یانه‌

ژەن کوشتەی

ئیتر ھیچ کەس دەم پان نەکەررۊۋە و نەۋاچۊ خەڵکو ھۆرامانی ژەنکوژ نیا

ئایا بېدەنگی ۋەرانۋەرو کوشتەو کناچېۋی چە تەۋېڵۍ/ھۆرامان نیشانەو ڕەزامەندی نیا بە ژەنکوشتەی؟

ئایا ئانە ڕەزامەندی نیا، کە کوشتەو کناچېۋۍ/ژەنېۋۍ ۋیس و چوار ساڵۍ بە "مەرگێکی ناخۆش" پەردەپۊشکەری؟

ئایا (مەرگی وەش) ھەن ؟

من پېسەو وېم، کە بەھەشتو وەرمەکام تەۋېڵۍ بۍ و چە ساڵۊ ١٩٩٤ تاکو ئیسە تەنیا ئاۋاتم دیەی جارېۋتەرو تەڤېڵۍ بۍ، ئیسە ئیتر ھیچ دڵوەش و سۊزدارییم پەی دەگێۋۍ چامنی نەمەنەن، کە بییبۊ بە نشینگاو ژەنکوشا، بییبۊ بە نشینگاو بېدەنگا ۋەرانۋەرو کوشتەو مرۊڤېۋی.

ئارۊ کە ھەۋاڵەکەم ئەژنەۋی، بە وېم ۋات با مدروو و پەلەنەکەروو، بزانوو نۋیسەرەکۍ ھۆرامانی، بزانوو وۍ بە ڕۊشنۋیرو و ھونەرمەندە نامدارەکۍ ھۆرامانی چېش ماچا و تاکو چڼە پابەندو پاگەندەکا وېشانۍ؟

تکاکەروو، ھیچ کەس پەنا پەی پاساۋئاۋردەی نەبەرۊ و نە ۋاچوو "ئانە کېشەی خانەوادەیین و من پەیم نیا قسۍ کەروو"، نەخێر ئانە کېشەی خانەوادەیی نیا و تاۋانی چامنە ۋەڵینە/مێژوو گردو ھۆرامانی بە گردی و تەۋېڵۍ بەتایبەتی لەکەدارکەرۊ و ئیتر ھیچ کەس چە ئېمە ھەر یاگېۋو دنیایەنە بژېۋۊ، چنی ڕۊەش مێۋ و بۊ، پەیش بۊ دەم کەرۊۋە و باسو یەکسانی ژەن و پیای و ئازادیوازی کەرۊ؟

تاکو ھیزی شارەزوور و سلیمانی و ھۆلیر و کەرکووك و گەرمیان و خانەقین و بادینان، ھەر ژەنېۋە کوشیێ، ھۆرامی زۋانەکۍ یەکەمین کەسۍ بېنۍ، کە وېشا کەرېنۍ بە دەمراسو یەکسانی ژەن و پیای و شانازی وېشا نیشاندېنۍ.

بەڵام ئارۊ، کە خێڵایەتی پارتییایەتی/حزبایەتی سەراپاو ھۆرامانیش گیرتەنەرە و چەکش دان دەسو خېڵچییەکا [ئەندامی و لایەنگری لایەنەکا] و قوڵایی ھۆرامانییەنە ژەنی کوشا و ھیچ کەس مەیارۊ نامېشا بەرو و سەرکۊنەشا کەرۊ.

ئیتر ئیسە من بېجگە نەفرەتی و تووڕەیی ھیچم پەی تەۋېڵۍ و ھۆرامانی و خەڵکە بېدەنگەکەیش نیا. ھیچ شانازییم نەمەن و ھیچ قسېۋەم پەی کەردەی نیەنە.

ئازیزم، واڵە جوانە مەرگەکېم (چرۆ) گیان، ھەرچڼە من تۊم نەڎیېنی و ئەڎا و تاتەیت نمەژناسوو و تەمەنو تۊنە من تەۋېڵۍ'م نەڎیېنە، بەڵام مەرگو تۊ کزەش چە جەرگو من ھۊرزنا و ھەرچی وەرمېم پەی ھۆرامانی بېنۍ، داخۊ مەرگو تۊ کەردۍ بە قەقنەس.

ھەر پاسە، کە ساڵۊ ٢٠٠٧ چە سلیمانیە ۋاتم تەنیا کاتېۋ متاۋمۍ چە ژەنکوشتەی و قوربانیبیەو (دوعا)کا گېرمۍ، کە یاگۊ کوشتەیشەنە پەیکەرېۋش پەی کریۊ و گرد لێۋو ھەرېمیۆ کارۋان کارۋان خەڵکی ئازادواز پەی زیاتەریش بلۊ، ئاروچ دیسان ماچووشۆ، ئەگەر تەۋېڵەیەکۍ، ئەگەر ھۆرامەکۍ گەرەکشانە مەرگو تۊ پېسەو لەکەو شەرمەزاری میاچەماو وېشاۋە بسەڕاۋە، مشیۊ مېڎانو تەۋېڵۍ'نە پەیکەرېۋ پەی تۊ تاشاو ئاڵېۋە دەستۆ بۊ و سەرشۆ نۋیسیابۊ (ژەنکوشتەی ۋەڵینەو ئېمە ھۆرامەکا نەبیەن و ھۆرامان یاگۊ ژەنکوشاش چنە مەبۊۋە)

ئازیزم، بەخشەم کە ھەزاران کیۆمەتری دوورەنا و تەنانەت ئەگەر چاگەیچ بیەینۍ، بە تەنیا بېجگە گرەۋێۋی قووڵی سەرو مەزاریتۆ، ڕەنگا ھیچم پنە نەکریێ. بەڵام دڵنیابە و بەڵێن بە تۊ و تەمامو ژەنا و تەماو قوربانیا چەکی و جەنگی و پارتییایەتی/حزبایەتی و پیاسالاری مڎةو، تاکو دما ھەناسە ھەرگیز نمازوو یاڎتا چە ۋیر بەربشۊ و ھەرگیز نمازوو ۋیژدانی سڕبیەو خەڵکو تەۋېڵۍ و ھۆرامانی ئاسوودە بۊ و دماو مەرگو ھەر ژەنېۋی دەسېش سمېڵۍ پیاسالاریشەرە بارۊ.

ئازیزم، فرە چە وېم و پیایی وېم و تەۋېڵەیی-بیەی وېم و ھۆرامیی-بیەی وېم شەرمەزارەنا و نەفرەت ئۆ ھەر کولتووریۋی، ھەر ئایینیۋی، ھەر مرۊڤیۋی کە ئاستو کوشتەو گیاندارانە بیدەنگا و ڕەۋایەتیش پنە مڎۊ و پاساۋش پەی مارۊۋە. پەی من و بە پەیلۋاو من تەنیا کەسېۋ یان دۋۍ کەسا تۊشا نەکوشتېنی، بەڵکو گردو ھامساکاتا، گردو تەۋېڵەیا، گردو ھۆرامیا، گردو ھەرېمو کوردستانی، کە ۋیس و شش ساڵین بیەن بە نیشتمانو ژەنکوشتەی و تیرۆرو ئازادیوازا، گرد بە بېدەنگیشا پشتبۋانۍ بکوژاو تۊنۍ .

بوەخشەم ئازیزم، بەڕاسی نمەزانوو کە ھامخەمو کۍ بۊ، ئەڎێت، تاتەیت، واڵات، برایات، مەتیەزایات، لاڵۊزایات، کناچا کوجیەکېتا، مەزانوو کۍ، چونکە دڵنیانیەنا کامشا ھامپەشتو بکوژەکەو تۊن و کامشا خەمبارو مەرگو تۊن، کامشا خەریکا بە بەرتېڵ و گەواھی ساختە بکوژەکەو چة سزای ڕزگارکەرۊ و کامشا گەرەکشا بکوژ ڕسۋا کریۊ، تاکو جارېۋتەر ھیچ ھۆرامېۋ نەیارۊ ژەنی، پیا کوشۊ؟

وەڵە جوانە ەمرگەکېم، ئارام ئارام باوەشۊ ئەڎا زەمینیەنە بوووسە، چونکە کۆمەڵەکا ئی سەردەمەیەنە ڕاو و یاگۍ مرۊڤی مەبۊۋە و نەمەنېنە، تەنیا کەسی ڕامیار و مشەوەر و دەسەڵاتدار و ساختەچی ڕاش بۊۋە و بەربەرۊ.

نەفرەت ئۆ چەکی، نەفرەت ئۆ ڕامیاریی، نەفرەت ئۆ پارتایەتی، نەفرەت ئۆ پیاسالاری، نەفرەت ئۆ کەسانېۋی کە ۋەرانۋەرو لوولۊ چەکیۆ بېدەنگی ھۊرۋچنا، نەفرەت ئۆ ھەر کەسی کە پاساۋ پەی ژەنکوشتەی مارۊۋە!

ئاکۊ مارانی

٨و ئایارو ٢٠١٧

سات : ٢٣:٣٤


 


 


 

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌