یانه‌ رؤچنه پرسیارېۋە

پرسیارېۋە

جە خاتوونە دەسەڵاتدارەکۊ ھۆرامانی (خاتوو نوخشە)

دماو سڵام و ڕێزی، ئومیدوارەنا پېسە ھەر تاکەکەسېۋو ھۆرامانی پەیگیرانە بە ئی پرسیارۍ گرنگیدەی و وەڵامۆدایش بە خەمو وېت بزانی.

خاتوونۍ بەڕێزە، ھەر پاسە خەڵکو ھۆرامانی شانازیکەرۊ، کا خاتوونەکېش ڕاۋەبەرییەنە بەشداریکەرا، ھەر پاسەیچ چەمەڕۋانیشا ھەن، کە خاتوونە ھۆرامییەکۍ خاستەر و دڵسۊزانەتەر چە دەسەڵاتدارە پیاکا  ئۆ ۋێرانمەنەی ھۆرامانی لاکەراۋە و بە ھەستی ئەڎایانەو وېشا چنی پەرسەکا ڕۊزگاری بەرخوردکەرا، نەك بە ھەستی ڕامیارانە، چونکە ڕامیاریی دنیاو ئېمەش ناشیرین و گڵیاۋکەردەن، کولتوورو ئېمەش شېۋنان، کەسایەتی ئېمەش لاۋازکەردەن، ھوشیاریی و ژیری و ئاۋەزو ئېمەش دلېنەبەردەن و ھەرەوەزی و کۊمەککاری کۊمەڵایەتیش دلېنەبەردەن و قینەبەرۍ پارتایەتیەش پەرەپنەدێنە.

خاتوو نوخشەی بەڕێز، پاسە وېت مزانی دەربازەی مەرزی میانو (تەۋېڵۍ و شۊشمۍ) یۊن چە دۋە دەربازە مەرزییە فەرمییەکا سەرنیشتو عیراقی، کە ساڵۊ ١٩٥٧ دۆڵەتو عیراقی سەرش بڕیارشدان و تاکو ساڵۊ ١٩٧٥ تەنیا دەربازەی مەرزیی تەۋېڵۍ-شۊشمۍ و حاجی دەربازەی مەرزی ھۊمەرانی مەرزی فەرمیۍ بیەنۍ و جاریۋتەر ساڵۊ ٢٠٠٥ دۆڵەتو عیراقی چە بارەو ئەۋەکەردەو دەربازەو مەرزو تەۋېڵۍ-شۊشمۍ'ش بڕیارشدان، بەڵام بەداخۆ تاکو ئیسە ئا بڕیارۍ چە لایەنو فەرمانداریی ھەریمو کوردستانی پەیڕەۋنەکریێنە و جیاتی مەرزو (تەۋېڵۍ-شۊشمۍ) مەرزو گۊخڵانی بازکریان و گەشتیارۍ چاگۆ ھاموشۊکەرا. ئانە کاتېۋەنە، کە نزیکترین ڕا پەی یاۋاو گەشتیارا بە فرەو شارەکا ئێرانی، تەنیا مەرزو (تەۋېڵۍ-شۊشمۍ)ن، چونکە چە کرماشانی نزیکا و چە فڕۊکەخانەی میادۆڵەتی کرماشانیۆ ھەر ڕۊ چندنین گەشتۍ ئاسمانیۍ پەی ھەشت(٨) شارا تەرو ئێرانی و ھەر پاسە چندین گەشتۍ پەی پەنج (٥) وڵاتا تەری ھەنۍ، کە ھەم پەی گەشتیاری ئاسایی و ھەم پەی کەسانی نەوەشی و ھەم پەی بازرگانا نزیکترین و کەم خەرجتەرین ڕانە. بەڵام مەرزو باشماخی، کە مەرزی میاندۆڵەتی نییا و گەشتیارۍ و نەوەشۍ و بازرگانۍ دېرتەر میاۋا و ھەر ڕۆ چە فڕۊکەخانەو سنەی تەنیا یەك دۋۍ (٢) گەشتی ئاسمانی پەی تارانی ھەنی. بېجگە ئانەیچە، ئەۋەکەردەو دەربازەو مەرزو تەۋېڵۍ-شۊشمۍ بارئاۋەری دەرامەتن پەی خەڵکو گردو دەگاکا ھۆرامانی و بۊ بە ھۊکارو ئەۋەکەردەی چەندین چاشتخانا و میمانخانا و بازارە گۆرا ھەر چە خورماڵ تاکو ڕۋانسەر، دەگا بە دەگا چە ھامۊشۊ گەشتیارا بەھرەمەندۍ با و ھەر پاسە ئەۋەگېڵای ھۆرامییە ئاۋارەکا پەی دەگاکاشا و ئاۋەڎانبیەو ھۆرامانی و ئەۋەژیۋای بازرگانی و گەشتیاریی چە ناوچەکەنە بەدیمێۋ.

ئەگەر چا خاڵېچە ۋییەرمۍ و چە گرنگیش چەمپۊشیکەرمۍ، دیسان چنی نالەباریېۋی تەری ڕووبەڕووبیمۍ، کە جیاتی ئەۋەکەردەو مەرزو (تەۋېڵۍ-شۊشمۍ) پەی گەشتیاریی، کەچی مەرزو (تەۋېڵۍ-شۊشمۍ) پەی ئاۋردەو (خوڵۊ گۊگردۍ) تەرخانکریان، کە خەڵکو ناوچەو مەرزەکا تەری ڕانمەڎا ئا مادە زیانبەخشە مەرزەکاشارە بریۊ، چونکە پەی ژیۋاری و تەندرۊسی خەڵکیچ زیانبەخشا و بەداخۆ ئا زیانە ژیواریی و تەندروسییە جیاتی ئاۋەڎانکەردەو ھۆرامانی و ئەۋەکەردەو مەرزی گەشتیاری (تەۋېڵۍ-شۊشمۍ) بە خەڵکو ھۆرامانی پېشکەشکریان و پاسە دیارا باجوخەراجو  ئاۋردەو ئا مادەیە، پەی ھۆرامانی و خەڵکەکەیش نەبیەن.

ئایا پەی شمەی بەڕێزی کە بە پاڵپشتی خەڵکو ھۆرامانی بە پایەگای دەسەڵاتداریی وېت یاۋێنۍ، ئا دۋە نادادوەریی نەبیینۍ بە پرسیارە و یەخېشا نەگیرتېنی؟       چی نەوەشکۆتەو خەڵکو نۆسووڎۍ و شۊشمۍ و تەۋېڵۍ و سۊسەکانی بەڵخەی و دەگاشیخانی و بیارۍ و زەردەھاڵی و خورماڵی بە ھۊ ۋەڵابیەو تۊزۊ ئا مادەیە، کە بە گەڵابۍ سەربەتاڵۍ ماریۊ، نەبیەن بە خەمو تۊ پېسەو خاتوونېۋی ھۆرامیۍ ؟

خاتوونۍ بەڕێزە، تۊ پېسەو ھەر ھۆرامی-زۋانېۋی و ھەر پاسە پېسەو خاتوونېۋۍ دەسەڵاتدارۍ و پېسەو ئەڎێۋۍ مشیۊ ئامادەیی وەڵامۆدای مێژوویت بۊ، کە سەردەمو دەسەڵاتداریی تۊنە ئا ناداڎۋەریی ۋەرانۋەرو ناوچەو ھۆرامانی کریا و ھیشتا ھۆرامان ۋېرانەو بەرەو جەنگەکا عیراقی و گروپە ئیسلامییەکان و ئەگەر یانېۋ کریابۊۋە بە ھۊڵو خەڵکی وېش بییەن و چە دەگاکا ھۆرامانییەنە، کە ھەم ۋېرانەو بارکەردەو ١٩٧٨یەنۍ و ھەم ۋېرانەو جەنگو عیراق-ئێرانیەنۍ و ھەم ۋېرانەو دەسەڵاتداریی گروپە ئیسلامییەکانۍ، یەك تاقە یانە پەی خەڵکە ئاۋارەکەی نەکریانۆ، ئینە کاتېۋەنە کە ساڵۊ ٢٠٠٣ تاکو ٢٠١٣ ناوچەکا تەرو ھەرېمو کوردستانییەنە یانۍ و پڕۆژۍ کریێنێ و بەراورد بە ناوچەو ھۆرامانی تاکو ڕادېۋ گرنگیدریان و ئاۋەڎانۍ بیینۍ و چە خزمەتگوزاری بەھرەمەندۍ بیینۍ، بەڵام سەرتاپاو ھۆرامانییەنە نە خەسەخانە و نە پزیشك و نە پەرتووکخانە و نە وەرزشگا نییەنۍ، بەڵام ڕا سەربازییەکۍ سەردەمو جەنگو عیراق-ئێرانی پانوپۊڕتەر کریێنۍ و بیینۍ بە ھۊکارو ۋېرانبیەو باخەکا ھۆرامانی و کەمی بەرھەمی و پیسبیەو ھەۋای و بە شەخەڵگابیەو دەگاکا ھۆرامانی پەی سەیرانکەرە ۋېرانکەرا.

جارېۋتەر پېسەو نۋیسەرېۋی ھۆرامی-زۋانی دەسو ھامکاریت فشارو و ئومیدوارەنا ئی ۋەھارەیە فاڕی بە ۋەھارو بڕیارداو ئاۋەڎانکەردەو ھۆرامانی، ئەگینا مێژوو چە ھیچ کام چە ئېمە چ دەسەڵاتدار و چ بېدەسەڵاتی نادەربەسی وەشنمەبۊ.

نۋیسەر

ئاکۊ مارانی (یەدوڵڵا شەفیع محەمەڎ)

ڕېکۆتو ٩و نۆرۊزو ٢٧١٧ ۋەرانۋەر بە ٢٩و ئازارو ٢٠١٧

سەرنج : پەی ئاگاداری من پېسەو کەسېۋی تەۋېڵەی سی و شش (٣٦) ساڵېن وڵاتەو وڵات ئاۋارەنا و ناوچەو ھۆرامانی بېجگە چە خەم و پەژارەی زیاتر پەی من ھیچش نەبییەن و چاگە نەژیۋانا، بەڵام چنی ئانەیچە خەمو شەۋ و ڕۊ من، ئاۋەڎانبیەو ناوچەو ھۆرامانین، تەنیا ئومیدېۋم ھەن، کە بە ڕادەی کەم ئیڼەو سەردەمو ۋەڵۍ بارکەردەو دەگاکا و ۋەڵۍ جەنگو عیراق-ئێرانی، ھۆرامان ئاۋەڎان بۊۋە و گرنگیش پنە دریۊ.

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌