خه‌ڵکوو ره‌نج کیشوو هۆرامانی

مه‌ردموو شه‌ریفوو کوردستانی

ئانا جاریؤته‌ر ده‌نگوو باسوو هورچنیای به‌ گه‌رمی کوردستانوو نشووریش گرته‌نۆ. قه‌رارا جه‌ 25 وته‌مووزه‌و 2009یه‌نه‌ هورچنیاو پارلمانی و سه‌روکوو کوردستانی به‌ر گوزار کریو و هه‌م زه‌مانیچ ده‌نگ به‌ ده‌ستووروو کوردستانی بدریو.

‌هه‌رپاسه‌ که‌ ئاگاداریندی هورچنیه‌و ئی جاریه‌ جه‌ بارو دوختیؤه‌نه‌ ئامانه‌نه‌ ئارا که‌ گرانی، بی کاری، ده‌ر به‌ ده‌ری و ره‌مای ڕوڵه‌کا کوردستانی بیداد که‌رو.

 بارو دوختیؤ که دلیشه‌نه‌‌ ئاؤازه‌و گه‌نده‌ڵی، بی مافی و به‌رخوردی نا دیموکراتیانی گرد مه‌رزیؤشا به‌زنان. چی بار و دوخته‌نه‌ جه‌میؤ دلی نازیه‌نه‌ مه‌لی که‌را و فریؤیچ نیازمه‌ندی ساده‌ته‌رین پێؤیسته‌کا ژیانیه‌نی.

ؤیرانی هۆرامانییچ ئینا پوپه‌و ویشه‌نه‌ و جه‌ فره‌و ده‌گاکا‌شه‌نه‌ په‌پوو موانو. مڵکیش سوتینی و که‌له‌کیش وڕێنی. کولتوور و زؤانه‌که‌ش هیلیانیشا شیؤیێنه‌. نامه‌و دؤی ساڵی چێؤه‌ڵته‌روو جه‌میؤ جه‌ هۆرامیه‌کا سه‌روو پاریزنای زؤانی هۆرامی، هه‌ڵای یه‌غدانه‌کا پارلمانیه‌نه‌ توزه‌ موه‌رو.

ئیسه‌ ئانا پارتی سیاسیی هه‌م کۆتینێ ڕا تا جاریؤته‌ر به‌یاؤه‌ دلی به‌ره‌کاتا و داؤاو ده‌نگاتا ؤه‌نه‌  که‌را. بڕیؤ چانیشا ده‌نگی شمه‌شا گه‌ره‌کینی تا که‌راشاؤه‌‌ به‌ په‌رچین و پاڵشه‌نه‌ ئیدامه‌و ئانه‌یه‌ بدا که‌ تا ئیسه‌ خه‌ریکیش بیینی. بڕیؤیچ چه‌می ته‌مێشا دارێنینه‌ یاگه‌کی ئادیشا و بازیؤیچ باسوو فاڕیای که‌را.

ئارو که‌س نیا نه‌زانو که‌ جه‌ گرد یاگیؤوو دنیایه‌نه‌ به‌شی فره‌و نابسامانیا کومه‌ڵگای هور گیڵوؤه‌ په‌ی لا ده‌سه‌ڵاتی، که‌چی پارتی ده‌سه‌ڵات داری کوردستانی چی بارۆ که‌کیؤه‌ مه‌گه‌زوشا و پیسه‌ هه‌میشه‌ی و بی وردیته‌رین ڕه‌خنه‌ جه‌ وی وه‌رموو ده‌سه‌ڵاتی زیاته‌ری ؤینا و پیلانیش په‌ی گیڵنا. خه‌ریکینی تا جه‌ راو به‌رجه‌سته‌که‌رده‌ی دژمنه‌ ده‌ره‌کیا و ئه‌ژمارای خیڵوو هه‌رمانه‌ ناکه‌ردا ویشاؤه‌ زه‌مینه‌و ده‌ره‌تانیؤی فره‌ته‌ری په‌ی به‌رژه‌ؤه‌ندیه‌ تایبه‌تی و بی به‌هاکاشا فه‌راهه‌م که‌را.

ئینی مه‌ردمشا لاؤه‌ ساؤان و که‌یه‌و سه‌ر په‌ره‌سی که‌رده‌یش که‌را. پاسه‌  موانا که‌ مه‌ردم بی ئادیشا ژیؤایش مه‌بو و مه‌تاؤو ویش وه‌ی که‌رو و پا جوره‌ ته‌لاش که‌را تا گرد هه‌ست و نیستیؤوو مه‌ردمی گیرانه‌ ده‌س.

مه‌ردموو خه‌بات کاروو هۆرامانی، هام وه‌ڵاتیه‌ وه‌شه‌ؤیسه‌کا، ده‌نگوو شمه‌ متاؤو سه‌روو ئی بار و دوخته‌ نا‌باریه‌ شونی ؤزو. چه‌می ؤریایی که‌ردێ و ده‌نگه‌کاتا به‌ هه‌رزان مه‌نیه‌یدیره‌.

گرد پیمانیؤی ئارویی و ئاؤه‌زیانه‌ ئانه‌یه‌ مرمانو که‌ مافی شمه‌ جه‌ که‌ش و هه‌ؤێؤی ئازاد و دیموکراسیانه‌نه‌ ئاسانته‌ر مه‌یانه‌ ده‌س.

ده‌نگوو ویتا ده‌یدی به‌ دیموکراسی و ته‌لاش که‌ردی تا یاردی ده‌ری پروسه‌و دیموکراسی بیدی. به‌ جوریؤ و به‌ که‌سانیؤی ده‌نگ ده‌یدی که‌ بتاؤا جه‌ پاڕلمانه‌نه‌ ده‌نگوو ئازاره‌کاتا هور بڕنا و په‌ڕلمانی جه‌ سه‌رد و سڕیه‌نه‌ به‌ر بارا و بتاؤا خاؤه‌ن ده‌نگی با. جه‌ ویتا با و هام ده‌ردیتا با. بشناسدیشا و بشناساتا. 

جه‌میؤ جه‌ دڵسوزا هۆرامانی جه‌ به‌روو وه‌ڵاتیۆ

24062009