یانه‌ داستانې داستانی رازه‌ کوڵیلی

رازه‌ کوڵیلی

رازه‌کوڵيلێ / کاسه‌هامسایی، نمازۆ جیایی- شه‌هلا سادقی

هه‌ڵوه‌هه‌ڵێ ، به‌یدێ که‌ڵێ . کێ شیر ؟ کێ به‌بون ؟ کێ قاڵاو؟ کێ .........؟

هه‌مباز جه‌ بێ شانسیه‌نه‌، ئه‌م بیانه‌ی وه‌رگ . مه‌شیۆ بژمارو تا پنچا، کاوان  و ئا لان، نارین  و  له‌یلا.

هه‌ر کامێشا لوه‌ی کوچیه‌یوه‌ره‌ و دورێ که‌وتێوه‌ جه‌یۆی، چێرو ده‌سانمه‌ره‌ دیه‌ی مه‌دیه‌و، له‌یلام چه‌م  په‌نه‌ که‌وته‌. ئه‌ی خاس ئیسه

http://komakal.net

 ‌مه‌گێروش، تا کۆ نه‌که‌رۆ. چی عانه‌نه‌ که‌ سه‌ره‌م نیابێ  قه‌دو دیوارو یانه‌یوه‌ره‌. کتوپڕ  بوه‌ی  وه‌شه‌ ئه‌ومه‌، ئی  بۆ  وه‌شێ وه‌شڵه‌ی چێشینه‌ بۆ ؟ به‌خ ، بۆو کفتانه‌نه‌ یا لێله‌می برێژیا: وه‌شڵه‌یشان  په‌نه‌   بۆو  عه‌تریش  چن  فره‌ن  تا  ئاخرو کۆڵانی پێیچیان.

سه‌ره‌م  فره‌ته‌ر به‌رد نزیکو دیواره‌که‌ی ، ئی  بۆی  لێ  ده‌لاقه‌که‌و یانه‌و  له‌یلاینه‌ مه‌ی . په‌له‌م  نیه‌ن  با  خاس  بۆکێش  هۆرکێشو.

یوه‌‌و، دوێ و یه‌رێ  و چوار و ... به‌ش  نیاوو  په‌نجا، تێره‌ بیان  به‌ خودا. به‌شکه‌م  له‌یلا  وێره‌گه‌ خۆڵکه‌م  که‌رۆ  بلو په‌ی  یانه‌یشان  لێ  به‌حرو  بۆو  چاشته ‌وه‌شه‌کێ  داده‌ هه‌راڵێنه‌ بێنێ، چڕیشان  وه‌نه‌م. ده‌ی  چێش  بی  هه‌تاو، په‌ی چی مه‌شماری ؟

خۆ یاوه‌ی هه‌زار. ئه‌ومان  وێمه‌ره‌، فره‌م  په‌نه‌ شیه‌ن؛ جه‌ بۆکێ  تێره‌ بیێنان؛ خۆدا نه‌وڕۆش. با بلو ده‌مو هوشه‌لارێوه.

جو، کاوان؛ جو،له‌یلا؛جو، ئالان؛ جۆ، نارین.

له‌یلا  پێسه‌ جاران، داش چیری و نه‌ما قسه‌واته‌ی.

له‌یلا: نه‌ کنا، ئه‌م  جۆ  نه‌ویێنان .

خۆ  دیم  مه‌زانو، جۆ کریا، به‌ڵام؟..

واتم: باش جۆ نه‌ویه‌ی، نه‌زانام .

به‌شکه‌م  پی  به‌هانێ  وێره‌گه‌ خۆڵکه‌م  که‌رۆ، په‌ی  یانه‌یشان .

کاوان بیه‌ن  وه‌رگ ... گیریا .

تا هازی  زه‌نگۆڵانمه‌نه‌ بێ  ره‌مان، وێم  بشارونه‌و، په‌شته‌و  داربه‌رقه‌کێنه،  گجیه‌که‌و نارینێ  دیاره‌ن؛ وێم دا پاڵو تانکره‌و نه‌فته‌و یانه‌و داده‌ زارای .

ئه‌خودا  هه‌مباز ئی  بۆ  وه‌شێ  چێشه‌نه‌؟ بۆو  خۆرشتو  سه‌وزیه‌ن، وه‌شڵه‌یشان په‌نه‌.

ئارۆ  تا  مه‌غریو هه‌ر  بۆی  مه‌ژنه‌وو. خۆ دێق مه‌که‌رو، هوشه‌لارێم  بیزیا.

ئنه‌ به‌ له‌مه‌ی  ئه‌ورا بۆو چاشتانم  ئه‌ژنه‌ویه‌، هازه‌و زه‌نگۆڵام  نه‌مه‌نه‌، لوانێ  ته‌یوه‌تی  وێم  وس  وه‌رو  چه‌مانو  کاوانی، تا  زوته‌ر  جۆم  که‌رۆ .

ئۆخه‌یچ  زه‌رده‌ شاهۆوه‌ پڕا، ئانه‌مان  نه‌مه‌نه‌ن.

واتم: لاوه‌ره‌ زاڕۆڵان، با بلمه‌ی  یانه، دیره‌ن  برا.

ڕه‌مان  لوانێ  ره‌و  یانه‌ی ، هه‌ر  به‌ره‌و حه‌ساره‌کێمانم  که‌ردو، بۆو وه‌شه‌و کلوچه‌نانیان  لوا  سه‌ره‌مه‌ره

واتم: ئه‌دا  مانێ  نه‌وی، کولیچێد  که‌ردێنێ؟ ئینێ  په‌یمان  فرێ  نیه‌نێ؟

ئه‌داێم  وات: رۆڵه‌ گێان  دا بۆ که‌مه‌ێ  یاریم  به، ها  لێ  هامسانه‌نه‌ به‌ششانه‌و که‌ره‌.

حه‌ر  ئی  قسێمه‌ ئه‌ژنه‌ویه، وه‌شیێنه‌ بیانێ  ئانه‌ ته‌ر( ئۆخه‌یچ، ئیسه‌ مه‌لو لێبه‌ره‌و له‌یلاو  ئادیشان ، حه‌تمه‌ن  ئادیچێ  خوڵکه‌یم  مه‌که‌ران).

ته‌قه‌و به‌ره‌و  یانه‌و له‌یلایم  دا، براکه‌شه‌ن،  ئه‌ی  خودا .

واتم: فه‌رماوه‌ کولیچێ  تازێم   ئه‌وردێنێ.

دماو ماڵاوایی  و ده‌س وه‌ش بیه‌ی، به‌ره‌که‌ش بینا.

کولیچه‌نانیه‌کێم  لێ  هامساکانه‌نه‌ به‌شه‌و  که‌ردێ  و به‌ نانه‌شانه‌کێ  ده‌سیم، کوام به‌ره‌که‌یره‌.

ئا  که‌ردێوه، ئه‌ورامه‌ن.

گۆشه‌و  سفره‌که‌ینه، بادیه‌یوه‌ رۆحینه‌م  چه‌م  په‌نه‌ که‌وته، زو  په‌رسام  ئا چاشتێ کێ  ئاوردێنه، ئه‌دا؟

ئه‌دا: له‌یله‌ی  ئه‌وردێنه‌.

ده‌س  و پلم  شت، ته‌که‌م  دا  له‌و  سفره‌یوه‌، ئه‌دام  چاشته‌کێش که‌رده‌لێ ده‌ورێان، موڵه‌تم نه‌دا ده‌سم به‌رد په‌ی کاسه‌و چاشته‌کێ.

واتم: توخودا ئه‌دا چا چاشتێ په‌ی ئه‌م فره‌ته‌ر که‌ره‌ره‌.

ئه‌دام وات : باش رۆڵه‌ گیان.

سه‌رو ده‌وریش لادا حه‌فت ره‌نگێ واڕیان ، خۆ قه‌لبم مدرا. ئه‌ی خودا ئینه‌بێ لێله‌می گریا، بو و ترشاوێ بێ ئه‌منش گێج که‌ردان.

ئه‌دام کاسه‌که‌ش نیا له‌و ئه‌منه‌و و واتش ها ڕۆڵه ‌تریتش که‌ره‌

واتم: نه‌ئه‌دا ، زانام چاشته‌ی ته‌ریه‌نه.

ئه‌دام وات: خودا نه‌وڕۆش رۆڵه‌، زه‌حمه‌تشا کێشان، پاسه‌ مواچه‌ عاجزێ مه‌وان.

سه‌ره‌م وسه‌ره‌ سه‌رو ده‌وری سێفه‌کۆ یاکانم ، تیکه‌ی گه‌وره‌م گرت چی عانه‌نه ‌ته‌قه‌و به‌ره‌یمان ئه‌ومه، هازیم نه‌وێ بلو به‌ره‌که‌ی که‌رونۆ  شه‌تاوه ‌لوا ده‌مو ته‌قه‌یوه‌. دوێ ده‌وریێ چاشتیش ئه‌وردێ چه‌نی وێش

شه‌تاو: ئه‌دا ئینه‌داده‌زاره‌ی دا، پڵاو خۆرشته‌ن.

به‌ده‌س ده‌وری چاشته‌کێم لادا، واتم: به‌زیاوبۆ یاخودا، پیازێش فره‌فرێنێ ، ئا به‌وره‌ش شه‌تاو ، هه‌ناسم چنیا.

خۆلکه‌و که‌سیم نه‌که‌رده‌و نشتانێره‌برێنج وخۆرشته‌که‌م گردم وارد.

چه‌نی ده‌نگو خوه‌و ئه‌ده‌یم وبابه‌یم و شه‌تاوێ ئه‌ومانه‌ی وێمه‌ره‌، سه‌ره‌م هۆربڕنا په‌ی چی مه‌خوه‌یدێ ؟ ئه‌ورامه‌ن برا.

بابێم وات: رۆڵه‌گیان ئه‌گه‌ر‌ ڕۆچه‌ گێرته‌ێ په‌نه‌ سه‌خته‌نه‌، قه‌ێدش نیه‌ن ، رۆڵه‌، خه‌یره‌ش ناچه‌نه‌.

چه‌ودنیا خودا جه‌زاۆ مه‌دۆوه‌ یانه‌و تفاقی فره‌ۆ مه‌دۆ په‌نه‌. وارده‌ۆ نۆشو گێانێد بۆ .

واتم: ئه‌ی ‌ده‌ستان وه‌ش بۆ ، خودا زێادش که‌رۆ ، مه‌زانی فره‌سه‌خته‌ن رۆچێ ئه‌وه‌ل رۆ؟

په‌له‌فره‌م که‌رد ، زوانوۆێچم گه‌س

 یه‌خودا نه‌مانۆ ئه‌وریوه‌هیچ که‌س

ئی زرینگه‌چێشه‌ن ، ده‌نگوجیپاسێن

عیلم و عه‌لامات قه‌وله‌مێ تازێن

(فڕ)و(ماێکروفڕ)،(هودو)(هه‌واپه‌ز)

 ئینێ نمازان، بگنم ویری که‌س

مه‌زاندێ په‌چی که‌وته‌ن جیایی

باوش نه‌مه‌نه‌ن کاسه‌هامسایی

(پیتزا)و(ساندویچ) په‌یک موتۆ ری

کوڵ بیه‌ن به‌باو چم وچم که‌ری

کڵاس وپیشرفت ، خۆڵکه‌ی سه‌رسه‌ری

وه‌خته‌ی مه‌ردینه‌چێش چه‌نیدبه‌ری

ماهواره‌وسی دی و خه‌تی ئینترنت

عورفی قه‌دیمش جه‌ده‌سانمان شت

ئه‌رشه‌ونشینی و خۆلک و خۆ نه‌بۆ

 په‌چی مه‌سانی هه‌ر زه‌ردوکه‌وۆ

موبڵ وته‌ختی خاو ، بوفه‌،دکوراسێون

خۆ یۆ گیروکه‌رد ئه‌ی مێماند کۆن؟

به‌شکه‌م په‌ی  ساته‌ی یادکه‌رده‌وجاران

 هامساوکرێ نشین بگنۆ وه‌ویرمان

به‌جیاو شه‌ومه‌نه‌وئیسراف وجیایی

 با که‌رمێوه‌باوکاسه‌هامسایی

پێشکه‌ش به‌گردوزه‌وڕلانه‌ی که‌ئێسال په‌ی ئه‌ول جاری رۆ چێشا گێرتێنه‌، به‌تایبه‌په‌ی کاکه‌کاوانی وه‌شه‌ویسی.

شه‌هلا سادقی 
 10/5/1389

horgyrya ce saytw http://komakal.net  

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Sunday, 26 September 2010 21:07)