یانه‌

پەیامو ئەنجمەنی فەرەنگی هۆرامانی - سوید

پەیامو ئەنجمەنی فەرەنگی هۆرامانی( سوید)

پەی کار گېڵنا و بەشدار بیا جە گلېرۆ بیەو گرنگی دای بە ڕؤ جەهانی زۉانی ئەدایی جە هەڵەبجەنە.

وەشە ۉیسا ۉېنې هەرمانە بە نرخەکېتا چەمما پەنە کۆتې و بیې بە یاگې وەشحاڵی و دڵگەرمیما.

وەشبەختانە زانست ڕؤ بەرؤ بەرې تازې کەرؤۉە و دیارگێ و دەرەتانی تازې مرمانؤ. سەرو زۉانی ئەدایی تا ۉا لۉان ۉەرۆ کە باس کەرؤ ئانە کە زاڕؤڵە جە ماۉېۉی کەمەنە گنؤ قسې، بې ئەو نیا و مانێۉەش ئانېنە کە تەنانەت جە لەمەو ئەدێچشەنە دور جە شؤنەما ۉسەی زۉانو یانەی و بە تایبەت ئەدێ نەبیەن، ئەندا زۉان فېر بیەی سەختا و وەخت بەرؤ.

هەرپاسە باسا کە جە مەژگەنە ئا یانە کە زۉانی ئەداییش ۉەزؤنە تایبەتا و زۉانېتەر مەلانە ئاگە. ئینې تا ئیسە مرمانا کە گرنگی زۉانی ئەدایی هەر فرە زیاتەر چانەیەنە کە تا ئیسە باس کریان و باس کریؤ.  

ئینە هەرپاسە بەرۉزؤ کە چ زلمېۉا ئەگەر ڕا نەدریؤ زاڕؤڵې بە زۉانی ئەدایی پەرۉەردې با. کەیېۉ کە چېۉەکە تا ئی ڕادە ئینا دلې هەس و دەرونو ئینسانەکانە، ۉەرگیریش کەرؤ بە مدرای ۉەراۉەرو سرشتیشاۉە، یانې چەنی تا تا هیزی چەپ دەسی بە ئاهو نریېرە و چەپ دەسەکې مەجبورې کریېنې تا بە ڕاس بنۉیسا، مەجبور کەردەی ئینسانی جە پەرۉەردەنە بە زۉانېۉتەر، هەمان مانا پېدا کەرؤ، یانې ئانە کە مەجبورش کەری تا دەس جە سرشتو وېش کېشؤ.

ئەگەر باۉەڕما چامنەنە کە ئینسانە ژیر و زاناکې متاۉا جە ئارامش و جە ۉەرۆبەردەو کؤمەڵگایەنە دەسشا بؤ، دەی مشیؤ ئا سیاسەتې کە گنانە سەرە راو پەرۉەردە بە زۉانی ئەدایی، نەختې کریا و ۉزیاۉە لا و ڕا دریؤ تا زاڕؤلەکېما کە وەشەۉیسې ئارؤی و  هەمېدې سەۉایمانې، بتاۉا بە زۉانی ئەداییشا بلا مەدرەسە. پەرۉەردە بە زۉانی ئەدایی تواناکا هەم وەش بەرۉزؤ و هەم خاس میاۉنؤشا پەنە.

هەر پاسە ئەر گەرەکما بؤ ئارؤ و سەۉای بتاۉمې دلې نەتەۉا دنیایەنە سەرېۉ بەر بارمې، مشیؤ جە ئاموزشو زاڕؤڵەکامانە ڕای درؤسە هؤر چنمې، یانې قیمەت بنیەیمېرە پەی زۉانی ئەدایی. یانې چا ڕانە هەنگامە هؤر گېرمې کە شمەی وەشەۉیسی چی ڕۉەنە و جە شارە هەمیشە نام بەرزەکەو هەڵەبجەیەنە پەرچەمەتا پەی بەرزە کەردۆ. ئافەرین و دەس وەشیما پەی شمەی بەڕېزی.

ئەنجمەنی فەرەنگی هۆرامانی(سوید)
2017-02-21

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌