یانه‌ رؤچنه قسېما چېشەنە و چېش موازمې؟

قسېما چېشەنە و چېش موازمې؟

 

 کەیېۉ کە کوردسان بە دەیان دژمەنا دۆرە دان و مەردمو کوردیچ دلې بازارو سیاسەتانە ڕا ئەنە بەختەو وېش مەبەرؤ. کەیېۉ کە گرفتې ژیۉای، نەبیەی ئازادی و بە هیچ 

گیریای مافەکا مرؤۉی و دەیان گرفتې جدیېتەرې کەلەبەرەشا پا مەردمیە گرتېنە، ئېمە ئینایمې چکؤنە؟
 ئېمە جە فرەو ئانیشانە هام بەش و شەریکې باقی پېکئاماکا کوردسانیەنمې. بەڵام سەرەڕاو گردو ئانیشا سەیەو نەبیەی بازېۉ چا چېۉانە کە باسشا ئاما و چانیشا نەبیەی دیمؤکراسی و سەقەت کۆتەی ئازادی، بڕېۉ گرفتی تایبەتیېچما پەی وەشې بیېنې و هەنې.

 هەرچند ئېمە جە ئەۉەکەردەی ئا گرفتە هامبەشانە بیېنمې و هەنمې و ئینایمې چەنی باقی مەردمو کوردسانی، بەڵام گرفتە تایبەتیەکې وېما پېسە ۉېران بیەی یاگې ژیۉای و کولتور و ئەڵبەتە زۉانەکەما هیچ خواینای هؤر مەگېرا و مشیؤ هەر ئیسە یؤ بلؤ دەمشاۉە، ئەندا سەۉای دېرا.
 یؤ چا گرفتە هامبەشا کە وەش وەش مزیؤنە و کریؤ بە پاساۉې پەی بې بەش ئەۉە ئاستەی ئېمە، ئانەنە کە کورد زۉانی سەراسەریش نیا و پەی ئانەیە وەعدې وەش کەردەی زۉانی یؤ گرتەی مارانە و چەنی ئانەیچە ملا شؤنیەرە تا باسې ستاندارد بیەیش ۉزا سەرو زۉانا....
 زۉانی یؤگرتە کە جەمېۉ جە کوردا باسش کەرا، هیچ لێۉۆ پێش ئەرە زەمین مەیاۉا و کەیېۉ کە زۉانی یؤگرتە نیا و باسېش باسې وېڵېنې و قسې سەرو ستاندارد کەردەیش وېڵانەتەرې و ئەنە ئاردەی ئی باسا و سەرنۉشتو زۉاناتەریشا پۆ بەسەی، یانې یؤی شؤنەو ئادرەسی هەڵەیەرە کیاستەی. 
 کارم نیا سەرو بازېۉ کەساۉە کە سەرەشا قاڵا و یا جە مېدانو زۉانانە شارەزایی چامنەشا نیا بەڵام ئانې کە ئی ۉېرانا وەشې کەرا و مەردمشا منیا دیارۆ بە ڕاسی قاڵتاقېنې و خاس مزانا چېش کەرا.
 ئانې کە دەرهەق بە زۉانو ئېمە پی جؤرە مەیانە مېدان و بە حەسابو وېشا خەریکېنې شیرە گېرانە سەرەما وپەی نا کؤگە ئاۉایما کیانا، چۆلاۉە ئینە ساڵیانی ساڵا شەو و ڕؤ خەریکېنې، ئەرې بە حەسابو ئېمەیچ، خزمەتو زۉانی سؤرانی کەرا، تا بیاۉناش پەنە و پېسە زۉانی سەراسەری کوردسانی یاگېش کەراۉە. 
 ئیسە ئا زۉانە و بە تایبەت جە کوردسانو باشوریەنە ئینا گرد ڕەگ و پؤسېۉو ئا کؤمەڵگایەنە. هەر جە نامە نیایۆ و دلې لەلۉېنە تا لا تەڵقینا و دلې قەبرېنە خەریکا بە ڕېزۆ هەرمانېش پەنە کریا و هەرمانېش پەی کریا. ئیتر چېگە و چاگە و ۉەراۉەرو دۉاکاریا ئېمۆ باسو زۉانی یؤگرتەی، ئەر ڕوەو نەزانیۆ نەبؤ چ مانێۉەیتەرەش متاۉؤ بؤ بېجگە جە عەوام فەریبی.
 جیا چینەیە باسو زۉانی سەراسەری نەتەۉەو کوردی، زەمانېۉ متاۉؤ ماناش بؤ کە کوردسان پېسە کشۉەرېۉی سازمان دریؤ. کە ئا وەخت ئېمەیچ پېسە یەک جە کارۉانو زۉان دارا کوردسانی( کرمانج، بادینی،زازا، فەیلی، شەبەک، لؤڕ، کەڵهؤڕ، ئەردەڵان، لەک، گؤران و....) وېما ئاسایی قسېۉە ۉزمې سەرو ئا پەرسې.
 هەرپاسە ئی باسە کریؤ وەزنېۉەش بؤ ئەگەرهەرمانەو کوردسانی گۆرەی نزیکە بؤ و نەخزێبؤنە باوشەو ئوتؤپی، بەڵام هەڵای چا ڕواڵەتیچەنە نە مەسەلې زۉانو ئېمە بینیێنە پانەیۆ و نە مافې زۉانو ئېمە گنانە سەرەڕاو ئانەیە. 
 کەیېۉ کە ۉیرې کوردسانی گۆرەی نیەنې ئارانە، مەنؤۉە کوردسانو باشوری کە چاگەیچ ئېمە بیمې بە شەریکې بادینانی و فەیلی و باقی پېک ئاماکاتەرو ئا کؤمەڵگایە. 
 ئېمە دژایەتی هیچ زۉانېۉی مەکەرمې. هیچ گولیچما نمێ ۉەنە کە سؤران چېش کەرؤ پەی زۉانو وېش، قسې ئېمە ئانېنە کە زۉانەکەو ئېمەیچ سەرەش با بې کڵاۉە نەمەنؤ. وەشیچا ئەر سیاسیې و ئەدیبې کوردی ئی باسیە ۉزا سارا و دەس جە فرسەت تەڵەبی و عەۉام فەریبیاشا هؤر گېرا.
 تاقېقاتې پەرۉەردەی باس کەرا کە زاڕؤڵە بە ئاسانی تا پەنج زۉانې متاۉؤ فېر بؤ بەمەرجېۉ کە زۉانەکەو وېش گنؤ ۉەڵې و پېسە بنەڕەتی تەماشە کریؤ. پا بؤنۆ مەبؤ بە گرفت کە چند زۉانې جە هۆرامانەنە بوونیا، گرفت ئانەنە کە زۉانەکەو وېما جە یانەو وېمانە شار بەدەر کریؤ. ئېمە گەرەکمانە هەرپاسە کە بەکردەۉە هەن بە دەسوریچ زۉانەکەما یەکەم زۉانو هۆرامانی بؤ.
 نەبیەیش چېۉېۉۉا کە مەکریؤ چەنەش ۉیەرمې و یا سازشش چەنی کەرمې ئېمە گەرەکمانە زۉانەکەما بە ڕەسمیەت بژناسیؤ، نەک پەی ئانەیە کە سەراسەرو دنیای و یا کوردسانەنە هەرمانە کەرؤ بەڵکو پەی ئانەیە چاگە کە یاگېشەنە بتاۉؤ ئازادانە پېسە دۆرەو ۉەڵې ئیسلامی و دماو ئیسلامی و لانی کەم پېسە دۆرەو ئاقا محەمەد خانی و فەتالی شای قاجاری ئازادانە بژیۉؤ.
سیامەند هۆرامی
 2017-02-24

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Friday, 03 March 2017 10:54)