یانه‌ رؤچنه ھەنگامۍ کردەیۍ پەی

ھەنگامۍ کردەیۍ پەی

ئاۋەڎانکەردەو ناوچەو ھۆرامانی و ئەۋەگېڵنای زۋانی ھۆرامی پەی بوارو وەنەی و ڕاۋەبەری
(پەی مەتڵبەکەی کلیکو ئېگەی کەرە)

وەنەری ئازیز، ئانە کە چېگەنە من پېسەو پېشنیارېۋۍ ۋەرو چەماو شمەی ئازیزیش ۋزوو، تەنیا ۋیرۊکەو منا و پەیوەندیش بە ھیچ کەس و لایەنېۋی تەری نیا و من پېسەو کەسېۋی ئازاڎیوازی و سەربەوۍ بە نۋیستەی و ئامادەکەردەی ئی ھەنگامە سەرەتاییا ھۊرزتەنا. وەڵامدەرو ھەر ڕەخنېۋۍ و ھەر سەرنجېۋو شمەی ئازیزی، ھەر من وېمەنا و بە پەیلۋاو من، ھیچ ۋیر و پېشنیار و نۋیستېۋیچ نیا، کە لاو سەری ڕەخنەیۆ بۊ و مافو گرد کەسېۋی و گرد وەنەرېۋین، کە ئازاڎانە ڕەخنۍ و سەرنجۍ وېش ئاراستەو ئی دەقەیە کەرۊ و چە ئا بارۆ من وېم بە سپاسگوزارو ھەر کەسېۋی مزانوو، کە ڕەخنۍ و سەرنجۍ وېش بنۋیسوو و ۋەڵاکەرۊۋە. ھەر پاسە سەرو ئا بنەمایە کە قسەکەردەی چە بارەو ڕاۋەبەری ھەر کۊمەڵېۋۍ مافو گرد کەسیۋین، منیچ ئا مافەیە بە وېم مڎەوو و ئی دەقەیە منۋیسوو و بە شمەی ئازیزیش پېشکەشکەروو.

ھەڵبەتە پېۋیستا ۋەڵۍ گرد چېۋېۋیەنە بە شمەی ئازیزی ۋاچوو، کە من نە پلە و پایە ئەکادێمیستیم ھەن و نە گەرەکیچما نامۍ و نامبانگ پەی وېم تاشۊ یان وېم بە (ژیرلەو مەرۍ) بنیەورە، ئانە کە ھەن و من سەرش ھەرمانەکەروو، ئارەزوومەندیېۋی وېڕستو سەردەمو زاڕۊڵەی وېم و دماتەر کارایی وەشەۋیسی تاتەیم پەی زۋانی ئەڎایی وېش (زۋانی ھۆرامی) و ناوچەو ھۆرامانی بیەن، کە ئاڎ بە بەھەشتو سەرزەمینی نامېشبەرۍ، منش پەی گرنگیدای بە زۋانی ئەڎایی و کولتوورشناسی و شیکاری سەرو پەیوەندییە کۊمەڵایەتییەکاو خەڵکو ھۆرامانی ھاندانا. ھەر چېرو ئا کاراییەنە و بەپاو وېفېرکاری و ئەزموونگەریی وېم تاۋانم سەرەکېشوو قووڵایی ‌گەردوونو زۋانی ھۆرامی و ھەر ئانەیچە پەی ۋیرۆکەردەی سەرکەشانەی ھاندانا و ھەم فېرشکەردەنا قسەکەردەو وېم ڕێکۋزوو و ھەم بنەما ڕازۋانییەکا زۋانی ئەڎایی وېم بېزووۋە .

ئازیزا، پاسە ۋاتم ئی نۋیستە یان کۊمەڵە مانیفێستە نە دەقی پیرۊزا و نە زادەو ھۊشی باڵای، بەڵکو ۋەرەنجامو ئەزموونگەری و ئەزموونگیرتەو منا، کە چە ماۋەو سی و شش ساڵی ۋییەردەیەنە و چېرو کارایی-ئەرەنیاو کەتواری و نەھەماتی و ئەزموونگەری سەرو ھۊشو من، ئی ۋیرۊکۍ چە ئاۋەزو منەنە سەرشاھۊردان و پنەیاۋێنی و دماجار منشا بە ئەۋەنۋیستەو وېشا ناچارکەردەنا، ئومیدوارەنا چە ھەرمانەکېمەنە سەرکۆتە بیەبۊ یان بۊ.

چی بارۆ ئومیدوارەنا ئی نۋیستە بەھاو ئا کاتەیشە بۊ، کە شمەی ئازیز پەی ئەۋەوەنەی و لەیەکۆدایش تەرخانشکەردەن و چە کەموکوڕیەکاش چەمپۊشی نەکەردۍ.

نۋیستەی : ئاکۊ مارانی

١١و ئەپڕیلو ٢٠١٧

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌