یانه‌

پەیامېۉ

پەیامېۋ پەی واڵە و براڵە ھامزۋانە شەبەکۍ * و باجەلانۍ ** و یارسانۍ *** و عەبدومەلەکیۍ** و ھۆرامی-زۋانەکۍ بلوجستانو پاکستانی و ئەفغانستانی***** چە بارەو فەرھەنگی ئینتەرنێتی ھۆرامی

ئاکۊ مارانی

٢٩و جولای ٢٠١٧

سڵام ھامزۋانە وەشەۋیسەکۍ،

ئازیزا، شمە خاوەنۍ بنچینەیی فەرھەنگی ھۆرامییەندۍ و ھەمیشە ئامانجو من پېسە سەرپەرشتیکەرو فەرھەنگی ئینتەرنێتی ھۆرامی چە فەیسبووک و ۋەڵتەریش (فەرھەنگی ئینتەرنێتی ھۆرامی -ھۆرامی/ بە ھامکاری کاک تاریقی وەیسی) و پڕۊژەو (ئێنسیکلۆپێدیای ھۆرامی / بە ھامکاری کاک تاریقی وەیسی)کۊکەردەو گردو دیالێکتە ھۆرامییەکا بییەن و ھەن و درېژەو ھۆڵەکەیچما ھەر ئانەنە؛ پارېزنای زۋانی ئەڎاییما.

ڕەنگا پەی دلېنەبەردەی ھەستو جیایی و وۍ دوورگېرتەی ھەر یۊ چە ئېمە و ھەر ئازیزېۋ، ئەۋەگېڵنای ئی سەربوردەیە گونجیاتەرین وەڵام و ڕۊشنکەرو ئامانجەکەو من بۊ.

من چە زاڕۊڵەیۆ تاکو ئیسە شەیداو ئەژناسای و ئاشنابیەی واڵە و براڵە شەبەك و باجەڵان و یارسانەکانا، چونکە گرد جارېۋ تاتەم سەربوردېۋو وېش پی جۊرە گېڵنېۋە، کە کارایی خەمو ئاڎی بیەن بە سرووشبەخشوو من:

" ساڵو ١٩٥٢ لۋانی پەی دۆروبەرو موسڵی پەی شووتی ئاۋردەی پەی تەۋېڵۍ، کەنارو بۋیسانە شووتیەکەیەنە نیشتەبېنېرە و ۋەرو گەرمای تاسەو ئاۋېسەری کەرېنۍ و پڕېۋەنە قسەکەردەی ھۆرامی ۋەرو گۊشام کۆت، بە پڕتاۋ ھۊرزتانېۋە و چە دەنگەکەی نزیکبیاۋە و دیم چڼ ژەنېۋ بە ھۆرامی قسېکەرا. فرە حەپەسیانی و سەرەم سڕمەن، پەرسام چە ژەنەکا 'ئەرۍ واڵۍ شمە خەڵکو کۊگەیندۍ و چكۊ ھۆرامی فېربیېندۍ؟' .... یۊوە چە ژەنەکا کە بە تەمەنتەرەبۍ، وەڵامو منش داۋە و ۋاتش ' ئېمە خەڵکو ئېگەینمۍ و ئانە زۋانی ئەڎایی وېمانە و پی زۋانە قسۍ کەرمۍ ' " ....

ئیتر چا کاتۊ من چېرو کارایی وەشەۋیسی تاتەیم پەی زۋانی ئەڎایېش، خولیاو ئەژناسای و پەیوەندیگېرتەی چنی ئا ھۆرامی-زۋانا بەرو ھۆرامانی بیەنا و فرەش نەبەرد، ساڵۊ ١٩٨٣ من بیا بە پېشمەرگەو دۋۍ پېشمەرگېم ئەژناسێ (ئارام کەرکووکی و جافر داقووقی) کە ھەر دۋۍ یارسانۍ بېنۍ .... ساڵۊ ١٩٨٧ی فرە جارۍ پەی ڕادیۆ بلوجەکا کە دۆڵەتو عیراقی پشتیۋانیشاکەرۍ، گېرېنۍ و یاۋانی کە بڕۋا کە زۋانی بلوجی و زۋانی ھۆرامی فرە دوورۍ نییەنۍ و فرە واژۍ ھامبەشېشا ھەنۍ ****** ... دماو ئانەیە کاتېۋ کە ساڵۊ ١٩٨٨ چە کیمیاۋارانەکەنە ئاۋارەو ئێرانی بیەیمۍ، چاگە تاتەم کاسپی وەز و مەژگەی کەرۍ و چە سەحنە و کەنوولە کۊمەڵېۋتەر یارسانېم ئەژناسێ .... ساڵۊ ١٩٩٢ - ١٩٩٣ چە شارو ھۆلېری چنی چند ھامڕێۋی ژېۋېنۍ، کە دۋېشا (ڕېبوار و باییز) یارسانۍ کەرکووکۍ بېنۍ و تاکو ئیسەیچ دۋېنۍ چە وەشەویستەرین یاۋەر و ھامڕاکام و ڕاو ئاڎېشاۋە چڼ یارسانېۋی تەرم ئەژناسێ، چانیشا (مەحمووڎە سوور/ مەحمووڎ سوفەیی) .... ھەر پاسە ساڵۊ ١٩٨٩ تاکو ئیسە خولیاو ئەژناسای و پەیوەندیگېرتەیەنا چنی ھۆرامی-زۋانەکا ھەرېمو کوێتەو پاکستانی، کە ڕاو یاۋەرېۋی ھەڵەبجەییۆ (ئیبراھیمو مامۊسا مەحمووڎی) زانام چاگەیچ ھۆرامی-زۋانیۍ ھەنۍ و فرە خزمەتو پەنابەرە کوردەکا بەتایبەت ھەڵەبجەییەکا کەرا. .... ساڵۊ ٢٠١٢ دۊسېۋە زازاییەم چی شارەنە ۋاتش کوڕېۋی ھۆرامی خەڵکو پاکستانی ئینا چېگە و کەسېۋی چالاکا و من مژناسووش، بەداخۆ ۋەڵۍ ئانەیە من بتاۋۊ ئاڎی ۋېنوو، ئاڎ بەرەو ئەمەریکا کۊچشکەرد و ئاۋاتەمە نامادی ...

بەڵام ئازیزا، چە گرد ئانیشا گرنگتەر و دڵوەشکەرتەر ئانەنە، کە من ڕاو ئی فەرھەنگەیۆ (فەرھەنگی ئینتەرنێتی ھۆرامی/ فەیسبووکی) کۆمەڵېۋ ئازیزی پېسەو شمەیم ئەژناسێنۍ و بە بەرکۆتەو نامۊ ھەر ئازیزېۋی شەبەکی، باجەلانی، یارسانی دلۍ ئی فەرھەنگەیەنە، من شاگەشکە بوو و ورەم بەرزبۊۋە و ئومیدم بە پەرەئەسای فەرھەنگەکەی زیاتەر بۊ، چونکە ۋیرۊکەو ئی فەرھەنگەیە، کۊکەردەو گردو دیالێکتەکا زۋانی ھۆرامین، ئیتر ھەر یاگېۋۊ جەھانییەنە با. بېجگە ئانەیچە وەنەی و بەکاربەردەی زۋانی ئەڎاییما (ھۆرامی) پەی من، ۋەرو ئانەیە کە ئاۋاتو سەراپاو تەمەنو تاتەیم بۍ و ھەردەم ۋاچێ "گۆرەتەرین وېوەری (خیانەت) چە زۋانی ھۆرامی ئا کەسا کەردەن، کە دېۋانو ھۊنیەرە ھۆرامییەکاشا ھۊرگېڵنێنۍ و دەقە بنچێنەیەکەشا فۆتنێ یان پەشتۊ کەنۊڵاشا ۋزتۍ "

ئازیزا، من تاکو مەردەی ماچوو و سەرو ئانەیە پاگېروورە، ئەگەر بڕیاربۊ ئی فەرھەنگە خاوەنش بۊ، بەدڵنیاییۊ یەکەمین خاوەنەکېش شمە واڵە و برا شەبەکی، باجەلانی، یارسانی، عەبدومەلەکی و ھۆرامی-زۋانەکۍ ھەرېمو کوێتەو پاکستانییەندۍ، چونکە شمە یان بە ملھوڕی دەسەڵاتدارە سەفەوی و ئوسمانییەکا یان بە ناچاریی ژیۋای چە زادگاو ماما و بابایتا بڕیێنندۍ، بەڵام سەربارو گردو ستەمکارییەکا و ئاۋارەیی و بەڎبەختیتا، پەی ھەمیشەی زۋانی ئەڎایی وېتا پاریزنان و زۋانو شـمە بەشېۋی ڕەسەنا چە زۋانی ھۆرامی و منیچ پېسەو ھەر یۊ چە شمەی ئازیزی، بە دیالێکتېۋی ھۆرامی (دیالێکتی لھونی) قسېکەروو، ھەر پاسە کە شمەی ئازیز بە دیالێکتېۋی تەر قسېکەردۍ، ئانەیچ نیشانەو فراۋانی و کۊنی و پایەداری زۋانەکەیمانە بە بیەو ئا گردە دیالێکت و بنە-دیالێکتا ھەر واژېۋە چڼ ھامواتێش پەی درۊسبیینۍ و ھەر یۊەشا بارېۋەنە بەکاربریۊ و پەی ھەر مەبەستېۋی ھامواتێۋەما ھەنە.

ۋەرو ئانەیە و سەرو ئا بنەمایە، ئومیدوارەنا چێولای (چە ئێ دمای) جیاتی نۋیستەی دەسەواژەو "ئېمە میمانو ئی فەرھەنگەیەنمۍ" بنۋیسدۍ (ئېمە خاوەنۍ بنچینەیی ئی فەرھەنگی ئینتەرنێتی ھۆرامییەنمۍ) و بە کردەوەیچ شمە نیشانتادان، کە فرە دڵسۊزی و خەموەرۍ پاڕېزنای زۋانی ئەڎایی وېتاندۍ.

سەرەڕاو ۋشارای دەسو یۊ بە یۊیتا چی دوورۆ، دما ئومیدو ئی پەیامەو من ئانەن، ئەگەر ھەر ئازیزېۋ بەر ھەر بارېۋ و ۋەرو ھەر ھۊکارېۋی یان بە ھەر بەڵگېۋە قسەکەردەو وېش بە بەشېۋ (بنە-دیالێکتېۋ یان دیالێکتېۋ)و زۋانی ھۆرامی نمەزانوو، با بە نۋیستەی سەرنج و ڕەخنەو وېش وەڵامو ئی پەیامەیە دۊۋە یان بەشۊ سەرنجنۋیسییەنە، سەرنج یان ڕەخنەو وېش چە پەیلۋاکاکاو من گېرۊ، تاکو چە ئا بارۊ زیاتەر گفتوگۊکەرمۍ و بە سەرەنجامېۋی خاستەر و درۊستەر بیاۋمۍ.

برا و دڵسۊزتا

ئاکۊ مارانی

سەرپەرشتیکارو فەرھەنگی ئێنتەرنێتی ھۆرامی

------------------------------------------
سەرنج : نامۊ دیالێکتام بەپاو یاگۍ جوگرافییشا ڕیکزکەردېنۍ؛ چە وەرنیشتۆ پەی وەرکۆتی:

* شەبەک : ئا ھۆرامی-زۋانېنۍ کە ناوچەو دۆروبەرو چەمەو فوڕاتی و دلۍ شارو موسڵۍ و پارېزگاو (نەینەوا)ی نیشتەجابیینۍ. بەپاو زانیارییەکا شەبەکەکۍ چە ئێرانۆ بەرەو دەشتۊ نەینەوای ئامێنۍ و چاگە نیشتەجابیینۍ. پەی زانیاریی زیاتەری سەرو ئی لینکا کلیککەرە:

شبك - ويكيبيديا، الموسوعة الحرة : https://mcaf.ee/nsfg8c

شبك - المعرفة : https://mcaf.ee/xz0mon

شبك العراق في رحلة البحث عن هوية : https://mcaf.ee/u5r9ob

** باجەلانی : ئا ھۆرامی زۋانېنۍ کە ناوچەو میانو پارېزگاو کەرکووکی و سلېمانی نیشتەجابیینۍ و مژیۋا ... پەی زانیاریی زیاتەری سەرو ئی لینکا کلیککەرە:

باجلان - ويكيبيديا، الموسوعة الحرة : http://bit.ly/2v8YtyP

باجلان - ویکی فقه : http://bit.ly/2w9sYSA

*** یارسانۍ : ئا ھۆرامی-زۋانېنۍ کە دلۍ شارو کەرکووکی و دۆروبەریش و ناوچەو میانو پارېزگاو نەینەوای و ھۆلیری و کەرکووکی و سلېمانی و پارېزگاو (ئوستانو) کرماشانی مژیۋا و نیشتەجابیینۍ، پەی زانیاریی زیاتەری سەرو ئی لینکا کلیککەرە:

اهل حق - ویکی‌پدیا، دانشنامهٔ آزاد :http://bit.do/yarsan

درگاه:یارسان - ویکی‌پدیا، دانشنامهٔ آزاد : http://bit.do/yarsani

**** عەبدومەلەکی : ئا ھۆرامی-زۋانەنۍ کە پارېزگاو (ئوستانو) خۆراسانی مژیۋا و نیشەجابیېنۍ

ایل‌های کرد ایران - ویکی‌پدیا، دانشنامهٔ آزاد : http://bit.ly/2vgQyQU

پژوهش نامه ايل عبدالملكي (عبدالمالکی) : http://bit.ly/2uI6hak

بررسی مهاجرت اجباری کردهای مازندران : http://bit.ly/2w93Z1G

***** ھۆرامی-زۋانەکۍ بلوجستانو پاکستانی و ئەفغانستانی : ئا ھۆرامی-زۋانېنۍ کە ھەرېمو کوێتەو پاکستانی مژیۋا و نیشتەجا بیېنۍ و یۊ چە سەرۊکھۆزەکاشا نامېش (سەردار خان)ا. چی بارۆ کۊمەڵېۋ سەرچەمۍ مێژووییم بەدەسئاۋردېنۍ، ئەگەر بوار بۊ، پەی ھۆرامی ھۊرشاگېڵنۊ.

****** ڕادیۆ دەنگو بلوجستانی (ئەر درۊس ڤبرممەنەبۊ نامېش ' بلوجستانی ئازاد' بۍ) دۆڵەتو عیراقی ۋەرانۋەرو دۆڵەتو ئێرانی چە مدرامانو بلوجەکا پشتیۋانی کەرۍ و ئا کاتە من پېشمەرگە بېنۍ و ۋێرەگانە سات شش و نیم/ حۆت (١٨:٣٠/ ١٩) بە کاتو عیراقی/ ئێرانی پەیش گۊشگېرېنۍ و شۊنۊ ئا دەنگ و واژارە وېڵبېنۍ، کە ئۆ ھۆرامی شېنۍ ...

لینکو فەرھەنگی ئینتەرنێتی ھۆرامی چە فەیسبووک :

https://www.facebook.com/groups/Ferhengu.Zvani.Horami

لینکو فەرھەنگی ئینتەرنێتی ھۆرامی چە تێلەگرام

https://t.me/FerhenguZvaniHorami

 

 

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌