یانه‌ رؤچنه مەملەکەتو هۆرامیەکا مەشېۉندې

مەملەکەتو هۆرامیەکا مەشېۉندې

چی ماۉەنە چند پەرسېۉ سەرو زۉانی هۆرامی ئامێنە دلې کە بازېۉشا ئېمەیچ برېۉ جواب دێۉە بەڵام هەر چی ماۉەنە جە لا بازېۉ دؤس و هەماڵاۉە داۉاما ۉەنە کریا تا فرەتەر

 سەرشا بلمې. منیچ بازېۉ چانیشامە گلېرې کەردېنێ تا پېسە پەرسې پەرسوشا جە وېم و پېسە جوابیچ جوابشا دەوۆ. بە هەمېدو ئانەیە وەشتەر بیاۉا و خاستەر بنیشا.

پ ـ بە پاو ئامارېۉی سەرپەنجەیی کە ئینا دەسو بازېۉیۆ، ماچیؤ ئەغڵەبو ئا کەسا کە باسو زۉانی هۆرامی مارانە، هۆرامیې بەشو هۆرامانو ئېرانیەنې و کە پاسەنە چی داۉا ئۆ حکومەتو ئېرانی مەکەرا؟

ج ـ پەرسېۉەی بە یاگېنە و جوباکەیچش ئاسانا. چون جمهوری ئیسلامی ئېرانی بە دنیایش ئەرمانان کە گؤشېش پەی ئی جؤرە قسا شلې نەبیېنې و نیەنې. ئاد هەر فرە بە ئاسان ملو وېش چی باراۉە ڕنیەنەرە. جمهوری ئیسلامی نە باۉەڕش بە مافا مرؤۉیا و نە قسې سەرو بەرابەری کەرؤ و نە سەرو کوردایەتی و کورد بیەی و گرد چون یۉەنمې و... قسېۉەش هەنە. پۆکەی ئېمەیچ سەرەما نیانۆ و چادیشا داۉا مەکەرمې.

پ ـ دەی خاسا شمە چی جە کوردسانو ئېراقی و یا ۉاچمې باشوریەنە، بەشو فرەو قساتا ڕو بە یەکیەتییا؟

ج ـ ١ـ چون یەکیەتی چ گەرەکما بؤ و چ گەرەکما نەبؤ ئا ئیسە دەسەڵاتو یەکەمو کوردیا جە مەنتەقەو ئېمەنە، سازمانېتەرې هەنې کە هەرمانې سیاسیې کەرا بەڵام زەڕ و تفەنگەکە ئینا لا یەکیەتیۆ.

 ٢ ـ ئېمە چەنی یەکیەتی تارېخېۉی هامبەشی خەباتکاریچما بیەن. دۆرانېۉما پېۉە دیەن کە بە هەردۉیماۉە حۆت ئاسمانەو سیاسەتیەنە بېجگە هەنترینی هەسارېۉە شکە نەبەرېنمې. ئا دۆرانە کە حکومەتەکې ئېران و ئېراقی سەیەو هەر نەفەسېۉې ئازادې خرابتەر جە ئیسەیە بە تیرە پېکېنې، ئېمە و یەکیەتی مەقەڕا هەنترینیەنە نگابانی هەنترینی دېنمې. ئېمە پېۉە ئەنە کەمینا کۆتېنمې و دەمو هەنترینیۆ لۉێنمې.

٣ ـ چو سەرۆ ۉاتم جمهوری ئیسلامی چی بارۆ ملو وېش ڕنیەنەرە، بەڵام یەکیەتی ئا کارشە نەکەردەن و بە پېچەۉانۆ وەختېۉ ساق و سڵامەتا دەنگېش چی باراۉە فرە دلېرېنې. یەکیەتی هاۉارېشەنې کە مافا مەردمی پارېزنؤ، باسو یەکسانیا کەرؤ، قسې سەرو دیمؤکراسی کەرؤ و خرابتەر جە گردی باسو سوسیال دیمؤکراسی کەرؤ و شانازی کەرؤ کە ئەندامو کەنگرەو سوسیال دیمؤکراسی ئوروپایا، دەی ئینې مەکریؤ هەر قسې با و هیچ. ئەندامو سوسیال دیمؤکراسی ئوروپای خەرجش هەن.

فرە یاگېۉە باسو دیمؤکراسی ئوروپایی گەرما و لا ئېمەیچۆ هەر پاسە، دەی ئېمە کە ئینایمې بەرو وەڵاتیۆ، فرېما بە دەیان ساڵېن ئینایمې دلې دیمؤکراسیەنە و مژیۉمې. هەر هیچیچما نەزانا بؤ خودو دیمؤکراسی فېرې کەردېنمې کە دیمؤکراسی و مافې مرؤۉی کامە جۆهەرشا هەن و چەنی جیێ کریاۉە جە قسە هاڵیا.

پ ـ خاسا ماچا جە حاڵېۉەنە کورد دەسو بې نانی و بې ئاۉی و بې کارەباییۆ ناڵؤ کەی وەختو ئی باسانە؟

ج ـ ڕاسا گرفتې کوردی چاۉ زیاتەرېنې کە باسشا کریؤ. بەڵام مەسەلې زۉانی و فۆتیایش، خاڵانەو مەسەلې زاڕؤڵەی نەوەشیەنە، و مەکریؤ بنیشی دیارۆ تا خەلە و خەرمان بیاۉا پەنە ئیجا بەریش دوکتؤر. تەنیا ئېمە نیەنمې کە ماچمې زۉانی هۆرامی ئینا خەتەرەنە، بەڵکو سازمانې و کەسې سەرە بەرشیې دنیای و چانیشا سازمانو یؤنسکؤیېچ ئی باسا کەرا. هەر ئانېچەنې کە ماچا مشیؤ چېش کریؤ و چانیشا دەرمانو ئۆ مەدرەسە بەردەیش مرمانا.

پ ـ بازېۉ سەرە سڕمەنەی بەرۉزا و ماچا" چەنی کریؤ کەسې هیزی کومؤنیستې و ئېنترناسیؤناڵې ئارؤ داۉاو مافا زۉانی کەرا؟"

ج ـ ئی پەرسې پی شېۉە یا بنەمای مارېفەتیش هەن، یانې ئانە کە کابرا مەزانؤ چېۉەکە چەنینا و یا ئانە گەرەکشا باسەکەی شېۉنؤ، ئەندا کومؤنیستەکې هەمیشە جە ۉەراۉەرو بې مافی مەردمیۆ هەسیارتەرینې بیېنې. چېگەیچ ئېمە بەشېۉەنمې جە مەردمو هۆرامانی و بە ئاشکرا ۉینمې کە ناسیؤنالیزمو سؤرانی تېخېش کېلانەنە بەر کېشتېنې و خەریکا زؤرې کەرؤ. جا پۆکەی بە ئەرکو وېماش مزانمې کە بې دەنگې نەبیمې. هەر فرە سادە ئېمېۉ کە قەرارا سەرو شیلی بەیمێ جواب، مشیؤ چېشما بؤ کە سەرو وېما و مەردموکەو وېما نەیمێ جواب؟

ناسیؤنالیسم خرابا چون بە بارېۉەرە زؤر کەرؤ و بە بارېۉەرە تەفرەقە مارؤنە. کومؤنیزم گەرەکشا ڕېخې زؤری لابەرؤ و جە مېدانو یەکسانیەنە پېۉەنیې وەشې کەرؤ. ئانې کە ئا پەرسې مارا بڕېۉشا نەیاۉێنېنە کومؤنیزمی و بازېۉیچشا ئینێ شؤنیۆ تا ئاۉەکې لېڵە کەرا.

ئېمە تا هیزی کە مەردمو کوردی جە کوردسانو باشوریەنە، چېرو چەپؤکا ناسیؤنالیزمو عەرەبیەنە بې بە پاو شێدی تارېخی جە گرد سەنگەرېۉەنە چەنی ئا مەردمیە و سیاسیاشا بېنمې و جە زۉان و کولتور و هەرچی ئادېش سەر دریێبا ۉەرو زؤری، پارېزگاریما کەردەن، بەڵام ئارؤ وەزعەکې فاڕیێنە. جە کوردسانو باشوریەنە زۉانو سؤرانی تانگ و تؤپش هەن، کادرې دەمو دەسگایاش دلې مېلیارد دؤلارانە کەی کەرا. ئا زۉانە و سازمانېش زؤرشا، مەلؤ ۉەنە بەڵکو خەریکېنې زؤر کەرا. دەی کومؤنیزمیچ نەۉاچؤ هەر عەداڵەتە کؤنەکەو وېما ماچؤ مشیؤ نازی زؤر کەرؤ و مشیؤ لا زؤر ۉەنە شیەیەنە بې. ئېمە گولما مێۉەنە شېعە زؤر کەرؤ سننی و یا سننی ئۆ شېعەی، سەخت سەختما مێ ۉەنە ئیسلام زؤر کەرؤ ئۆ ئیزەدیا و زەردەشتیا. دەی هەر پا جؤرە کە لاماۉە یاگې پەسەندی نیەنە شؤۉؤنیزمو فارس و یا ترکی زؤر کەرا ئۆ کوردی، لاماۉە ناپەسەندا کە شؤۉؤنیزمو سؤرانی جە قؤڵې سازماناشۆ بزیؤنە و زؤر کەرؤ ئۆ مەردمو هۆرامانی.

پ ـ ئېراد گېرا کە گوایا زاڕؤڵې ئېمە مەزانا کوردسان چکؤن و خرابتەر چانەیە مەزانا هۆرامیانە قسې کەرا. جواب پەی ئینەیە چېشا؟

پ ـ ڕاسا زاڕؤڵې ئېمە زۉانی هۆرامیانە خاس مەزانا، ئەڵبەت نەک گرد، چون بڕېۉ بە هەقېقەت خاس مزانا. بازېۉیچما هەر بە ڕاسی زامەتما کېشتەن، وەلې مشیؤ ئانەما ۉیر بؤ کە ئېگە مەملەکەتو زۉانو ئېمە نیا، کوجیېۉە نیەنە و قۆم و کەسېۉ نیا، و ئی هەرمانې بە ئاسان مەلؤ ۉەرۆ. من هۆرامانەنە کە مەملەکەتو زۉانیو وېما، ئەگەر هەردۉە سەرەیچ هەتیم بو هەر فېرو زۉانی بو بەڵام ئېگە پاسە نیا.

زاڕؤڵې ئېمە بې ئاگێ جە وەزعەکې نیەنې. ئادې جە مەدرەسەنە وانانشا و موانا کە کوردسان ئینا چکؤ و مەردمش ئینا چ ڕەنجېۉەنە. هەر پاسە موانا و مزانا کە نرخەو زۉانی ئەدایی چېشەنە و بې مافی مەردمی بە چ مانێۉەنە. تازە خؤ ئېمە داۉاما نەکەردېنە کە دەسەڵاتو کوردی کە زامەت دؤ بە وېش و بێ چېگە مەدرەسە پەی زاڕؤڵە زۉان فېر نەبیەکا ئېمە بنیؤرە، بەڵکو قسېما ئانېنە کە چاگە یانې جە تەۉېڵې و بیارې و بەڵخە و خؤرماڵەنە و پەی ئا زاڕؤڵە سەدی سەد هۆرامی زۉاناشە، بنیؤرە.

پ ـ ماچا هۆرامانو باشوری چل هەزارېۉا و کەما،
ج ـ بەڵې ئی قسې کەرا، بەڵام نە زانست و نە دیمؤکراسی و نە مافا مرؤۉی پېسە نمەیانە مېدان، بەڵکو باس جە مافی کەرا. ئەگەر جیای چل هەزارا چل کەسېچ با هەر مافو وېشانە کەمەدرەسەشا بؤ و جە زۉانەکەیشا کەڵک بەرا.

پېسە کابرای ڕؤمی ۉات" پەی ئا کەسا کە مەملەکەتشا نیا، زۉانەکەشا کەرؤ بە مەملەکەتشا و دلېشەنە هەس بە ئەمنیەتی کەرا" حەیفا نەدیەیمېنە ۉەر و بؤنا خاترو خاتر داراۉە، مەملەکەتو هۆرامیەکا شېۉنمې.

سپاس پەی شەمە کە وانەرې ئی خەتا بیەیدې!

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌