڎ [دۊڵەت] مەنۊ، دلېنەبەردەی سەرکوت و نایەکسانی و نادادپەروەری و سەروەریی چینایەتی ھەر مەنا و ئەستەما دلېنەبلا.

---------------------------------------

فەرھەنگڵە :

هۊش : وعي

ئاۋەز : العقل

ۋیر : ذاكرة

تیئۆری : ۋیردۊز / نظریة

چین : طبقة

تۋ : توێژ

چۆسیا : چەوساوە

ڕامیار / ڕامیاری : ساسی / سیاسة

ڕاۋەبەری : ادارە

ملھوڕی : ستەمکاری ، زۊرداری

ئەزموونگیری :  فېربیەی و یاڎگیری چە ۋەرەنجامو چالاکی جەستەیی و ھۊشی

کۊشش/کۊششکەردەی : ھۆڵ/ھۆڵدای/ خەباتکردن/تێکۆشان/ مبارزە

کردە : پراکتیك

ۋەڵینە : مێژوو

فیلۆسۆف : فەیلەسوف

وەرکۆتی میانی : خۆرھەڵات / الشرق الأوسط

جەھان : جیھان / العالم

ئەندېشە : ھزر / فکر

سەرۊك : سەرکردە

پارتیی ڕابەری : پارتیی پێشڕەو

فەرمان / فەرماندار / فەرمانداریی : حکم / الحاکم / الحکومة

پیکئامای قووچکەیی : التنظیم الهرمي / تشکل هرمی

ئەستەم : مەحاڵ

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Saturday, 28 January 2017 17:13)